ಅಕ್ರಮ ಮರಳು ಗಣಿಗಾರಿಕೆ ವಿರುದ್ಧ ಡಿಸಿಗೆ ಪತ್ರ

ತೀರ್ಥಹಳ್ಳಿ: ನದಿ ಪಾತ್ರದಲ್ಲಿ ಅಧಿಕೃತವಾಗಿ ಗುರುತಿಸಿ ಗುತ್ತಿಗೆ ನೀಡಲಾದ ಪ್ರದೇಶದ ಪಕ್ಕದಲ್ಲಿ ಅಕ್ರಮವಾಗಿ ಮರಳು ಸಾಗಿಸಲಾಗಿದೆ. ಆಳ ಗಣಿಗಾರಿಕೆ ನಡೆಸಲಾಗಿದ್ದು ಪರಿಸರ ನಾಶ ಕೃತ್ಯ ನಡೆದಿದೆ. ಅಕ್ರಮ ಗಣಿಗಾರಿಕೆ ವಿರುದ್ಧ ಕಠಿಣ ಕಾನೂನು ಕ್ರಮ ತೆಗೆದುಕೊಳ್ಳಬೇಕು ಎಂದು ಆಗ್ರಹಿಸಿ ಶಾಸಕ ಆರಗ ಜ್ಞಾನೇಂದ್ರ ಬುಧವಾರ ಜಿಲ್ಲಾಧಿಕಾರಿಗೆ ಪತ್ರ ಬರೆದಿದ್ದಾರೆ.

ತಾಲೂಕಿನಲ್ಲಿ ಸರಕಾರಿ ಕ್ವಾರೆಗೆ ಸೇರದ ಪ್ರದೇಶದಲ್ಲಿ ಅಕ್ರಮವಾಗಿ ಮರಳು ಸಾಗಣೆ ಆದ ಕುರಿತು ಯಾವುದೇ ಕಾನೂನು ಕ್ರಮ ಜರುಗಿಲ್ಲ. ಗುತ್ತಿಗೆ ಪ್ರದೇಶದ ಬಳಿ ಅನಧಿಕೃತವಾಗಿ ಮರಳು ಸಾಗಣೆಗೊಂಡು ನದಿ ಪ್ರದೇಶಕ್ಕೆ ಹಾನಿಯಾಗಿದೆ. ತಕ್ಷಣ ಜಂಟಿ ಸರ್ವೆ ನಡೆಸಿ ಅಕ್ರಮ ಗುರುತಿಸಿ ಗುತ್ತಿಗೆದಾರರ ವಿರುದ್ಧ ಕಾನೂನು ಕ್ರಮ ಜರುಗಿಸಬೇಕು ಎಂದು ಪತ್ರದಲ್ಲಿ ಆಗ್ರಹಿಸಿದ್ದಾರೆ.

ಮರಳು ಹೆಚ್ಚು ದರಕ್ಕೆ ಮಾರಾಟವಾದ ಕುರಿತು ಸಾಕ್ಷ್ಯ ಸಮೇತ ಗಮನಕ್ಕೆ ತರಲಾಗಿದೆ. ಶಾಸಕರು, ಜಿಲ್ಲಾಧಿಕಾರಿ ಗಮನಕ್ಕೆ ಬರುವಂತೆ ಅಕ್ರಮ ನಡೆಯುತ್ತಿದ್ದರೂ ತಡೆಯಲಾಗದೆ ಅಸಹಾಯಕರಂತಿರುವುದು ಸಮಂಜಸವಲ್ಲ ಎಂದಿದ್ದಾರೆ.