‘ಹುಕ್ಕಾ ಕೇಂದ್ರ’ ರದ್ದತಿಗೆ ಆಗ್ರಹ

ಶಿವಮೊಗ್ಗ : ಇಲ್ಲಿನ ಗೋಪಾಲಗೌಡ ಬಡಾವಣೆಯಲ್ಲಿ ಸ್ಥಾಪಿಸಲಾಗುತ್ತಿರುವ 'ಹುಕ್ಕಾ ಕೇಂದ್ರ'ವನ್ನು ಕೂಡಲೇ ರದ್ದುಗೊಳಿಸಬೇಕೆಂದು ಒತ್ತಾಯಿಸಿ ಜಿಲ್ಲಾಧಿಕಾರಿ ಕೆ.ಎ.ದಯಾನಂದ್‌ ಅವರಿಗೆ ಮಂಗಳವಾರ ಮನವಿ ಸಲ್ಲಿಸಲಾಯಿತು.

ಗೋಪಾಲಗೌಡ ಬಡಾವಣೆ ನಿವಾಸಿಗಳ ಸಂಘ, ಸ್ವಾಮಿ ವಿವೇಕಾನಂದ ಬಡಾವಣೆ ನಿವಾಸಿಗಳ ಸಂಘ, ಚಂದನ ಪಾರ್ಕ್‌ ಆರೋಗ್ಯ ಅಭಿವೃದ್ಧಿ ಸಮಿತಿ, ನಿರಂತರ ಟ್ರಸ್ಟ್‌ ನೇತೃತ್ವದಲ್ಲಿ ಜಿಲ್ಲಾಧಿಕಾರಿಗಳಿಗೆ ಮನವಿ ನೀಡಲಾಯಿತು.

ಹುಕ್ಕಾ ಕೇಂದ್ರ ತಲೆ ಎತ್ತಿದ್ದಲ್ಲಿ ಯುವಜನಾಂಗ ದಾರಿತಪ್ಪುವ ಸಾಧ್ಯತೆ ಇದೆ. ಜತೆಗೆ, ಇದೇ ಸ್ಥಳದಲ್ಲಿ ದೇವಸ್ಥಾನ, ಸರಕಾರಿ ಕಚೇರಿಗಳು, ಶಾಲಾ ಕಾಲೇಜು, ಬ್ಯಾಂಕ್‌, ಆಸ್ಪತ್ರೆಗಳಿವೆ. ಒಂದುವೇಳೆ, ಹುಕ್ಕಾ ಕೇಂದ್ರವಾದ್ದಲ್ಲಿ ಇಡೀ ವಾತಾವರಣವೇ ಹಾಳಾಗಲಿದೆ. ಈ ಕುರಿತು ಈಗಾಗಲೇ ಜಿಲ್ಲಾಡಳಿತ ಗಮನಕ್ಕೂ ತರಲಾಗಿತ್ತು. ಆದರೆ, ಯಾವುದೇ ಪ್ರಯೋಜನವಾಗಿಲ್ಲ ಎಂದು ಪ್ರಮುಖರಾದ ಜಯಣ್ಣ ದೂರಿದ್ದಾರೆ.