ಯೋಜನೆ ವಿರೋಧಿಸಿ ವಕೀಲರ ಪ್ರತಿಭಟನೆ

ಸಾಗರ: ತಾಲೂಕಿನ ಶರಾವತಿ ನದಿಯ ನೀರನ್ನು ಬೆಂಗಳೂರಿಗೆ ಸರಬರಾಜು ಮಾಡುವ ಯೋಜನೆ ವಿರೋಧಿಸಿ ಸೋಮವಾರ ವಕೀಲರ ಸಂಘದಿಂದ ಪ್ರತಿಭಟನಾ ಮೆರವಣಿಗೆ ನಡೆಸಿ, ಉಪವಿಭಾಗಾಧಿಕಾರಿ ಮೂಲಕ ರಾಜ್ಯ ಸರಕಾರಕ್ಕೆ ಮನವಿ ಸಲ್ಲಿಸಲಾಯಿತು.

ಪ್ರತಿಭಟನೆ ಉದ್ದೇಶಿಸಿ ಸಂಘದ ಅಧ್ಯಕ್ಷ ರವೀಶ್‌ ಕುಮಾರ್‌ ಮಾತನಾಡಿ, ರಾಜ್ಯ ಸರಕಾರದ ಈ ನಿರ್ಧಾರ ಅತ್ಯಂತ ಅವೈಜ್ಞಾನಿಕವಾಗಿದೆ. ಬೆಂಗಳೂರಿನಲ್ಲಿರುವ ಕೆರೆಕಟ್ಟೆಗಳನ್ನು ನಾಶಮಾಡಿ, ಐಷಾರಾಮಿ ಕಟ್ಟಡ ನಿರ್ಮಿಸಲಾಗಿದೆ. ಕೆರೆಗಳ ಪುನಶ್ಚೇತನ ಬಿಟ್ಟು ಶರಾವತಿ ನದಿ ನೀರಿನ ಮೇಲೆ ಕಣ್ಣು ಹಾಕಿರುವುದು ಖಂಡನೀಯ. ಯೋಜನೆಯ ಹಿಂದೆ ಕಮಿಷನ್‌ ಮಾಫಿಯಾ ಅಡಗಿದೆ ಎಂದು ಆರೋಪಿಸಿದರು.

ಹಿರಿಯ ವಕೀಲ ಎಂ.ರಾಘವೇಂದ್ರ ಮಾತನಾಡಿ, ಈ ಭಾಗದ ಜನರ ಮುಳುಗಡೆ ಗೋಳನ್ನು ಪರಿಹರಿಸದ ಸರಕಾರ, ಯಾವ ಮಾನದಂಡ ಆಧರಿಸಿ ಬೆಂಗಳೂರಿಗೆ ನೀರು ಒಯ್ಯಬಹುದು ಎಂದು ಚಿಂತನೆ ನಡೆಸಿದೆ ಎನ್ನುವುದನ್ನು ಸ್ಪಷ್ಟಪಡಿಸಬೇಕು. ಸಮುದ್ರಕ್ಕೆ ಸೇರಿ ವ್ಯರ್ಥವಾಗುವ ನೀರನ್ನು ಒಯ್ಯುತ್ತೇವೆ ಎಂಬ ಬಾಲಿಶ ಹೇಳಿಕೆ ನೀಡಲಾಗುತ್ತಿದೆ. ಅಸಾಧ್ಯವಾದ ಯೋಜನೆ ತಕ್ಷ ಣ ಕೈಬಿಡಬೇಕು ಎಂದು ಆಗ್ರಹಿಸಿದರು.

ಸಂಘದ ಕಾರ್ಯದರ್ಶಿ ಕೆ.ಎಚ್‌. ರಮೇಶ್‌ , ನವೀನಕುಮಾರ್‌, ಮರಿದಾಸ್‌, ಕೆ.ವಿ.ಪ್ರವೀಣಕುಮಾರ್‌, ಕೆ.ಎಲ್‌.ಭೋಜರಾಜ್‌, ನಾಗವೇಣಿ, ಜ್ಯೋತಿ, ಮಹಮದ್‌ ಜಕ್ರಿಯಾ, ಈ.ನಾಗರಾಜ್‌, ರಾಮಸ್ವಾಮಿ, ಆರೀಫ್‌ ಅಲಿಖಾನ್‌, ತ್ಯಾಗರಾಜ್‌, ಕೃಷ್ಣ, ಖಂಡಿಕಾ ಸೂರ್ಯನಾರಾಯಣ ಮತ್ತಿತರರು ಹಾಜರಿದ್ದರು.