ಕುಮಾರಸ್ವಾಮಿಗೂ #MeToo ನಲ್ಲಿ ಸಿಕ್ಕಿ ಬೀಳೋ ಆತಂಕ: ಕುಮಾರ್ ಬಂಗಾರಪ್ಪ

ಸೊರಬ: ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರು #Metoo ಅಭಿಯಾನದಲ್ಲಿ ಸಿಕ್ಕಿಬೀಳುವ ಸಾಧ್ಯತೆ ಇದೆ ಎನ್ನುವ ಮೂಲಕ ಸೊರಬ ಕ್ಷೇತ್ರದ ಬಿಜೆಪಿ ಶಾಸಕ ಕುಮಾರ್ ಬಂಗಾರಪ್ಪ ಹೊಸ ಬಾಂಬ್ ಸಿಡಿಸಿದ್ದಾರೆ.

ಕುಮಾರಸ್ವಾಮಿ ಅವರು ನಮ್ಮ ವೈಯಕ್ತಿಕ ವಿಚಾರವನ್ನು ಕೆದಕುತಿದ್ದಾರೆ. ಸಾಕ್ಷಿ ಇಲ್ಲದೆ ಆರೋಪಿಸುತ್ತಿದ್ದಾರೆ. ಆದರೆ, ಅವರ ಬಗ್ಗೆ ಸಾಕ್ಷಿಗಳಿವೆ. ಸಾಮಾಜಿಕ ಜಾಲತಾಣಗಳಲ್ಲಿ ಫೋಟೋಗಳು ಕಾಣಿಸುತ್ತಿವೆ. ಅವರು ರಾಧಿಕಾ ಜನ್ಮದಿನಕ್ಕೆ ಹೋದ ಸಾಕ್ಷಿಗಳಿವೆ. ‌ ಅವರ ವಿರುದ್ಧವೇ ಮೀಟೂ ಆರೋಪ ಕೇಳಿಬರುವ ಸಾಧ್ಯತೆ ಇದೆ ಎಂದು ಅವರು ಎಚ್ಚರಿಸಿದರು.

ಕುಮಾರಸ್ವಾಮಿ ಅವರು ರಾಧಿಕಾ ಅವರನ್ನು ಸಾರ್ವಜನಿಕವಾಗಿ ಕರೆದುಕೊಂಡು ಬರುತ್ತಿಲ್ಲವೇಕೆ? ತಮ್ಮ ಕುಟುಂಬದವರನ್ನು ಜಿಲ್ಲಾ ಪಂಚಾಯತ್ ಸದಸ್ಯರನ್ನಾಗಿ ಮಾಡುತ್ತಾರೆ. ರಾಮನಗರದಲ್ಲಿ ಪಕ್ಷದಿಂದ ಟಿಕೆಟ್ ನೀಡುತ್ತಾರೆ. ರಾಧಿಕಾ ಅವರಿಗೂ ಚುನಾವಣೆಯಲ್ಲಿ ಸ್ಪರ್ಧಿಸಲು ಅವಕಾಶ ನೀಡಬಹುದಿತ್ತಲ್ಲವೇ? ಅವಕಾಶ ನೀಡಿಲ್ಲವೆಂದರೆ ಇದುವರೆಗೆ ಅವರನ್ನು ಕುಟುಂಬದ ಸದಸ್ಯರಾಗಿ ಸ್ವೀಕರಿಸಿಲ್ಲವೇ ಎಂದು ಅವರು ಪ್ರಶ್ನಿಸಿದರು.

ಸೊರಬದಲ್ಲಿ ಲೋಕಸಭೆ ಉಪ ಚುನಾವಣೆ ಪ್ರಚಾರಕ್ಕಾಗಿ ಬಂದಿರುವ ಕುಮಾರಸ್ವಾಮಿ ಅವರು ಮೈತ್ರಿಕೂಟದ ಅಭ್ಯರ್ಥಿ ಮಧು ಬಂಗಾರಪ್ಪ ಪರ ಪ್ರಚಾರ ಮಾಡಲಿ. ಅದನ್ನು ಬಿಟ್ಟು ಕೌಟುಂಬಿಕ ವಿಷಯಗಳ ಟೀಕೆ ಟಿಪ್ಪಣೆ ಮಾಡುವುದು ಬಿಡಲಿ ಎಂದವರು ಖಾರವಾಗಿ ನುಡಿದಿದ್ದಾರೆ.