ಕುವೆಂಪು ವಿವಿ ವೆಬ್‌ಸೈಟ್‌ನಲ್ಲಿ ‘ಪಾಕಿಸ್ತಾನ್‌ ಜಿಂದಾಬಾದ್‌’!

ಆತೀಶ್‌ ಬಿ. ಕನ್ನಾಳೆ

ಶಿವಮೊಗ್ಗ: ದೇಶದ ಗೃಹ ಇಲಾಖೆ ಸೇರಿದಂತೆ ಸರಕಾರದ ನಾನಾ ಮಾಹಿತಿಗಳನ್ನು ಕಳವು ಮಾಡುವುದಕ್ಕಾಗಿ ನಿಗದಿತ ವೆಬ್‌ಸೈಟ್‌ನ್ನೇ ಹ್ಯಾಕ್‌ ಮಾಡಿರುವ ಹಲವು ಉದಾಹರಣೆಗಳಿವೆ. ಆದರೆ, ಕುವೆಂಪು ವಿಶ್ವವಿದ್ಯಾಲಯದ ಅಧಿಕೃತ ವೆಬ್‌ಸೈಟ್‌ನ್ನು ಸೋಮವಾರ ಹ್ಯಾಕ್‌ ಮಾಡಿ, 'ಪಾಕಿಸ್ತಾನ್‌ ಜಿಂದಾಬಾದ್‌' ಎಂಬ ಘೋಷಣೆ ಹಾಕಿರುವುದು ಅಚ್ಚರಿ ಮೂಡಿಸಿದೆ.

ವಿಶ್ವಮಾನವತಾವಾದ ಸಾರಿದ್ದ 'ಕುವೆಂಪು' ಅವರ ಚಿತ್ರ ರಾರಾಜಿಸುತ್ತಿದ್ದ ವೆಬ್‌ಸೈಟ್‌ನಲ್ಲಿ ದಿಢೀರ್‌ ಆಗಿ ಪಾಕಿಸ್ತಾನ ಪರ ಘೋಷಣೆ ವಿವಿ ಆಡಳಿತ ಮಂಡಳಿ ಅಚ್ಚರಿಗೀಡಾಗುವಂತೆ ಮಾಡಿದೆ.

ಹ್ಯಾಕ್‌ ಹಾಕಿದ್ದ ವಿವಿ ವೆಬ್‌ಸೈಟಿನ ಮುಖಪುಟದಲ್ಲಿ 'ಹಂಟರ್‌ ಬಜ್ವಾ' ಎಂಬ ಹೆಸರಿದ್ದು, ಇದು ಸಂಘಟನೆಯೋ ಅಥವಾ ವ್ಯಕ್ತಿಯ ಹೆಸರೋ ಎಂಬುದು ನಿಗೂಢವಾಗಿಯೇ ಉಳಿದಿದೆ. ಈ ವಿಷಯ ಇಷ್ಟಕ್ಕೆ ನಿಲ್ಲದೇ, ವೆಬ್‌ಸೈಟ್‌ನ ಭದ್ರತೆ ತೃಣದಂತಿರುವುದಾಗಿ ಹ್ಯಾಕರ್‌ ಅಣಕು ಮಾಡಿದ್ದಾರೆ.

ರಾಜ್ಯದಲ್ಲಿ ಇದೇ ಮೊದಲಲ್ಲ:

ರಾಜ್ಯದಲ್ಲಿ ಈ ಮೊದಲೂ ವಿಶ್ವವಿದ್ಯಾಲಯಗಳ ವೆಬ್‌ಸೈಟ್‌ ಹ್ಯಾಕ್‌ ಮಾಡಲಾಗಿದೆ. ಇತ್ತೀಚೆಗಷ್ಟೇ ಹುಬ್ಬಳ್ಳಿಯ ಕಾನೂನು ವಿವಿ ವೆಬ್‌ಸೈಟ್‌ ಅನ್ನು 'ಮಿಯಾನ್‌ ಉಮೇರ್‌ ಎಕ್ಸ್‌4' ಎಂಬ ಹೆಸರಿನಲ್ಲಿ ಹ್ಯಾಕ್‌ ಮಾಡಿ 'ಜಸ್ಟಿಸ್‌ ಫಾರ್‌ ಆಸೀಫಾ' ಎಂದು ವೆಬ್‌ಪೇಜ್‌ ಮೇಲೆ ಬರೆಯಲಾಗಿತ್ತು. ಅದೇ ರೀತಿಯಲ್ಲಿ ಒಮ್ಮೆ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯದ ವೆಬ್‌ಸೈಟ್‌ ಕೂಡ ಹ್ಯಾಕ್‌ ಮಾಡಲಾಗಿತ್ತು. ಈಗ ಶಿವಮೊಗ್ಗದ ಕುವೆಂಪು ವಿವಿ ವೆಬ್‌ಸೈಟ್‌ ಹ್ಯಾಕ್‌ ಆಗಿದೆ.

ಇನ್‌ಹೌಸ್‌ ಎಂಕ್ವಾಯರಿ:

ರಾತ್ರಿ ಇಡೀ ವಿಶ್ವವಿದ್ಯಾಲಯದ ವೆಬ್‌ಸೈಟ್‌ ಸರಿಯಾಗಿಯೇ ಇತ್ತು. ಆದರೆ, ಬೆಳಗ್ಗೆ 10ಕ್ಕೆ ಬಂದು ನೋಡಿದಾಗ ಕಪ್ಪು ಬಣ್ಣದ ಪರದೆ ಗೋಚರಿಸಿದ್ದು ಅದರ ಮೇಲೆ 'ಪಾಕಿಸ್ತಾನ್‌ ಜಿಂದಾಬಾದ್‌' ಎಂದು ಬರೆಯಲಾಗಿದೆ. ತಕ್ಷಣ ಈ ಕುರಿತು ಪೊಲೀಸರಿಗೆ ದೂರು ನೀಡಲಾಗಿದೆ ಎಂದು ಪ್ರೊ.ಜೋಗನ್‌ ಶಂಕರ್‌ ಅವರು 'ವಿಜಯ ಕರ್ನಾಟಕ'ಕ್ಕೆ ತಿಳಿಸಿದ್ದಾರೆ.

'ವಿವಿಯ ಯಾವುದೇ ಮಾಹಿತಿ ನಷ್ಟವಾಗಿಲ್ಲ. ನಾನಾ ಕಡೆಗಳಿಂದ ವಿದ್ಯಾರ್ಥಿಗಳು ವೆಬ್‌ಸೈಟ್‌ ಗಮನಿಸುತ್ತಾರೆ. ಅವರಿಗೆ ಅಡ್ಮಿಷನ್‌, ಸುತ್ತೋಲೆ, ಅಧಿಸೂಚನೆ ಮತ್ತಿತರ ವಿಷಯಗಳ ಬಗ್ಗೆ ತಪ್ಪು ಮಾಹಿತಿ ರವಾನೆ ಆಗಬಾರದು ಎಂಬ ಉದ್ದೇಶದಿಂದ ಕೂಲಂಕಶವಾಗಿ ಪರಿಶೀಲಿಸಲಾಗುತ್ತಿದೆ. ವೆಬ್‌ಸೈಟ್‌ ಮುಂದೆಂದೂ ಹ್ಯಾಕ್‌ ಆಗದ ಹಾಗೆ ಯಾವ ರೀತಿ ತಾಂತ್ರಿಕ ಮುನ್ನೆಚ್ಚರಿಕೆ ವಹಿಸಬೇಕೆನ್ನುವ ನಿಟ್ಟಿನಲ್ಲಿ 'ಇನ್‌ಹೌಸ್‌ ಎಂಕ್ವಾಯರಿ' ಮಾಡಲಾಗುವುದು' ಎಂದು ಹೇಳಿದ್ದಾರೆ.

ಏನೆಂದು ಬರೆಯಲಾಗಿದೆ?

ಪ್ರತಿಷ್ಠಿತ ಕುವೆಂಪು ವಿವಿಯ (www.Kuvempu.ac.in) ವೆಬ್‌ಸೈಟ್‌ ಹ್ಯಾಕ್‌ ಮಾಡಲಾಗಿದ್ದು, ಅದರಲ್ಲಿ 'ಪಾಕಿಸ್ತಾನ್‌ ಜಿಂದಾಬಾದ್‌' ಎಂಬ ಘೋಷಣೆ ಇದೆ. ಸ್ಕ್ರೀನ್‌ ಮೇಲೆ 'ಸೆಕ್ಯುರಿಟಿ ಇಸ್‌ ಜಸ್ಟ್‌ ಎ ಫ್ಯಾಂಟಸಿ', 'ಇಟ್ಸ್‌ ಬೆಟರ್‌ ಟು ಹ್ಯಾವ್‌ ಎ ಗುಡ್‌ ಸೆಕ್ಯುರಿಟಿ' ಎಂದು ಅಣಕು ಮಾಡಲಾಗಿದೆ.