Shimoga By Election Results Live: ರಾಘವೇಂದ್ರ ಕೊರಳಿಗೆ ಗೆಲುವಿನ ಮಾಲೆ

ಶಿವಮೊಗ್ಗ: ಶಿವಮೊಗ್ಗದಲ್ಲಿ ಬಿಜೆಪಿ ಅಭ್ಯರ್ಥಿ ಬಿ.ವೈ.ರಾಘವೇಂದ್ರ ಗೆಲುವು ಸಾಧಿಸಿದ್ದಾರೆ. ಜೆಡಿಎಸ್ ಅಭ್ಯರ್ಥಿ ಮಧು ಬಂಗಾರಪ್ಪ ವಿರುದ್ಧ 52148 ಮತಗಳಿಂದ ಗೆಲುವು ಸಾಧಿಸಿದ್ದಾರೆ ಬಿ.ವೈ.ರಾಘವೇಂದ್ರ. ರಾಘವೇಂದ್ರ ಅವರಿಗೆ ದೊರೆತ ಮತ 543306. ಜೆಡಿಎಸ್ ಅಭ್ಯರ್ಥಿಗೆ ದೊರೆತ ಮತ 491158.

ಜೆಡಿಯು ಅಭ್ಯರ್ಥಿ ಮಹಿಮಾಪಟೇಲ್ ಪಡೆದ ಮತಗಳು 8713. ಸ್ವತಂತ್ರ ಅಭ್ಯರ್ಥಿ ಶಶಿಕುಮಾರ್‌ಪಡೆದ ಮತಗಳು 17189. ನೋಟಾ ಮತಗಳ ಸಂಖ್ಯೆ 10687. ಮತದಾರ ಯಾರ ಬಿಜೆಪಿ ಕೈ ಹಿಡಿದಿದ್ದು ಮುಂದಿನ ನಾಲ್ಕೂವರೆ ತಿಂಗಳಿಗೆ ಲೋಕಸಭೆಯಲ್ಲಿ ಶಿವಮೊಗ್ಗ ಕ್ಷೇತ್ರವನ್ನು ಬಿ.ವೈ.ರಾಘವೇಂದ್ರ ಅವರು ಪ್ರತಿನಿಧಿಸಲಿದ್ದಾರೆ.


ಸಹ್ಯಾದ್ರಿ ಕಲಾ ಕಾಲೇಜು ಆವರಣದಲ್ಲಿ ಮತ ಎಣಿಕೆ ನಡೆಯುತ್ತಿದೆ. ಬೆಳಗ್ಗೆ 8ಗಂಟೆಗೆ ಎಲ್ಲ 8ಕ್ಷೇತ್ರಗಳ ಮತ ಏಣಿಕೆ ಏಕಕಾಲಕ್ಕೆ ಆರಂಭವಾಗಿದೆ. ಪ್ರತಿ ವಿಧಾನಸಭೆ ಕ್ಷೇತ್ರದ ಮತ ಎಣಿಕೆಯು ಎರಡು ಕೊಠಡಿಗಳಲ್ಲಿ ನಡೆಯುತ್ತಿದ್ದು, ಪ್ರತಿ ಕೊಠಡಿಯಲ್ಲಿ ತಲಾ 7 ಟೇಬಲ್‌ಗಳನ್ನು ಸಜ್ಜುಗೊಳಿಸಲಾಗಿದೆ. ಅಂದರೆ 16 ಕೊಠಡಿಗಳಲ್ಲಿ 112 ಟೇಬಲ್‌ಗಳಿವೆ. ಪ್ರತಿ ಟೇಬಲ್‌ನಲ್ಲಿ ಮೈಕ್ರೋ ಅಬ್ಸರ್ವರ್‌ ಸೇರಿದಂತೆ ಒಟ್ಟು 3 ಮಂದಿ ಸಿಬ್ಬಂದಿ ಮತ ಎಣಿಕೆ ಕಾರ್ಯ ಕೈಗೊಳ್ಳಲಿದ್ದಾರೆ. ಪ್ರತಿ ವಿಧಾನಸಭೆ ಕ್ಷೇತ್ರಕ್ಕೆ ತಲಾ 42 ಮತ ಎಣಿಕೆ ಸಿಬ್ಬಂದಿಯಂತೆ ಒಟ್ಟು 336 ಸಿಬ್ಬಂದಿ ನೇರವಾಗಿ ಎಣಿಕೆ ಕಾರ್ಯದಲ್ಲಿ ಭಾಗಿಯಾಗಿದ್ದಾರೆ ಎಂದು ಜಿಲ್ಲಾಧಿಕಾರಿ ಕೆ.ಎ.ದಯಾನಂದ್‌ ಅವರು ಮಾಹಿತಿ ನೀಡಿದ್ದಾರೆ.