ಅಕ್ರಮ ಗೊಬ್ಬರ ದಾಸ್ತಾನು ದಂಡ

ಹೊಳೆಹೊನ್ನೂರು: ಪಟ್ಟಣ ನೃಪತುಂಗ ವೃತ್ತ ಸಮೀಪ ಇರುವ ಕೋರಮಂಡಲ್‌ ಇಂಟರ್‌ ನ್ಯಾಷನಲ್‌ ಲಿ., ಕಂಪನಿಯ ಗ್ರೋಮೋರ್‌ ಅಂಡಿಯವರು ಅಕ್ರಮವಾಗಿ ಗೊಬ್ಬರ ದಾಸ್ತಾನು ಮಾಡಿದ್ದಾರೆ ಎಂದು ಸ್ಥಳೀಯ ಗ್ರಾ.ಪಂ. ಸದಸ್ಯ ಅನಿಲ್‌ಕುಮಾರ್‌ ಗುರುವಾರ ದೂರಿದ್ದಾರೆ.

ಗ್ರೋಮೋರ್‌ ಅಂಗಡಿಗೆ ಒಂದು ಲಾರಿ ಲೋಡ್‌ ಗೊಬ್ಬರ ಬಂದಿದೆ. ಈ ಬಗ್ಗೆ ಅನುಮಾನಗೊಂಡು ಅನಿಲ್‌ಕುಮಾರ್‌ ಅವರು ಬಿಲ್‌ ಹಾಗೂ ಸಂಬಂಧಪಟ್ಟ ದಾಖಲೆ ಕೇಳಿದ್ದಾರೆ. ಆದರೆ ಅಂಗಡಿಯವರು ಈ ಸಂಬಂಧ ಸರಿಯಾದ ಬಿಲ್‌ ನೀಡಿಲ್ಲ. ಈ ಸಂದರ್ಭ ಸ್ಥಳಕ್ಕೆ ಆಗಮಿಸಿದ ವಾಣಿಜ್ಯ ತೆರಿಗೆ ಅಧಿಕಾರಿಗಳು ದಾಖಲೆ ಪರಿಶೀಲಿಸಿದ್ದಾರೆ. ಆದರೆ ಲಾರಿ ಲೋಡ್‌ ಬೆಂಗಳೂರಿಗೆ ಎಂದು ಇ-ವೇ ಬಿಲ್‌ ಆಗಿದ್ದು ಬೆಂಗಳೂರಿಗೆ ಹೋಗಬೇಕಿದ್ದ ಲೋಡ್‌ ಹೊಳೆಹೊನ್ನೂರಿನಲ್ಲಿ ಅನ್‌ಲೋಡ್‌ ಮಾಡಲಾಗುತ್ತಿರುವುದನ್ನು ಖಚಿತ ಪಡಿಸಿಕೊಂಡ ವಾಣಿಜ್ಯ ತೆರಿಗೆ ಅಧಿಕಾರಿ ಎ.ವಿ.ರವಿಕುಮಾರ್‌ ಅವರು ಜಿಎಸ್‌ಟಿ ನಿಯಮಾನುಸಾರ ಸುಮಾರು 41 ಸಾವಿರ ರೂ.ದಂಡ ವಿಧಿಸಲಾಗಿದೆ ಎಂದು ಪತ್ರಿಕೆಗೆ ತಿಳಿಸಿದ್ದಾರೆ.