ಸಮಸ್ಯೆ ಬಗೆಹರಿಸಿ, ಜನರಿಗೆ ಕುಡಿವ ನೀರು ಕೊಡಿ

ಶಿವಮೊಗ್ಗ : ನಗರದ ವಿವಿಧೆಡೆ ಕುಡಿಯುವ ನೀರಿನ ಸಮಸ್ಯೆ ತೀವ್ರವಾಗಿದ್ದು, ಕೂಡಲೇ ಸಮಸ್ಯೆ ಬಗೆಹರಿಸುವಂತೆ ಒತ್ತಾಯಿಸಿ ಭಾರತೀಯ ಮಾನವ ಹಕ್ಕುಗಳ ಸಮಿತಿ ಯಿಂದ ಸೋಮವಾರ ಜಿಲ್ಲಾಧಿಕಾರಿಗಳಿಗೆ ಮನವಿ ಸಲ್ಲಿಸಲಾಯಿತು.

ವಿನೋಬನಗರ ವ್ಯಾಪ್ತಿಯ ಆದರ್ಶ ಕಾಲೊನಿ, ಕೆ.ಎಚ್‌.ಬಿ.ಕಾಲೊನಿ, ತಿಮ್ಮಕ್ಕ ಲೇ-ಔಟ್‌, ಚನ್ನಪ್ಪ ಲೇ ಔಟ್‌ ಹಾಗೂ 100 ಅಡಿ ರಸ್ತೆಯ ವಿನಾಯಕ ನಗರ, ಸರಸ್ವತಿ ನಗರ ಸೇರಿದಂತೆ ಹಲವೆಡೆ ನಿತ್ಯ ಸಕಾಲದಲ್ಲಿ ನೀರು ಪೂರೈಕೆಯಾಗುತ್ತಿಲ್ಲ. ಕನಿಷ್ಠ 2ರಿಂದ 3ದಿನಕ್ಕೊಮ್ಮೆ ಕೆಲವೇ ನಿಮಿಷಗಳು ಮಾತ್ರ ನೀರು ಬಿಡುತ್ತಿದ್ದಾರೆ. ಸಂಬಂಧಪಟ್ಟವರಿಗೆ ಸೂಚನೆ ನೀಡಿ, ನೀರಿನ ಸಮಸ್ಯೆ ಬಗೆಹರಿಸಬೇಕು ಎಂದು ಒತ್ತಾಯಿಸಿದರು.

ಆದರ್ಶ ಕಾಲೋನಿಯಲ್ಲಿ ನೀರುಗಂಟಿ ಸಾರ್ವಜನಿಕರ ಮನವಿಗೆ ಸ್ಪಂದಿಸುತ್ತಿಲ್ಲ. ಇಲ್ಲಿ ನೀರು ಬಿಡುವ ವಿಷಯದಲ್ಲಿ ತಾರತಮ್ಯ ಧೋರಣೆ ಅನುಸರಿಸಲಾಗುತ್ತಿದೆ. ಇದೇ ವ್ಯಕ್ತಿ ಇಲ್ಲಿ ನಿರ್ಮಾಣವಾಗುತ್ತಿರುವ ಮನೆಗಳಿಗೆ ನೇರ ಸಂಪರ್ಕದಿಂದ ನೀರು ಕೊಡುವ ಕೆಲಸವೂ ನಡೆಯುತ್ತಿದೆ. ಅವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕೆಂದು ಸಮಿತಿ ಆಗ್ರಹಿಸಿದೆ.

ಈ ಸಂದರ್ಭ ಸಮಿತಿ ಅಧ್ಯಕ್ಷ ಕೆ.ನಾಗರಾಜ್‌, ಪ್ರಧಾನ ಕಾರ್ಯದರ್ಶಿ ವೀರೇಶ್‌ ಚಿತ್ರರಗಿ, ಪ್ರಮುಖರಾದ ಕೃಷ್ಣಪ್ಪ, ಬಿ.ಟಿ.ಪ್ರಶಾಂತ್‌, ಕರಿಬಸಪ್ಪ, ರಮೇಶ್‌, ವೆಂಕಟೇಶ್‌, ಎಚ್‌.ಕೆ.ಕುಮಾರ್‌, ಕೃಷ್ಣಮೂರ್ತಿ, ನಿರಂಜನಮೂರ್ತಿ ಮತ್ತಿತರರು ಇದ್ದರು.