‘ಶಿವಾಜಿ ಜೀವನ ಚರಿತ್ರೆ ಅರಿಯಿರಿ’

ಶಿಕಾರಿಪುರ: ಬ್ರಿಟಿಷರ ವಿರುದ್ಧ ಅಪ್ರತಿಮ ಹೋರಾಟ, ವಿಭಿನ್ನ ಯುದ್ಧಕಲೆ, ಸಂಘಟನಾ ಚತುರತೆ, ಆದರ್ಶ ದೇಶ ಪ್ರೇಮದ ಮೂಲಕ ಇಂದಿಗೂ ನಮ್ಮೆಲ್ಲರಿಗೆ ಆದರ್ಶಪ್ರಾಯ ಆಗಿರುವ ಶಿವಾಜಿ ಜೀವನ ಚರಿತ್ರೆಯನ್ನು ಪ್ರತಿಯೊಬ್ಬರೂ ಅರಿಯುವುದು ಅಗತ್ಯ ಎಂದು ಉಪನ್ಯಾಸಕ ಆದರ್ಶ ಗೋಖಲೆ ಹೇಳಿದರು.

ಪಟ್ಟಣದಲ್ಲಿ ಮರಾಠ ಸಮಾಜ ಭಾನುವಾರ ಆಯೋಜಿಸಿದ್ದ ಶಿವಾಜಿ ಜಯಂತಿಯಲ್ಲಿ ಅವರು ಮಾತನಾಡಿದರು. ತಾಯಿ ಜೀಜಾಬಾಯಿ ಶಿವಾಜಿಗೆ ಯುದ್ಧ ಕಲೆ ಕಲಿಸಿದ್ದಳು, ಎಂತಹ ಕಷ್ಟ ಎದುರಾದರೂ ಅದನ್ನು ತಾಳ್ಮೆಯಿಂದ ಎದುರಿಸುವ ಕಲೆ ಆತ ಹೊಂದಿದ್ದ. ಇಡೀ ದೇಶದಲ್ಲಿ ಬ್ರಿಟಿಷರು, ಮೊಘಲರು ಆಳ್ವಿಕೆ ನಡೆಸುತ್ತಿದ್ದ ಕಾಲದಲ್ಲಿ ಸ್ವರಾಜ್ಯದ ಕಲ್ಪನೆ ಕಂಡಿದ್ದ ಶಿವಾಜಿ 16ನೇ ವಯಸ್ಸಿನಲ್ಲೇ ಹೋರಾಟ ಮನೋಭಾವ ಇಟ್ಟುಕೊಂಡಿದ್ದ. ಆತನ ಜೀವನ ಚರಿತ್ರೆಯನ್ನು ಪ್ರತಿಯೊಬ್ಬ ಯುವಕ ಅರಿಯಬೇಕೆಂದರು.

ಪುರಸಭೆ ಸದಸ್ಯ ಹುಲ್ಮಾರ್‌ ಮಹೇಶ್‌ ಮಾತನಾಡಿ, ಮರಾಠ ಸಮಾಜ ಸ್ವಾಭಿಮಾನಿ. ಎಂದಿಗೂ ತಮ್ಮ ಮೇಲೆ ದಬ್ಬಾಳಿಕೆ ಮಾಡುವುದನ್ನು ಸಹಿಸುವುದಿಲ್ಲ. ಅದು ರಕ್ತಗತವಾಗಿ ಬಂದಿದೆ. ಪಟ್ಟಣದಲ್ಲಿರುವ ಸಮಾಜದ ಎಲ್ಲರೂ ಶ್ರಮ ಜೀವಿಗಳು, ದೇಶ ಪ್ರೇಮಿಗಳು. ಅವರ ಎಲ್ಲ ಕಷ್ಟ ಸುಖಗಳಲ್ಲಿ ಸ್ಪಂದಿಸುವುದಾಗಿ ಭರವಸೆ ನೀಡಿದರು.

ಶಿವಗಿರಿ ಮರಾಠ ಸಮಾಜ ಅಧ್ಯಕ್ಷ ಮಾದೋಜಿರಾವ್‌ ಮಾತನಾಡಿ, ತಾಲೂಕಾದ್ಯಂತ ಇರುವ ಮರಾಠ ಸಮಾಜ ಬಾಂಧವರು ಸೌಹಾರ್ದ ಮನೋಭಾವ ಹೊಂದಿದ್ದು ನಾಡು ಕಟ್ಟುವಲ್ಲಿ ತಮ್ಮದೇ ಕೊಡುಗೆ ನೀಡಿದ್ದಾರೆ. ದೇಶ, ಸಮಾಜದ ಪರವಾಗಿ ತಮ್ಮ ಮನಸ್ಥಿತಿ ಹೊಂದಿದ್ದಾರೆ. ಎಂದಿಗೂ ಶಾಂತಿಪ್ರಿಯರಾಗಿದ್ದಾರೆ. ಪಟ್ಟಣದಲ್ಲಿ ಸಮಾಜದ ದೇವಸ್ಥಾನ ನಿರ್ಮಿಸುತ್ತಿದ್ದು, ಇದಕ್ಕೆ ಎಲ್ಲರೂ ಸಹಕಾರ ನೀಡಬೇಕೆಂದು ಮನವಿ ಮಾಡಿದರು. ಸಭೆಗೂ ಮುನ್ನ ಶಿವಾಜಿ ಪ್ರತಿಮೆಯ ಮೆರವಣಿಗೆ ಪಟ್ಟಣದ ಪ್ರಮುಖ ಬೀದಿಗಳಲ್ಲಿ ನಡೆಯಿತು. ಮುಖಂಡರಾದ ಭವಾನಿರಾವ್‌, ಕೋನಿಯೋಜಿರಾವ್‌, ಶಿವಗಿರಿ ಚಾರಿಟಬಲ್‌ ಟ್ರಸ್ಟ್‌ ಅಧ್ಯಕ್ಷ ಎಸ್‌.ಕುಮಾರ್‌, ಕಿಟ್ಟದಹಳ್ಳಿ ದಯಾನಂದ, ಧರ್ಮೋಜಿರಾವ್‌, ನಮ್ಮ ಕರ್ನಾಟಕ ರಕ್ಷ ಣಾ ವೇದಿಕೆ ರಾಜ್ಯಾಧ್ಯಕ್ಷ ಜಯರಾಜ್‌ನಾಯ್ಡು, ಮಂಜೋಜಿರಾವ್‌ ಸೇರಿದಂತೆ ಸಮಾಜ ಬಾಂಧವರು ಪಾಲ್ಗೊಂಡಿದ್ದರು.