ಗ್ರಾಹಕನಿಗೆ 50 ಸಾವಿರ ಪರಿಹಾರಕ್ಕೆ ಆದೇಶ

ಶಿವಮೊಗ್ಗ: ಕಸ ಸಂಗ್ರಹಿಸದೆ ನಿರ್ಲಕ್ಷ್ಯ ಮಾಡಿದ ಮಹಾನಗರ ಪಾಲಿಕೆ 50 ಸಾವಿರ ರೂ. ಪಾವತಿಸುವಂತೆ ಜಿಲ್ಲಾಗ್ರಾಹಕರ ವ್ಯಾಜ್ಯಗಳ ಪರಿಹಾರ ವೇದಿಕೆಯು ಶುಕ್ರವಾರ ಆದೇಶಿಸಿದೆ.

ಸೇವಾ ಶುಲ್ಕ ವಸೂಲಿ ಮಾಡಿದ ಬಳಿಕ ಮನೆಗಳಿಂದ ನಿತ್ಯವೂ ಕಸ ಸಂಗ್ರಹಿಸುವುದು ಪಾಲಿಕೆ ಕರ್ತವ್ಯವಾಗಿದೆ. ಆದರೆ, ಕಸ ಸಂಗ್ರಹಿಸದೆ ಸೇವಾ ನ್ಯೂನತೆ ಎಸಗಿದೆ ಎಂದು ಆಪಾದಿಸಿ ದೂರು ನೀಡಿದ ಗ್ರಾಹಕರಿಗೆ ಜಿಲ್ಲಾಗ್ರಾಹಕರ ವ್ಯಾಜ್ಯಗಳ ಪರಿಹಾರ ವೇದಿಕೆಯು ನ್ಯಾಯ ಒದಗಿಸಿದೆ.

ಮಹಾನಗರ ಪಾಲಿಕೆಯು ಕಸ ವಿಲೇವಾರಿ ಸೇವಾ ಶುಲ್ಕವಾಗಿ ಪ್ರತಿ ನಿವಾಸಿಯಿಂದ ಭಾರಿ ಮೊತ್ತದ ಸೇವಾ ಶುಲ್ಕವನ್ನು ವಸೂಲಿ ಮಾಡುತ್ತಿದೆ. ಕೆಲ ಬಡಾವಣೆಗಳಲ್ಲಿಕಸ ಸಂಗ್ರಹಿಸದಿದ್ದರೂ ಸೇವಾ ಶುಲ್ಕವನ್ನು ವಸೂಲಿ ಮಾಡುತ್ತಿದೆ. ಮಹಾನಗರ ಪಾಲಿಕೆಯ ಇಂತಹ ಕ್ರಮದಿಂದ ಬೇಸತ್ತ ನಿವಾಸಿಯೊಬ್ಬರು ಗ್ರಾಹಕರ ವೇದಿಕೆ ಮೂಲಕ ಅದಕ್ಕೆ ದೊಡ್ಡ ಪೆಟ್ಟು ನೀಡಿದ್ದಾರೆ.

ರಾಜು ಅವರು ಪಾಲಿಕೆಯು ಕಸ ಸಂಗ್ರಹಣೆಯಲ್ಲಿಸೇವಾ ನ್ಯೂನತೆ ಅನುಸರಿಸಿದೆ ಎಂದು ಆಪಾದಿಸಿ ಜಿಲ್ಲಾಗ್ರಾಹಕರ ವ್ಯಾಜ್ಯಗಳ ಪರಿಹಾರ ವೇದಿಕೆಯಲ್ಲಿಮೊಕದ್ದಮೆ ದಾಖಲಿಸಿದ್ದರು. ವೇದಿಕೆಯ ಅಧ್ಯಕ್ಷರಾದ ಸಿ.ಎಂ.ಚಂಚಲ ಮತ್ತು ಸದಸ್ಯೆ ಎಚ್‌.ಮಂಜುಳಾ ಅವರು ನಡೆಸಿದ ವಿಚಾರಣೆಯಲ್ಲಿಪಾಲಿಕೆಯ ಸೇವಾ ನ್ಯೂನತೆ ದೃಢಪಟ್ಟ ಹಿನ್ನೆಲೆಯಲ್ಲಿಗ್ರಾಹಕರಿಗೆ ಪರಿಹಾರವಾಗಿ ಮತ್ತು ಆದ ಮಾನಸಿಕ ಹಿಂಸೆಗಾಗಿ 50 ಸಾವಿರ ರೂ.ಗಳನ್ನು ಆರು ವಾರದೊಳಗೆ ಪರಿಹಾರ ನೀಡಬೇಕು. ತಪ್ಪಿದಲ್ಲಿಶೇ.10 ಬಡ್ಡಿಯಂತೆ ಹಣ ಪಾವತಿ ಮಾಡಬೇಕೆಂದು ಆದೇಶ ನೀಡಿದ್ದಾರೆ.

------------

ಎರಡು ಬಾರಿ ದೂರಿದರೂ ನಿರ್ಲಕ್ಷ್ಯ

ಶಿವಮೊಗ್ಗ ಆಲ್ಕೊಳ ಬಡಾವಣೆ ನಿವಾಸಿ ಡಿ.ರಾಜು ಅವರಿಂದ ಪಾಲಿಕೆಯು ಕಸ ಸಂಗ್ರಹಣ ಶುಲ್ಕವೆಂದು 2016-17, 17-18ರಲ್ಲಿವಾರ್ಷಿಕ 600 ರೂ. ಹಾಗೂ 2019-20ರಲ್ಲಿ1,200 ರೂ. ವಸೂಲಿ ಮಾಡಿತ್ತು. ಆದರೆ, ಕಸವನ್ನು ತೆಗೆದುಕೊಂಡು ಹೋಗುತ್ತಿರಲಿಲ್ಲ. ಇದಕ್ಕೆ ಸಂಬಂಧಿಸಿದಂತೆ ರಾಜು ಅವರು ಪಾಲಿಕೆ ಆಯುಕ್ತರಿಗೆ ಕಳೆದ ಏಪ್ರಿಲ್‌ 18 ಮತ್ತು ಆಗಸ್ಟ್‌ 27ರಂದು ಎರಡು ಬಾರಿ ದೂರು ನೀಡಿದ್ದರು. ಆದರೆ, ಆಯುಕ್ತರು ಇದಕ್ಕೆ ಯಾವುದೇ ಕ್ರಮ ಕೈಗೊಂಡಿರಲಿಲ್ಲ. ಕಸವನ್ನೂ ಸಂಗ್ರಹಿಸಿರಲಿಲ್ಲ.