‘ಶೋಕಿಯ ಚಟ ಚಟ್ಟಕ್ಕೆ ಆಹ್ವಾನ ’

ಶಿಕಾರಿಪುರ: ಸಿಗರೇಟು ಮತ್ತಿತರ ತಂಬಾಕು ಉತ್ಪನ್ನಗಳ ಸೇವನೆ ಕುತೂಹಲಕ್ಕೆ ಆರಂಭವಾಗಿ ನಂತರದಲ್ಲಿ ಯುವಪೀಳಿಗೆ ದಾಸರಾಗಿ ಬಲಿಯಾಗುತ್ತಿದೆ. ಪ್ರತಿ ಸಿಗರೇಟು ಸೇವನೆಯಿಂದ 11 ನಿಮಿಷ ಆಯಸ್ಸು ಕ್ಷೀಣಿಸಲಿದೆ ಎಂದು ಇಲ್ಲಿನ ಜೆಎಮ್‌ಎಫ್‌ಸಿ ನ್ಯಾಯಾಲಯದ ಪ್ರಧಾನ ವ್ಯವಹಾರ ನ್ಯಾಯಾಧೀಶ ಟಿ.ಎಲ್‌. ಸಂದೀಶ್‌ ಹೇಳಿದರು.

ಶುಕ್ರವಾರ ಪಟ್ಟಣದ ಸರಕಾರಿ ಪದವಿಪೂರ್ವ ಕಾಲೇಜಲ್ಲಿ ತಾಲೂಕು ಕಾನೂನು ಸೇವಾ ಪ್ರಾಧಿಕಾರ, ತಾಲೂಕು ಆರೋಗ್ಯಾಧಿಕಾರಿಗಳ ಕಚೇರಿ, ಸಾರ್ವಜನಿಕ ಆಸ್ಪತ್ರೆ, ನಾಗರೀಕ ಸಹಾಯವಾಣಿ ಕೇಂದ್ರ, ಉದ್ಭವ್‌ ಶೈಕ್ಷಣಿಕ ಮತ್ತು ಗ್ರಾಮೀಣಾಭಿವೃದ್ಧಿ ಸಂಸ್ಥೆ, ತಾ.ವಕೀಲರ ಸಂಘದಿಂದ ಏರ್ಪಡಿಸಿದ್ದ ವಿಶ್ವ ತಂಬಾಕು ರಹಿತ ದಿನಾಚರಣೆ ಉದ್ಘಾಟಿಸಿ ಅವರು ಮಾತನಾಡಿದರು.

ಯುವ ಪೀಳಿಗೆಯು ಕುತೂಹಲಕ್ಕೆ ಸಿಗರೇಟ್‌ ಮತ್ತಿತರ ತಂಬಾಕು ಉತ್ಪನ್ನಗಳ ಚಟ ಅಂಟಿಸಿಕೊಳ್ಳುತ್ತಿದೆ. ಶೋಕಿಗಾಗಿ ಆರಂಭವಾದ ಚಟ ನಂತರದಲ್ಲಿ ಚಟ್ಟಕ್ಕೆ ತೆರಳುವವರೆಗೂ ಬಿಡುವುದಿಲ್ಲ. ಕಡಿಮೆ ವಯಸ್ಸಿನಲ್ಲಿ ಜೀವನ ಅಂತ್ಯಗೊಳಿಸುತ್ತದೆ ಎಂದು ಎಚ್ಚರಿಸಿದರು.

ಸಾರ್ವಜನಿಕ ಸ್ಥಳದಲ್ಲಿ ಸಿಗರೇಟ್‌ ಸೇವನೆಗೆ 5 ಸಾವಿರ ರೂ.ದಂಡ, 14 ವಯೋಮಿತಿಯೊಳಗಿನ ಮಕ್ಕಳಿಗೆ ಮಾರಾಟ ಮಾಡಿದಲ್ಲಿ ಜೈಲು ಶಿಕ್ಷೆ ಮತ್ತಿತರ ಕಠಿಣ ಕಾನೂನು ಕ್ರಮವನ್ನು ಎದುರಿಸಬೇಕಾಗಲಿದೆ ಎಂದು ಎಚ್ಚರಿಸಿದರು.

ಕಾಲೇಜು ಪ್ರಾಚಾರ್ಯ ನಾಗರಾಜಪ್ಪ ಅಧ್ಯಕ್ಷತೆ ವಹಿಸಿ ಮಾತನಾಡಿದರು. ಹೆಚ್ಚುವರಿ ಸಿವಿಲ್‌ ನ್ಯಾಯಾಧೀಶ ಎಂ.ವಿ ಮಾದೇಶ, ಸರಕಾರಿ ಸಾರ್ವಜನಿಕ ಆಸ್ಪತ್ರೆ ಆಡಳಿತ ವೈದ್ಯಾಧಿಕಾರಿ ಡಾ.ಶ್ರೀನಿವಾಸ್‌, ರೇಡಿಯಾಲಜಿಸ್ಟ್‌ ಡಾ.ಶಿವಾನಂದ್‌, ಸ್ತ್ರೀ ರೋಗ ತಜ್ಞೆ ಡಾ.ಲಕ್ಷ್ಮಿ, ಡಾ.ಅನಿಲ್‌ಕುಮಾರ್‌, ವಕೀಲರ ಸಂಘದ ಅಧ್ಯಕ್ಷ ಕೋಡ್ಯಪ್ಪ,

ನಾಗರೀಕ ಸಹಾಯವಾಣಿ ವ್ಯವಸ್ಥಾಪಕ ಮಂಜಪ್ಪ ಮತ್ತಿತರರು ಇದ್ದರು. ಜಾನಕಿ, ಭಾಗ್ಯ ಪ್ರಾರ್ಥಿಸಿ, ಹರೀಶ್‌ ವಂದಿಸಿದರು.

-------
ಮಾದಕ ವ್ಯಸನಿಗಳ ಸಂಖ್ಯೆ ದಿನೇ ದಿನೇ ಹೆಚ್ಚಾಗುತ್ತಿದೆ. ರಾಜ್ಯ ಈ ದಿಸೆಯಲ್ಲಿ ಅತಿ ಹೆಚ್ಚು ವ್ಯಸನಿಗಳನ್ನು ಹೊಂದಿ ಪ್ರಥಮ ಸ್ಥಾನದಲ್ಲಿದೆ.
- ಡಾ.ಮಂಜುನಾಥ್‌ ನಾಗಲೀಕರ್‌ , ಶಿಕಾರಿಪುರ ತಾ.ವೈದ್ಯಾಧಿಕಾರಿ