ಪರಿಸರ ಸ್ನೇಹಿ ಕುಟುಂಬ ಪ್ರಶಸ್ತಿ

ಶಿವಮೊಗ್ಗ: ಮನೆ ಆವರಣದಲ್ಲೆಲ್ಲ ಹಚ್ಚ ಹಸಿರು, ಪ್ಲಾಸ್ಟಿಕ್‌ ಬಾಟಲ್‌ಗಳ ಮರುಬಳಕೆ, ಕಾಂಪೋಸ್ಟ್‌ ತಯಾರಿಕೆ ಹೀಗೆ ಹಲವು ಪರಿಸರ ಸ್ನೇಹಿ ಕೆಲಸಗಳನ್ನು ಮಾಡುವ ಮೂಲಕ ಮೀನಾಕ್ಷಿ ಭವನ ಹಿಂಭಾಗದ ಜಿ.ಜಿ.ಎನ್‌.ಲೇಔಟ್‌ನಲ್ಲಿರುವ ಇ.ವಿ.ಸಂಜಯ್‌ಕುಮಾರ್‌ ಸಮಾಜಕ್ಕೆ ಮಾದರಿ ಎನಿಸಿಕೊಂಡಿದ್ದಾರೆ.

ಹವ್ಯಾಸಕ್ಕಾಗಿ ಅನುಪಯುಕ್ತ ಗಾಜಿನ ಬಾಟಲಿಗಳ ಮೇಲೆ ರಂಗೋಲಿಯ ಚಿತ್ತಾರ ಬಿಡಿಸಿದ್ದಾರೆ. ಔಷಧೀಯ ಹಾಗೂ ಹಣ್ಣಿನ ಗಿಡಗಳು, ನೈಸರ್ಗಿಕವಾಗಿ ಬೆಳೆದಿರುವಂತಹ ಗಂಧದ ಮರ ಹೀಗೆ ಹಲವು ವಿಶೇಷತೆಗಳು ಇರುವುದು ಮನೆಯ ತಾರಸಿಯ ಮೇಲೆ.

ತಾರಸಿ ಗಿಡಗಳಿಗೆ ಹನಿ ನೀರಾವರಿ ಪದ್ಧತಿ ಅಳವಡಿಸಿದ್ದಾರೆ. ಅನುಪಯುಕ್ತ ಪ್ಲಾಸ್ಟಿಕ್‌ ಬಾಟಲಿಯಲ್ಲಿ ಹನಿ ನೀರಾವರಿ ಪದ್ಧ್ದತಿ, ಅಲಂಕಾರಿಕ ಗಿಡಗಳ ಪೋಷಣೆ, ಹಸಿ ಕಸವನ್ನು ವಿಂಗಡಣೆ ಮಾಡಲು ಪ್ಲಾಸ್ಟಿಕ್‌ ಬಕೆಟ್‌ನಲ್ಲಿ ಎರೆಹುಳು ಸಂಗ್ರಹಿಸಿ ಕಾಂಪೋಸ್ಟ್‌ ತಯಾರಿಕೆ ಮಾಡುತ್ತಿದ್ದಾರೆ. ಸಣ್ಣ ಪ್ರಮಾಣದಲ್ಲಿ ಸೋಲಾರ್‌ ಲೈಟ್‌ ವ್ಯವಸ್ಥೆಯೂ ಮಾಡಲಾಗಿದೆ. ಈ ಕಾರ್ಯ ಮೆಚ್ಚಿ ಜಿಲ್ಲಾಡಳಿತವು 12ನೇ ದಿನದ ಪರಿಸರಸ್ನೇಹಿ ಕುಟುಂಬ ಪ್ರಶಸ್ತಿ ನೀಡಿ ಗೌರವಿಸಿದೆ.