ರಾಮಮಂದಿರ ನಿರ್ಮಾಣಕ್ಕೆ ಮುಂದಾಗಲಿ: ಮುತಾಲಿಕ್‌

ಸೊರಬ: ಪ್ರಧಾನಿ ನರೇಂದ್ರ ಮೋದಿ ಅವರು ಶ್ರೀರಾಮ ಮಂದಿರ ನಿರ್ಮಾಣಕ್ಕೆ ಸುಗ್ರೀವಾಜ್ಞೆ ತಂದು ರಾಮಮಂದಿರ ನಿರ್ಮಾಣ ಮಾಡಬೇಕು. ಮತ್ತೊಮ್ಮೆ ಪ್ರಧಾನಿಯಾಗಬೇಕೆಂದು ಶ್ರೀರಾಮ ಸೇನೆ ರಾಷ್ಟ್ರಾಧ್ಯಕ್ಷ ಪ್ರಮೋದ ಮುತಾಲಿಕ್‌ ಹೇಳಿದರು.

ಪಟ್ಟಣದ ಮಾರ್ಕೇಟ್‌ ರಸ್ತೆಯಲ್ಲಿರುವ ನಿವೃತ್ತ ಶಿಕ್ಷ ಕ ಜಗದೀಶ್‌ ಗೋಖಲೆ ಅವರ ಮನೆಯಲ್ಲಿ ಗುರುವಾರ ಸೀತಾ ಜಗದೀಶ್‌ ಗೋಖಲೆ ದಂಪತಿಯನ್ನು ಸನ್ಮಾನಿಸಿ ಅವರು ಮಾತನಾಡಿದರು.

ಮೂವತ್ತು ವರ್ಷದಿಂದಲೂ ಶ್ರೀರಾಮ ಮಂದಿರ ನಿರ್ಮಾಣದ ಆಂದೋಲನ ಮಾಡಿಕೊಂಡು ಬರುತ್ತಿದ್ದೇವೆ. ಈಗ ಆಂದೋಲನದ ಅವಶ್ಯವಿಲ್ಲ. ನರೇಂದ್ರ ಮೋದಿಯವರ ಅವಶ್ಯಕತೆ ದೇಶಕ್ಕೂ ಇದೆ. ಅದರ ಜತೆಗೆ ರಾಮ ಮಂದಿರ ನಿರ್ಮಿಸಬೇಕಾಗಿದೆ ಎಂದರು.

ಸಾರ್ವತ್ರಿಕ ಲೋಕಸಭಾ ಚುನಾವಣೆಯ ಮೊದಲು ಕೇಂದ್ರ ಸರಕಾರ ರಾಮಮಂದಿರ ನಿರ್ಮಾಣಕ್ಕೆ ಮುಂದಾಗಬೇಕು. ಈ ಹಿಂದೆ ಅಟಲ್‌ ಬಿಹಾರಿ ವಾಜಪೇಯಿ ಅವರನ್ನು ಸಹ ರಾಮಮಂದಿರ ನಿರ್ಮಾಣ ಹಾಗೂ ಅಭಿವೃದ್ಧಿ ದೃಷ್ಟಿಯಿಂದ ಪ್ರಧಾನಿಯಾಗಿ ಮಾಡಲಾಗಿತ್ತು. ಆದರೆ ಅವರು ಪ್ರಧಾನಿಯಾದ ನಂತರ ರಾಮ ಮಂದಿರ ನಿರ್ಮಾಣಕ್ಕೆ ಮುಂದಾಗದಿದ್ದರಿಂದ ಅವರು ಅಧಿಕಾರದಿಂದ ಕೆಳಗಿಳಿಯಬೇಕಾಯಿತು ಎಂದರು. ನಿವೃತ್ತ ಶಿಕ್ಷ ಕ ಜಗದೀಶ್‌ಗೋಖಲೆ, ಬ್ರಾಹ್ಮಣ ಸಭಾ ಸೊರಬ ತಾಲೂಕು ಅಧ್ಯಕ್ಷ ಸೀತಾರಾಮಯ್ಯ ಕಟ್ಟಿನಕೆರೆ ಮಾತನಾಡಿದರು. ಬ್ರಾಹ್ಮಣ ಮಹಾಸಭಾದ ರಾಜ್ಯ ವಕ್ತಾರ ಮ.ಸಾ. ನಂಜುಂಡಸ್ವಾಮಿ, ಶ್ರೀಧರ್‌ ಹೊಸಬಾಳೆ, ಜಗದೀಶ್‌ ಗೋಖಲೆ, ಲಲಿತಮ್ಮ, ಜಗದೀಶ್‌ ಗೋಖಲೆ, ಹೇಮರಾಜ ಪಾಟೀಲ್‌ ಇದ್ದರು.