ಎಷ್ಟಾದರೂ ಕೊಡಿ, ಹೊಟ್ಟೆ ತುಂಬ ಊಟ ಮಾಡಿ!

ತೀರ್ಥಹಳ್ಳಿ : ಭೋಜನ ಪ್ರಿಯರಿಗೆ ಇದೊಂದು ಸಿಹಿ ಸುದ್ದಿ. ವಿನೂತನ ಚಿಂತನೆಯಲ್ಲಿ ಹಸಿದ ಹೊಟ್ಟೆಗೆ ಊಟ ಬಡಿಸುವ ಹೋಟೆಲ್‌ ಪಟ್ಟಣದ ಮುಖ್ಯಬಸ್‌ ನಿಲ್ದಾಣ ಬಳಿ ವರಮಹಾಲಕ್ಷ್ಮೇ ವ್ರತದ ದಿನ ಆರಂಭವಾಗಿದೆ.

'ಎಷ್ಟಾದರೂ ದುಡ್ಡು ಕೊಡಿ, ಹೊಟ್ಟೆ ತುಂಬ ಊಟ ಮಾಡಿ' ಚಿಂತನೆಯಿಂದ ಮಾಲೀಕರು ಅನ್ನಲಕ್ಷ್ಮೇ ಹೆಸರಲ್ಲಿ ಹೋಟೆಲ್‌ ಆರಂಭಿಸಿದ್ದಾರೆ. ರಾಜ್ಯದಲ್ಲಿ ಮೊಟ್ಟ ಮೊದಲ ಬಾರಿಗೆ ಲಾಭದ ವ್ಯವಹಾರ ಹೊರತಾಗಿ ಆರಂಭಗೊಂಡಿರುವ ಹೋಟೆಲ್‌ ಎಂಬ ಹೆಗ್ಗಳಿಕೆಯಲ್ಲಿ ಮಾಲೀಕರು ಹೊಸ ಪ್ರಯತ್ನಕ್ಕೆ ಕೈ ಹಾಕಿದ್ದಾರೆ. ಜನರು ಮುಗಿಬಿದ್ದು ಹೋಟೆಲ್‌ನಲ್ಲಿ 'ಅನ್ನಲಕ್ಷ್ಮೇ' ಸ್ವೀಕರಿಸಿ ಇಷ್ಟವಾದಷ್ಟು ದುಡ್ಡು ಕೊಟ್ಟು ಸಂತೃಪ್ತರಾಗುತ್ತಿದ್ದಾರೆ.

ಮಧ್ಯಾಹ್ನ 12.30ರಿಂದ 2.30ರ ವರೆಗೆ ಹೋಟೆಲ್‌ನಲ್ಲಿ ಈ ಸೇವೆ ಲಭ್ಯ. ದಕ್ಷಿಣ, ಉತ್ತರ ಭಾರತೀಯ ಅಡುಗೆ ಶೈಲಿಯ ತಿಂಡಿ, ತಿನಿಸು, ಚಾಟ್ಸ್‌, ಚೈನೀಸ್‌ ಪುಡ್‌ ಎಲ್ಲವೂ ಸಿಗುತ್ತದೆ. ಸೇವಾ ಮನೋಭಾವ ಮುಖ್ಯವಾಗಿಸಿಕೊಂಡು ಆರಂಭವಾಗಿರುವ ಹೋಟೆಲ್‌ಗೆ ಶ್ರೀನಿಧಿ ಪ್ರಿಂಟಿಂಗ್‌ ಪ್ರೆಸ್‌ನ ಟಿ.ಡಿ.ರಾಘವೇಂದ್ರ, ದುರ್ಗಾ ಬುಕ್‌ ಹೌಸ್‌ನ ಗೋವರ್ಧನ್‌ ಪಾಲುದಾರರಾಗಿದ್ದಾರೆ.