ಶಿವಮೊಗ್ಗ: ನಗರದ ನವುಲೆ ಕರೆ ಪ್ರಕರಣ ಈಗ ಉದ್ವಿಗ್ನಗೊಂಡಿದ್ದು, ನಾಗರಿಕ ಹಿತರಕ್ಷಣಾ ವೇದಿಕೆಯ ಚಿತ್ತ ಕೆರೆ ಉಳಿಸುವ ಕಡೆಯಾದರೆ, ಇತ್ತ ಅಧಿಕಾರಿಗಳ ಚಿತ್ತ ಹೋರಾಟವನ್ನು ಹತ್ತಿಕ್ಕುವ ಹಾಗೂ ಪರಿಸರಾಸಕ್ತರನ್ನು ಯಾಮಾರಿಸುವತ್ತ ಎಂಬಂತಾಗಿದೆ ಎಂದು ಪರಿಸರಾಸಕ್ತ ನಾಗರಿಕ ನಾಗರಾಜ್‌ ಶೆಟ್ಟರ್‌ ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
'ನಾ' ಮೇಲು 'ತಾ' ಮೇಲು ಎಂಬ ಈ ಜಿದ್ದಾ ಜಿದ್ದಿಗೆ ಬಿದ್ದಿರುವ ವೇದಿಕೆ ಮತ್ತು ಅಧಿಕಾರಿಗಳ ಸಮಬಲದ ಹೋರಾಟದಿಂದ ಈ ಸಮಸ್ಯೆ ಇನ್ನಷ್ಟು ಬಿಗಡಾಯಿಸಿದೆ. ಕೆರೆ ಮುಚ್ಚಿ ರಸ್ತೆ ಮಾಡುವ ಬದಲು ಅಗತ್ಯವಿರುವಷ್ಟು ಕಾಂಕ್ರಿಟ್‌ ಪಿಲ್ಲರ್‌ ಬಳಸಿ ಸೇತುವೆ ರೀತಿಯಲ್ಲಿ ರಸ್ತೆ ಮಾಡಿ ಎಂಬುದು ವೇದಿಕೆ ಆಗ್ರಹವಾಗಿದ್ದರೆ, ಇದು ಸಾಧ್ಯವಿಲ್ಲ ಎಂಬ ನಿಲುವು ಅಧಿಕಾರಿಗಳದ್ದಾಗಿದೆ.
ಶಿವಮೊಗ್ಗ ಸ್ಮಾರ್ಟ್‌ ಸಿಟಿ ಆಗುತ್ತಿರುವ ಸಂದರ್ಭ ಮೂಲ ಸೌಕರ್ಯ ಹಾಗೂ ನಗರದ ಸೌಂದರ್ಯ ಎರಡನ್ನೂ ಗಣನೆಯಲ್ಲಿಟ್ಟುಕೊಂಡು ಯೋಜನೆ ರೂಪಿಸಬೇಕಾದ ಹೊಣೆಗಾರಿಕೆ ಅಧಿಕಾರಿಗಳ ಮೇಲಿದೆ. ಇರುವ ಕೆರೆಯನ್ನು ಕಳೆದುಕೊಳ್ಳದೆ ಹೈಟೆಕ್‌ ಟಚ್‌ ಮೂಲಕ ಅಭಿವೃದ್ಧಿ ಪಡಿಸುವತ್ತ ಚಿಂತನೆ ನಡೆಯಬೇಕಿದೆ. ಅತ್ತ ಕೆರೆಯೂ ಉಳಿಯಬೇಕು, ಇತ್ತ ರಸ್ತೆಯೂ ಆಗಬೇಕು ಎಂದರೆ ಮೇಲ್‌ ಸೇತುವೆ ನಿರ್ಮಿಸಿದರೆ ಕೆರೆಯ ಸೌಂದರ್ಯವೂ ಹೆಚ್ಚುತ್ತದೆ. ತಿರುವೂ ಕಡಿಮೆಯಾಗುತ್ತದೆ. ಈ ನಿಟ್ಟಿನಲ್ಲಿ ಅಧಿಕಾರಿಗಳು ದೃಢ ನಿರ್ಧಾರ ಕೈಗೊಳ್ಳಬೇಕಿದೆ ಎಂದು ಅವರು ತಿಳಿಸಿದ್ದಾರೆ.