ನೈಟ್‌ ಸಂಚಾರ ಜನರಿಗೆ ಕಷ್ಟ ಕಷ್ಟ

ರವಿರಾಜ ಎಂ.ಜಿ.ಭಟ್‌, ಹೊಸನಗರ
ಪಟ್ಟಣದ ವ್ಯಾಪ್ತಿಯಲ್ಲಿರಾತ್ರಿ ಒಮ್ಮೆ ಸುತ್ತಾಡುವುದು ಬಲು ಕಷ್ಟ. ಬೀದಿ ದೀಪಗಳು ಉರಿಯುವುದಿಲ್ಲ. ಇದರಿಂದ ಜನ ನಿತ್ಯವೂ ಕತ್ತಲೆಯಲ್ಲೇ ರಸ್ತೆ ಸಂಚಾರ ಮಾಡುವಂತಾಗಿದೆ! ಇದಕ್ಕೆ ಕಾರಣ ಬೀದಿ ದೀಪ ನಿರ್ವಹಣೆ ವೈಖರಿ ಸರಿ ಇಲ್ಲ. ಪದೇ ಪದೇ ಹಾಳಾಗುವ ಬೀದಿ ದೀಪ, ಹಲವು ತಿಂಗಳು ಕಳೆದರೂ ದುರಸ್ತಿ ಕಾಣದಿರುವ ಟ್ಯೂಬ್‌ಲೈಟ್‌ಗಳು, ಒಮ್ಮೆ ಉರಿದರೆ ಇನ್ನೊಮ್ಮೆ ಉರಿಯದ ಹೈಮಾಸ್ಟ್‌ ಮತ್ತು ಸಿಎಫ್‌ಎಲ್‌ ದೀಪಗಳು, ಹೀಗೆ ಹತ್ತಾರು ಸಮಸ್ಯೆಗಳಿವೆ. ಇದರಿಂದ ಪಟ್ಟಣದ ನಾಗರಿಕರಿಗೆ ಕಿರಿಕಿರಿ ಮಾತ್ರ ತಪ್ಪಿಲ್ಲ. ಪಟ್ಟಣದಲ್ಲಿಒಟ್ಟು 11 ವಾರ್ಡ್‌ಗಳಿಂದ ಸುಮಾರು 800 ಬೀದಿದೀಪಗಳಿವೆ. ಈ ಪೈಕಿ 300 ದೀಪಗಳು ಎಲ್‌ಎಡಿ ಬೀದಿದೀಪಗಳಾಗಿವೆ. ಆದರೆ ಈ ದೀಪಗಳಲ್ಲಿಹೆಚ್ಚಿನವು ಹಾಳಾಗಿದ್ದು, ಉರಿಯುತ್ತಿಲ್ಲ. ನಿರ್ವಹಣೆ ಇಲ್ಲದ ಕಾರಣಕ್ಕೆ ದೀಪವಿದ್ದರೂ ಉಪಯೋಗವಿಲ್ಲ.