‘ಪರಿಸರ ಮಹತ್ವ ಅರಿಯದಿದ್ದರೆ ಗಂಡಾಂತರ’

ತೀರ್ಥಹಳ್ಳಿ: ಪರಿಸರ ಕಾಳಜಿ ಇಲ್ಲದವರಿಂದ ನಿರಂತರವಾಗಿ ಭೂ ತಾಯಿ ಮೇಲೆ ನಿರಂತರ ಶೋಷಣೆ ನಡೆಯುತ್ತದೆ. ಪರಿಸರ ನಾಶ ಹೆಚ್ಚಾದರೆ ಜೀವ ಜಗತ್ತು ಉಳಿಯಲು ಸಾಧ್ಯವಿಲ್ಲ ಎಂದು ಜಲತಜ್ಞ ಚಕ್ರವಾಕ ಸುಬ್ರಮಣ್ಯ ಅಭಿಪ್ರಾಯಪಟ್ಟರು.

ಶುಕ್ರವಾರ ತಾಲೂಕಿನ ಗುಡ್ಡೇಕೇರಿ ಸರಕಾರಿ ಪ್ರೌಢಶಾಲೆಯಲ್ಲಿ ನಡೆದ ಪರಿಸರ ನಡೆ ಕಾರ‍್ಯಕ್ರಮ ಉದ್ದೇಶಿಸಿ ಅವರು ಮಾತನಾಡಿದರು.

ಸ್ವಾರ್ಥಕೋಸ್ಕರ ಭೂತಾಯಿ ಬದುಕು ಹಾಳು ಮಾಡುವ ಜನರಿಂದ ಪರಿಸರ ಶೋಷಣೆ ಹೆಚ್ಚಾಗಿದೆ. ಜನಪ್ರತಿನಿಧಿಗಳು, ಜನರು ಪರಿಸರ ಸಂರಕ್ಷಣೆಗೆ ಮಹತ್ವ ಅರಿಯದಿದ್ದರೆ ಗಂಡಾಂತರ ದಿನಗಳು ಎದುರಿಸಬೇಕಾಗುತ್ತದೆ ಎಂದರು. ಪರಿಸರ ನಾಶ ಕೃತ್ಯಗಳಿಂದಾಗಿ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತಿದೆ. ಪ್ರಕೃತಿ ನಾಶದಿಂದ ಭೂಮಿಯಲ್ಲಿ ಜಲಕೊರತೆ ಉಂಟಾಗುವ ಅಪಾಯ ಹೆಚ್ಚಿದೆ. ನೈಜ ಕಾಳಜಿ ಬೆಳೆಸಿಕೊಂಡರೆ ಮಾತ್ರ ಪರಿಸರ ಉಳಿಯಲು ಸಾಧ್ಯ ಎಂದರು.

ವಿದ್ಯಾರ್ಥಿಗಳಿಗೆ ಪರಿಸರ ಜಾಗೃತಿ ಕುರಿತು ರಸಪ್ರಶ್ನೆ, ಸಂಗೀತ ಕಾರ‍್ಯಕ್ರಮ ನಡೆಯಿತು. ಮುಖ್ಯ ಶಿಕ್ಷಕ ಮಂಜುಬಾಬು ವಿದ್ರ್ಯಾಥಿಗಳಿಗೆ ಬಹುಮಾನ ನೀಡಿದರು. ಎಸ್‌ಡಿಎಂಸಿ ಅಧ್ಯಕ್ಷ ಅಶೋಕ, ರುದ್ರಾಚಾರಿ ಮತ್ತಿತರರು ಇದ್ದರು. ವಿದ್ಯಾರ್ಥಿಗಳಾದ ಶಿಫಾನ್‌ ಸ್ವಾಗತಿಸಿ, ಆಶ್ವೀಜ ನಿರೂಪಿಸಿ, ಸನತ್‌ ವಂದಿಸಿದರು.