ಕಾಳಜಿಕೇಂದ್ರಕ್ಕೆ ಮಣಿವಣ್ಣನ್‌ ಭೇಟಿ, ಪರಿಶೀಲನೆ

ಭದ್ರಾವತಿ: ನಗರದ ಅಪ್ಪರ್‌ ಹುತ್ತಾದ ಕೆಂಪೇಗೌಡ ಸಮುದಾಯ ಭವನದಲ್ಲಿ ನೆರೆ ಸಂತ್ರಸ್ತರಿಗಾಗಿ ತಾತ್ಕಾಲಿಕವಾಗಿ ನಿರ್ಮಿಸಿರುವ ಕಾಳಜಿ ಕೇಂದ್ರಕ್ಕೆ ಜಿಲ್ಲಾ ಉಸ್ತುವಾರಿ ಕಾರ‍್ಯದರ್ಶಿ ಮಣಿವಣ್ಣನ್‌ ಭೇಟಿ ನೀಡಿ ಪರಿಶೀಲಿಸಿದರು.

ಕವಲುಗುಂದಿ ಪ್ರದೇಶದಲ್ಲಿ 5ಮನೆಗಳಿಗೆ ಕಾಲುವೆ ನೀರು ನುಗ್ಗಿ ಜಲಾವೃತಗೊಂಡ ಹಿನ್ನೆಲೆಯಲ್ಲಿ ಅಲ್ಲಿನ ಸಂತ್ರಸ್ತರನ್ನು ಕಾಳಜಿಕೇಂದ್ರಕ್ಕೆ ಸ್ಥಳಾಂತರಿಸಲಾಗಿತ್ತು. ಕೇಂದ್ರದಲ್ಲಿ ಮಕ್ಕಳಾದಿಯಾಗಿ ಸುಮಾರು 50 ಮಂದಿ ಆಶ್ರಯ ಪಡೆಯುತ್ತಿದ್ದಾರೆ. ನಗರಸಭೆ ಆಡಳಿತ ಹಾಗೂ ತಾಲೂಕು ಆಡಳಿತ ಜಂಟಿಯಾಗಿ ಸಮರೋಪಾದಿಯಲ್ಲಿ ಅಲ್ಲಿನ ನಿರಾಶ್ರಿತರಿಗೆ ಊಟ, ತಿಂಡಿ ಹಾಗೂ ಪರಿಕರ ವಿತರಿಸಲು ಕಾರ‍್ಯಪ್ರವೃತ್ತರಾಗಿದ್ದರು. ತಾಲೂಕು ದಂಡಾಧಿಕಾರಿ ಸೋಮಶೇಖರ್‌, ನಗರಸಭಾ ಪೌರಾಯುಕ್ತ ಮನೋಹರ್‌, ಕಂದಾಯಾಧಿಕಾರಿ ಪ್ರಶಾಂತ್‌, ನಗರಸಭೆ ಕಂದಾಯಾಧಿಕಾರಿ ರಾಜಕುಮಾರ್‌, ಸಂಘಟನಾಧಿಕಾರಿ ಸುಹಾಸಿನಿ, ಈಶ್ವರಪ್ಪ ಸೇರಿದಂತೆ ಸಿಬ್ಬಂದಿ ಪಾಲ್ಗೊಂಡಿದ್ದರು. ಇದೇ ಸಂದರ್ಭ ಅಜ್ಜಂಪುರದ ಉಪನ್ಯಾಸಕರಾದ ರಾಘವೇಂದ್ರ, ಕೇಶವ, ಪ್ರಕಾಶ್‌ ಇತರರು ನಿರಾಶ್ರಿತರಿಗೆ ಚಾಪೆ ಮುಂತಾದವುಗಳನ್ನು ವಿತರಿಸಿದರು. ಡಾ.ಕವಿತಾ ನೇತೃತ್ವದಲ್ಲಿ ಸಂತ್ರಸ್ತರಿಗೆ ಆರೋಗ್ಯ ತಪಾಸಣೆ ಮಾಡಲಾಯಿತು.