ವಾಹನ ಚಾಲಕ, ಮಾಲೀಕರಿಗೆ ಜಾಗೃತಿ ಮುಖ್ಯ

ಸೊರಬ: ವಾಹನಗಳ ಮಾಲೀಕರು ಹಾಗೂ ಚಾಲಕರು ಸಾರಿಗೆ ನಿಯಮಗಳನ್ನು ಮೀರಿದಲ್ಲಿ ಕಾನೂನಿನ ಕ್ರಮ ಕೈಗೊಳ್ಳಲಾಗುವುದು ಎಂದು ಸಿಪಿಐ ಚಂದನ ಗೋಪಾಲ್‌ ಹೇಳಿದರು.

ಖಾಸಗಿ ಬಸ್‌ ನಿಲ್ದಾಣ ಸಮೀಪ ಮಂಗಳವಾರ ಪೊಲೀಸ್‌ ಇಲಾಖೆಯಿಂದ ಆಟೊ, ಟ್ಯಾಕ್ಸಿ ಮತ್ತು ಗೂಡ್ಸ್‌ ವಾಹನ ಚಾಲಕರು ಹಾಗೂ ಮಾಲೀಕರಿಗೆ ಜಾಗೃತಿ ಮೂಡಿಸಿ, ಕಾನೂನಿನ ಅರಿವಿನ ಕುರಿತು ಕರಪತ್ರ ವಿತರಿಸಿ ಅವರು ಮಾತನಾಡಿದರು.

ಎಲ್ಲ ವಾಹನಗಳ ಚಾಲಕರು ಕಡ್ಡಾಯವಾಗಿ ಚಾಲನಾ ಪರವಾನಗಿ ಹೊಂದಿರಬೇಕು. ವಾಹನಗಳಿಗೆ ಕಡ್ಡಾಯವಾಗಿ ವಿಮೆ ಮಾಡಿಸಬೇಕು. ಅತಿಯಾದ ವೇಗದ ಚಾಲನೆ ಮಾಡಬಾರದು. ಮದ್ಯ ಸೇವಿಸಿ ವಾಹನ ಚಲಾಯಿಸಬಾರದು. ವಯಸ್ಕರಲ್ಲದವರಿಗೆ ವಾಹನಗಳನ್ನು ಚಲಾಯಿಸಲು ನೀಡಿದರೆ ವಾಹನಗಳ ಮಾಲೀಕರಿಗೆ ಕಾನೂನ್ಮಾತಕವಾಗಿ ದಂಡ ವಿಧಿಸಲಾಗುತ್ತದೆ ಎಂದು ಎಚ್ಚರಿಸಿದರು.

ಸಾರಿಗೇತರ ವಾಹನದಲ್ಲಿ ಪ್ರಯಾಣಿಕರನ್ನು ಹತ್ತಿಸಿಕೊಂಡು ಹೋಗುವುದು ಕಾನೂನು ಪ್ರಕಾರ ಅಪರಾಧವಾಗಿದ್ದು, ಇಂತಹ ಘಟನೆಗಳು ಕಂಡು ಬಂದರೆ ವಾಹನಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲು ಕ್ರಮ ಕೈಗೊಳ್ಳಲಾಗುವುದು. ಅಸುರಕ್ಷಿತವಾಗಿ ಶಾಲಾ ಮಕ್ಕಳನ್ನು ಕೊಂಡೊಯ್ಯುವುದು ಸಹ ಅಪರಾಧ ಎಂದರು.

ಪಿಎಸ್‌ಐ ಗುರುರಾಜ ಮೈಲಾರ, ಸಿಬ್ಬಂದಿ ಎಚ್‌.ಪಿ.ಪ್ರವೀಣಕುಮಾರ್‌, ಸಲ್ಮಾನ್‌, ಜಗದೀಶ್‌ ಬೇಲೂರಪ್ಪನವರ್‌, ಮನೋಹರ್‌ ಸೇರಿದಂತೆ ವಾಹನ ಚಾಲಕರು ಮತ್ತು ಮಾಲೀಕರು ಇದ್ದರು.