ಪಡಿತರಕ್ಕೆ ಹೆಚ್ಚುವರಿ ಹಣ ವಸೂಲಿ ತಡೆಗೆ ಆಗ್ರಹ

ಭದ್ರಾವತಿ: ನ್ಯಾಯ ಬೆಲೆ ಅಂಗಡಿ ಮಾಲೀಕರು ಪಡಿತರ ಚೀಟಿಗಳಿಗೆ ಸಂಬಂಧಿಸಿದಂತೆ ಸರಕಾರ ನಿಗದಿ ಪಡಿಸಿರುವ ಹಣಕ್ಕಿಂತ ಹೆಚ್ಚುವರಿ ಪಡೆಯುತ್ತಿದ್ದಾರೆ ಎಂದು ಆರೋಪಿಸಿ ಕರ್ನಾಟಕ ರಕ್ಷ ಣಾ ವೇದಿಕೆ(ಪ್ರವೀಣ್‌ ಶೆಟ್ಟಿ ಬಣ) ಕಾರ್ಯಕರ್ತರು ಶುಕ್ರವಾರ ಪ್ರತಿಭಟನೆ ನಡೆಸಿ ತಹಸೀಲ್ದಾರ್‌ಗೆ ಮನವಿ ಸಲ್ಲಿಸಿದರು.

ತಾಲೂಕು ವ್ಯಾಪ್ತಿಯ ನ್ಯಾಯ ಬೆಲೆ ಅಂಗಡಿಗಳಲ್ಲಿ ಸರಕಾರ ನಿಗದಿ ಪಡಿಸಿದ ಹಣಕ್ಕಿಂತ ಹೆಚ್ಚುವರಿ ಹಣ ವಸೂಲಿ ಮಾಡುತ್ತಿದ್ದಾರೆ, ಬಯೋಮೆಟ್ರಿಕ್‌ ಪಡೆಯಲು 10 ರೂ., ತೊಗರಿಬೇಳೆಗೆ ಸರಕಾರ ನಿಗದಿ ಪಡಿಸಿರುವ 38 ರೂ. ಬದಲಿಗೆ 45 ರಿಂದ 50 ರೂ. ಹೆಚ್ಚುವರಿ ಪಡೆಯುತ್ತಿದ್ದಾರೆ ಎಂದು ಆರೋಪಿಸಿದರು.

ನಗರ ಪ್ರದೇಶಗಳಲ್ಲಿ ನ್ಯಾಯಬೆಲೆ ಅಂಗಡಿ ಮಾಲೀಕರು ರಾಜಕಾರಣಿಗಳಂತೆ ವರ್ತಿಸುತ್ತಾ ಬಡ ಮತ್ತು ಮಧ್ಯಮ ವರ್ಗದ ಜನರಿಗೆ ಸತಾವಣೆ ಮಾಡಿ, ಪಡಿತರ ವಿತರಿಸುವಲ್ಲಿ ವಂಚಿಸುತ್ತಿದ್ದಾರೆ. ಅಲ್ಲದೆ, ತಿಂಗಳಲ್ಲಿ ಕೇವಲ 2 ಅಥವಾ 3 ದಿನ ಮಾತ್ರ ಅಂಗಡಿ ತೆರೆದು ಸರಿಯಾಗಿ ಪಡಿತರ ವಿತರಿಸದೆ ಅನ್ಯಾಯವೆಸಗುತ್ತಿದ್ದಾರೆ. ಇದರಿಂದ ಕೂಲಿ ಮಾಡಿ ಜೀವನ ಸಾಗಿಸುವ ಮಧ್ಯಮ ವರ್ಗದವರು ಪಡಿತರ ನೀಡುವ ದಿನಾಂಕಕ್ಕೆ ಆಗಮಿಸಲು ಸಾಧ್ಯವಾಗದೆ ಪರಿತಪಿಸುವಂತಾಗಿದೆ. ಕಡ್ಡಾಯವಾಗಿ ಪ್ರತಿ ತಿಂಗಳು 10ರಿಂದ ತಿಂಗಳ ಕೊನೆ ವರೆಗೆ ಅಂಗಡಿಗಳನ್ನು ತೆರೆಯಬೇಕು. ಬಯೋಮೆಟ್ರಿಕ್‌ನಿಂದ ಗುರುತು ಪಡೆದ ದಿನದಂದೆ ಅಕ್ಕಿ, ಬೇಳೆ ಮತ್ತಿತರೆ ಪದಾರ್ಥಗಳನ್ನು ನೀಡಬೇಕು ಎಂದು ಒತ್ತಾಯಿಸಿದರು.

ವೇದಿಕೆ ಅಧ್ಯಕ್ಷ ಬಿ.ವಿ.ಗಿರೀಶ್‌, ವಿದ್ಯಾರ್ಥಿ ಘಟಕದ ಜಿಲ್ಲಾಧ್ಯಕ್ಷ ಅಪ್ಪು, ಜೆಡಿಯು ರಾಜ್ಯ ಉಪಾಧ್ಯಕ್ಷ ಶಶಿಕುಮಾರ್‌ ಎಸ್‌.ಗೌಡ, ಮುಖಂಡರಾದ ವೆಂಕಟೇಶ್‌, ಬ್ರಹ್ಮಲಿಂಗಯ್ಯ, ಸಂದೇಶಕುಮಾರ್‌, ವಿವೇಕ್‌ ಪುಟ್ಟೇಗೌಡ, ಮಣಿ ಮತ್ತಿತರರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು. ಗ್ರೇಡ್‌-2 ತಹಸೀಲ್ದಾರ್‌ ರಂಗಮ್ಮ ಮನವಿ ಸ್ವೀಕರಿಸಿದರು.