ನಿಫಾ ಶಂಕೆ: ರಕ್ತ ಮಾದರಿ ಸಂಗ್ರಹ

ಸಾಗರ : ತಾಲೂಕಿನ ಸಿರಿವಂತೆ ಗ್ರಾಮದ ಕಾರೇಮನೆ ವಾಸಿ ಮಿಥುನ್‌ ಅವರಿಗೆ ನಿಫಾ ವೈರಸ್‌ ತಗುಲಿರುವ ಶಂಕೆ ಹಿನ್ನೆಲೆಯಲ್ಲಿ ಅವರ ರಕ್ತ ಮಾದರಿಯನ್ನು ವೈದ್ಯಕೀಯ ಪರೀಕ್ಷೆಗೆ ಕಳಿಸಲಾಗಿದೆ.

ಯುವಕ ಮಿಥುನ್‌ ಅವರು ಈಚೆಗೆ ಕೇರಳಕ್ಕೆ ಹೋಗಿದ್ದು, ಎರಡು ಮೂರು ದಿನದ ಹಿಂದೆ ತಮ್ಮ ಊರಾದ ಕಾರೇಮನೆಗೆ ಮರಳಿದ್ದರು. ಬಳಿಕ ಜ್ವರ ಬಂದಿದ್ದು, ಸಿರಿವಂತೆ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ತಪಾಸಣೆಗೆ ಒಳಗಾಗಿದ್ದರು. ಈ ಸಂದರ್ಭ ಕೇರಳಕ್ಕೆ ಹೋಗಿ ಬಂದ ವಿಷಯವನ್ನು ಮಿಥುನ್‌ ವೈದ್ಯರ ಬಳಿ ತಿಳಿಸಿದ್ದು, ಬಳಿಕ ಹೆಚ್ಚಿನ ನಿಗಾ ವಹಿಸಲಾಗಿದೆ. ಮಿಥುನ್‌ ಅವರ ರಕ್ತದ ಮಾದರಿಯನ್ನು ಮಹಾರಾಷ್ಟ್ರದ ಪುಣೆಯಲ್ಲಿರುವ ವೈದ್ಯಕೀಯ ಪ್ರಯೋಗಾಲಯಕ್ಕೆ ಕಳಿಸಲಾಗಿದೆ. ಫಲಿತಾಂಶ ಶುಕ್ರವಾರ ಸಂಜೆ ಗೊತ್ತಾಗಲಿದ್ದು, ಆ ಬಳಿಕ ಮಿಥುನ್‌ ಅವರಿಗೆ ನಿಫಾ ಸೋಂಕು ತಗುಲಿದೆಯೋ, ಇಲ್ಲವೋ ಎನ್ನುವುದು ನಿಗದಿಯಾಗಲಿದೆ.

ಡಿಎಚ್‌ಓ ಭೇಟಿ : ಯುವಕ ಮಿಥುನ್‌ಗೆ ನಿಫಾ ಶಂಕೆ ವಿಚಾರ ತಿಳಿದು ಇಲ್ಲಿನ ಉಪವಿಭಾಗೀಯ ಆಸ್ಪತ್ರೆಗೆ ಡಿಎಚ್‌ಒ ಡಾ. ವೆಂಕಟೇಶ್‌ ಗುರುವಾರ ಭೇಟಿ ನೀಡಿದ್ದರು. ಯುವಕನ ಆರೋಗ್ಯ ವಿಚಾರಣೆ ಮಾಡಿದ ಅವರು, ನಿಫಾ ಕಾಯಿಲೆಗೆ ಸಂಬಂಧಪಟ್ಟಂತೆ ಜಿಲ್ಲಾದ್ಯಂತ ಕಟ್ಟೆಚ್ಚರ ವಹಿಸಲಾಗಿದೆ ಎಂದು ತಿಳಿಸಿದರು. ಈ ಸಂದರ್ಭದಲ್ಲಿ ಜಿಲ್ಲಾ ಸರ್ವೇಕ್ಷ ಣಾಧಿಕಾರಿ ಡಾ. ಶಂಕರಪ್ಪ, ತಾಲೂಕು ವೈದ್ಯಾಧಿಕಾರಿ ಡಾ.ಕೆ.ಪಿ.ಅಚ್ಚುತ್‌ ಇನ್ನಿತರರು ಹಾಜರಿದ್ದರು.