ಜಿಲ್ಲೆ ಜನರಿಗೆ ಮೊದಲು ನೀರು ಕೊಡಿ

ಶಿಕಾರಿಪುರ: ಶರಾವತಿ ನದಿ ನೀರನ್ನು ಬೆಂಗಳೂರಿಗೆ ಹರಿಸುವುದಕ್ಕೂ ಮೊದಲು ಜಿಲ್ಲೆಯ ಜನರಿಗೆ ಕುಡಿಯುವ ನೀರನ್ನು ಪೂರೈಸಿ ಎಂದು ತೊಗರ್ಸಿ ಮಳೆಹಿರೇಮಠದ ಶ್ರೀಮಹಾಂತ ದೇಶೀಕೇಂದ್ರ ಸ್ವಾಮೀಜಿ ಹೇಳಿದರು.

ಪಟ್ಟಣದಲ್ಲಿ ವೀರಶೈವ ಮಹಾಸಭಾ ಸೋಮವಾರ ಆಯೋಜಿಸಿದ್ದ ಪ್ರತಿಭಟನಾ ಸಭೆಯಲ್ಲಿ ಅವರು ಮಾತನಾಡಿ, ಶರಾವತಿ ನೀರು ಯೋಜನೆಗೆ ಸಾವಿರಾರು ಕೋಟಿ ರೂ. ಒದಗಿಸುವ ಬದಲು ಜಿಲ್ಲೆಯ ಕೃಷಿ ಚಟುವಟಿಕೆಗೆ ನೀರು ಹರಿಸಿ ಎಂದರು.

ವಿರಕ್ತಮಠದ ಶ್ರೀಚನ್ನಬಸವ ಸ್ವಾಮೀಜಿ ಮಾತನಾಡಿ, ಬೆಂಗಳೂರಿಗೆ ನೀರು ತೆಗೆದುಕೊಂಡು ಹೋಗುವುದಕ್ಕೆ ನಾವು ಬಿಡುವುದಿಲ್ಲ. ಅವೈಜ್ಞಾನಿಕ ಯೋಜನೆ ಜಾರಿಗೆ ಮುಂದಾಗಿರುವುದು ಸರಿಯಲ್ಲ ಎಂದು ಹೇಳಿದರು.

ತಾಲೂಕು ವೀರಶೈವ ಸಮಾಜ ಅಧ್ಯಕ್ಷ ಎನ್‌.ವಿ. ಈರೇಶ್‌ ಮಾತನಾಡಿ, ತಾಲೂಕಿನಲ್ಲಿ ಈಗಾಗಲೆ ಬಿತ್ತನೆ ಪೂರ್ಣಗೊಳ್ಳಬೇಕಿತ್ತು. ಆದರೆ, ಈವರೆಗೆ ಮಳೆ ಬಾರದೆ ರೈತರು ಕಂಗಾಲಾಗಿದ್ದಾರೆ. ಸರಕಾರ ಮನಸ್ಸು ಮಾಡಿದರೆ ಈಗಲೆ ಶರಾವತಿ ನದಿ ನೀರು ತಾಲೂಕಿನ ಕೆರೆ ಕಟ್ಟೆಗೆ ಹರಿಸಬಹುದು. ಅದನ್ನು ಮೊದಲು ಮಾಡಿರಿ ಎಂದರು.

ಸಭೆಗೂ ಮುನ್ನ ಪಟ್ಟಣದ ಅಕ್ಕಮಹಾದೇವಿ ವೃತ್ತದಿಂದ ತಹಸೀಲ್ದಾರ್‌ ಕಚೇರಿವರೆಗೆ ಪ್ರತಿಭಟನಾ ಮೆರವಣಿಗೆ ನಡೆಸಿ, ತಹಸೀಲ್ದಾರ್‌ಗೆ ಮನವಿ ಸಲ್ಲಿಸಲಾಯಿತು.

ಸಾಲೂರು ಹಿರೇಮಠದ ಶ್ರೀಗುರುಲಿಂಗ ಜಂಗಮ ಸ್ವಾಮೀಜಿ , ದಿಂಡದಹಳ್ಳಿ ಪಶುಪತಿ ಶಿವಾಚಾರ‍್ಯ ಸ್ವಾಮೀಜಿ, ಕಾಳೇನಹಳ್ಳಿ ಶ್ರೀರೇವಣಸಿದ್ದ ಸ್ವಾಮೀಜಿ , ಅಂಬಾರಗೊಪ್ಪ ಶೇಖರಪ್ಪ, ಉಳ್ಳಿದರ್ಶನ್‌, ರವೀಂದ್ರ, ರೇಣುಕಯ್ಯ, ಕುಮಾರಸ್ವಾಮಿ, ಕಾಂಚನಾಕುಮಾರ್‌, ರವೀಂದ್ರ, ಶಶಿಧರ್‌ ಚುರ್ಚಿಗುಂಡಿ, ಅಶ್ವಿನ್‌ ಪಾಟೀಲ್‌, ರೇಣುಕಸ್ವಾಮಿ, ಎಬಿವಿಪಿ ಮುಖಂಡ ಬೆಣ್ಣೆ ಪ್ರವೀಣ್‌, ಬೇಗೂರು ಶಿವಪ್ಪ ಸೇರಿದಂತೆ ವೀರಶೈವ ಮಹಾಸಭಾ ಪದಾಧಿಕಾರಿಗಳು ಪಾಲ್ಗೊಂಡಿದ್ದರು.