ಕೆಎಫ್‌ಡಿ ಬಾಧಿತರ ನೆರವಿಗೆ ಜಿಲ್ಲಾಡಳಿತ

ಸಾಗರ: ತಾಲೂಕಿನ ಅರಳಗೋಡು ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಶಂಕಿತ ಕೆಎಫ್‌ಡಿಗೆ ತುತ್ತಾಗಿ ಮಣಿಪಾಲದ ಕೆಂಎಂಸಿ ಹಾಗೂ ವಿವಿಧ ಖಾಸಗಿ ಆಸ್ಪತ್ರೆಗಳಿಗೆ ಚಿಕಿತ್ಸೆಗೆ ತೆರಳಿದವರ ನೆರವಿಗೆ ಜಿಲ್ಲಾಡಳಿತ ಮುಂದಾಗಿದೆ. ಈ ಪ್ರಕರಣಗಳಲ್ಲಿ ಆಸ್ಪತ್ರೆ ಬಿಲ್‌ಗಳನ್ನು ಆಧರಿಸಿ ಶುಲ್ಕ ಪಾವತಿಸಲು ಶಿವಮೊಗ್ಗ ಜಿಲ್ಲಾಧಿಕಾರಿ ಕೆ.ಎ.ದಯಾನಂದ್‌ ಒಪ್ಪಿಗೆ ನೀಡಿರುವ ಹಿನ್ನೆಲೆಯಲ್ಲಿ ಶುಕ್ರವಾರ ಅರಳಗೋಡು ಗ್ರಾಮ ಪಂಚಾಯಿಗೆ ಅರ್ಜಿಗಳನ್ನು ಸಲ್ಲಿಸಲಾಗುತ್ತಿದೆ.

ಈ ನಡುವೆ ಅರಳಗೋಡಿನಿಂದ ಇಬ್ಬರು ಜ್ವರ ಪೀಡಿತರನ್ನು ಮಣಿಪಾಲಕ್ಕೆ ಕಳುಹಿಸಿಕೊಡಲಾಗಿದೆ. ಶುಕ್ರವಾರ ಮೂರು ಮಂಗಗಳು ಸಾವನ್ನಪ್ಪಿದ ಘಟನೆಗಳು ನಡೆದಿವೆ. ಚಿಪ್ಳಿ ಲಿಂಗದಹಳ್ಳಿಯಲ್ಲಿ ಮೃತ ಮಂಗದ ಶವಪರೀಕ್ಷೆಯನ್ನು ಪಶು ಇಲಾಖೆ ಸಹಾಯಕ ನಿರ್ದೇಶಕ ಡಾ. ಎನ್‌.ಎಚ್‌.ಶ್ರೀಪಾದರಾವ್‌ ನೇತೃತ್ವದಲ್ಲಿ ನಡೆಸಲಾಗಿದೆ. ತ್ಯಾಗರ್ತಿ ಸಮೀಪದ ಹಿರೇಬಿಲಗುಂಜಿಯಲ್ಲಿ ಮತ್ತೊಂದು ಮಂಗ ಸಾವನ್ನಪ್ಪಿದೆ.