ಮತಗಟ್ಟೆಗೆ ತೆರಳಿದ ಚುನಾವಣಾ ಸಿಬ್ಬಂದಿ

ಸೊರಬ : ಪಟ್ಟಣದಲ್ಲಿ ಶನಿವಾರ ನಡೆಯಲಿರುವ ಪಟ್ಟಣ ಪಂಚಾಯಿತಿ ಚುನಾವಣೆ ಹಿನ್ನೆಲೆಯಲ್ಲಿ ಚುನಾವಣಾ ಸಿಬ್ಬಂದಿ ಪರಿಕರಗಳೊಂದಿಗೆ ಶುಕ್ರವಾರ ಮಧ್ಯಾಹ್ನ ಮತಗಟ್ಟೆ ಕೇಂದ್ರಗಳಿಗೆ ತೆರಳಿದರು.

ಪಟ್ಟಣದ ತಾಲೂಕು ಕಚೇರಿಯಲ್ಲಿ ಮಸ್ಟರಿಂಗ್‌ ಮತ್ತು ಡಿಮಸ್ಟರಿಂಗ್‌ ವ್ಯವಸ್ಥೆ ಹಾಗೂ ಸ್ಟ್ರಾಂಗ್‌ ರೂಂ ವ್ಯವಸ್ಥೆ ಕಲ್ಪಿಸಲಾಗಿದೆ. ಪಟ್ಟಣದಲ್ಲಿ 12 ವಾರ್ಡುಗಳಿದ್ದು, 4701 ಪುರುಷ 4654 ಮಹಿಳೆಯರು ಒಟ್ಟು 9355 ಮತದಾರರು ತಮ್ಮ ಹಕ್ಕು ಚಲಾಯಿಸಲಿದ್ದಾರೆ.

12 ವಾರ್ಡುಗಳಿಗೆ, 12 ಮತಗಟ್ಟೆಗಳಿದ್ದು, 1 ಮತ್ತು 5ನೇ ಮತಗಟ್ಟೆಗಳು ಒಂದೇ ಕಡೆ ವಿವೇಕಾನಂದ ಶಾಲೆಯ ಬೇರೆ ಬೇರೆ ಕೊಠಡಿಗಳಲ್ಲಿ ಇರಲಿವೆ. 8, 9, 11 ಮತಗಟ್ಟೆಗಳನ್ನು ಸೂಕ್ಷ ್ಮ ಮತಗಟ್ಟೆಗಳೆಂದು ಗುರುತಿಸಲಾಗಿದ್ದು, ಆ ಮತಗಟ್ಟೆಗಳಲ್ಲಿ ಮುಂಜಾಗ್ರತೆ ದೃಷ್ಟಿಯಿಂದ ಛಾಯಾಗ್ರಹಣ ವ್ಯವಸ್ಥೆ ಕಲ್ಪಿಸಲಾಗಿದೆ.

ಪ್ರತಿ ಮತಗಟ್ಟೆಯಲ್ಲಿ ಒಬ್ಬ ಪಿಆರ್‌ಒ, ಒಬ್ಬ ಎಪಿಆರ್‌ಒ, ಇಬ್ಬರು ಮತಗಟ್ಟೆ ಅಧಿಕಾರಿಗಳು, ಒಬ್ಬ ಗುರುತು ಮಾಡುವ ಅಧಿಕಾರಿ, ಒಬ್ಬ ಬಿಎಲ್‌ಒ ಹಾಗೂ ಒಬ್ಬ ಡಿ ದರ್ಜೆ ನೌಕರ ಕರ್ತವ್ಯ ನಿರ್ವಹಿಸಲಿದ್ದಾರೆ. ಚುನಾವಣೆ ಶಾಂತಿಯುತವಾಗಿ ನಡೆಸುವ ಉದ್ದೇಶದಿಂದ ಚುನಾವಣಾ ಕರ್ತವ್ಯಕ್ಕೆ 46 ಕಾನಸ್ಟೇಬಲ್‌, ಇಬ್ಬರು ಪಿಎಸ್‌ಐ, ಒಬ್ಬ ಸಿಪಿಐ, 1 ರಿಜರ್ವ್‌ ಪೊಲೀಸ್‌ ವಾಹನ, 1 ಡಿ.ಆರ್‌ ನಿಯೋಜಿಸಲಾಗಿದೆ.

ಮತದಾರರು ಮೋಬೈಲ್‌ಅನ್ನು ಮತಗಟ್ಟೆಯೊಳಗೆ ತರುವುದನ್ನು ಖಡ್ಡಾಯವಾಗಿ ನಿಷೇಧಿಸಲಾಗಿದೆ. ಚುನಾವಣೆ ಶಾಂತಿಯುತವಾಗಿ ನಡೆಯಲು ಮತದಾರರು ಸಹಕರಿಸಬೇಕು ಎಂದು ಚುನಾವಣ ಅಧಿಕಾರಿ ಪತ್ರಿಕೆಗೆ ತಿಳಿಸಿದರು.