ರಕ್ತಸಿಕ್ತ ಕಾಡಾನೆ ದರ್ಶನ, ಗ್ರಾಮಸ್ಥರ ಆತಂಕ

ತೀರ್ಥಹಳ್ಳಿ : ತಾಲೂಕಿನ ಆಗುಂಬೆ ಬಳಿಯ ಅಗಸರಕೋಣೆ ಗ್ರಾಮ ವ್ಯಾಪ್ತಿಯಲ್ಲಿ ಸೋಮವಾರ ಮಧ್ಯಾಹ್ನದ ಬಳಿಕ ಬೃಹತ್‌ ಗಾತ್ರದ ಕಾಡಾನೆ ಕಂಡುಬಂದಿದ್ದು, ಗ್ರಾಮಸ್ಥರು ಆತಂಕಕ್ಕೆ ಒಳಗಾಗಿದ್ದಾರೆ.

ಆನೆ ಗ್ರಾಮಸ್ಥರಿಗೆ ಕಾಣುವ ಸ್ವಲ್ಪ ಹೊತ್ತಿಗೆ ಮೊದಲು ಸಮೀಪದ ಅರಣ್ಯದಲ್ಲಿ ಆನೆ ಮತ್ತು ಹುಲಿಯ ತೀವ್ರ ಕಿರುಚಾಟ ಕೇಳಿಬಂದಿದ್ದು ಗ್ರಾಮಸ್ಥರು ಬೆಚ್ಚಿಬೀಳುವಂತಾಗಿತ್ತು. ಕಾಡಾನೆಯ ದಂತ, ಸೊಂಡಿಲು, ಕಾಲು ಭಾಗದಲ್ಲಿ ರಕ್ತದ ಕಲೆಗಳು ಕಂಡುಬಂದಿದ್ದು, ಅರಣ್ಯದಲ್ಲಿ ಆನೆ, ಹುಲಿ ಕಾದಾಟ ನಡೆದಿರಬಹುದು ಎಂದು ಗ್ರಾಮಸ್ಥರು ಶಂಕೆ ವ್ಯಕ್ತಪಡಿಸಿದ್ದಾರೆ. ಆದರೆ, ಹುಲಿಯ ಇರುವಿಕೆ ಜನರಿಗೆ ಕಂಡುಬಂದಿಲ್ಲ.