ಪರಿಸರ ಸಂರಕ್ಷಿಸಿದರೆ ವಿಕೋಪ ದೂರ

ಸಾಗರ: ಮಲೆನಾಡು ಭಾಗ ಅಪಾರ ಪ್ರಮಾಣದಲ್ಲಿ ಪರಿಸರ ನಾಶಕ್ಕೆ ತುತ್ತಾಗುತ್ತಿದೆ ಎಂದು ಉಪವಿಭಾಗಾಧಿಕಾರಿ ದರ್ಶನ್‌ ಹೇಳಿದರು.

ಇಲ್ಲಿನ ಬಿ.ಹೆಚ್‌. ರಸ್ತೆಯಲ್ಲಿರುವ ತಾಯಿ ಮಗು ಸಾರ್ವಜನಿಕ ಸರಕಾರಿ ಆಸ್ಪತ್ರೆ ಆವರಣದಲ್ಲಿ ಪರಿಸರ ದಿನಾಚರಣೆ ಅಂಗವಾಗಿ ಸಾಮಾಜಿಕ ಅರಣ್ಯ ಇಲಾಖೆ ವತಿಯಿಂದ ಬುಧವಾರ ಗಿಡ ನೆಡುವ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಅವರು ಮಾತನಾಡಿ, ಇಲ್ಲಿನ 31 ವಾರ್ಡಗಳಲ್ಲೂ ಗಿಡಗಳನ್ನು ನೆಟ್ಟು ಗ್ರೀನ್‌ ಸಿಟಿಯಾಗಿ ಮಾಡುವ ಯತ್ನಕ್ಕೆ ಎಲ್ಲರ ಸಹಕಾರ ಅಗತ್ಯ ಎಂದರು.

ಪರಿಸರ ಇದ್ದರೆ ಮಾತ್ರ ಮಾನವ ಬದುಕಲು ಸಾಧ್ಯ. ಆದರೆ ಪರಿಸರ ಬೆಳೆಸಲು ನಮ್ಮ ಯೋಚನೆ, ಕಾರ‍್ಯ ಸಾಗುತ್ತಿಲ್ಲ. ಈ ಬಗ್ಗೆ ದೊಡ್ಡ ಮಟ್ಟದ ಜನಜಾಗೃತಿಯೇ ಆಗಬೇಕಾಗಿದೆ. ಪ್ರತಿ ಊರಿನಲ್ಲೂ ಪರಿಸರವನ್ನು ಬೆಳೆಸಿ, ಸಂರಕ್ಷಿಸಿದರೆ ಪ್ರಕೃತಿ ವಿಕೋಪಗಳು ಇಲ್ಲವಾಗುತ್ತದೆ ಎಂದರು. ಸಾಮಾಜಿಕ ಅರಣ್ಯ ಇಲಾಖೆ ಅಧಿಕಾರಿಗಳು, ನಗರಸಭೆ ಸಿಬ್ಬಂದಿ, ತಾಯಿ ಮಗು ಆಸ್ಪತ್ರೆ ವೈದ್ಯರು ಹಾಗೂ ಸಿಬ್ಬಂದಿ ಇದ್ದರು. ಶೈಲೇಶ್‌ ನಿರೂಪಿಸಿದರು.