ಅದಿರು ಸಾಗಿಸುತ್ತಿದ್ದ ಲಾರಿ ಪಲ್ಟಿ: ಚಾಲಕನಿಗೆ ಗಾಯ

ಹೊಸನಗರ: ಅದಿರು ಸಾಗಿಸುತ್ತಿದ್ದ ಬೃಹತ್‌ ಲಾರಿಯೊಂದು ಚಾಲಕನ ನಿಯಂತ್ರಣ ತಪ್ಪಿ ರಸ್ತೆ ಪಕ್ಕದ ಗದ್ದೆಗೆ ಪಲ್ಟಿ ಹೊಡೆದ ಘಟನೆ ಪಟ್ಟಣದ ಮಾವಿನಕೊಪ್ಪ ಸಮೀಪದ ರಾಣೆಬೆನ್ನೂರು-ಬೈಂದೂರು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಗುರುವಾರ ನಡೆದಿದೆ.

ಅದಿರು ತುಂಬಿದ ಲಾರಿ ಮಂಗಳೂರಿನಿಂದ ಬಳ್ಳಾರಿಗೆ ಸಾಗುತ್ತಿತ್ತು. ರಸ್ತೆ ಬದಿಯಲ್ಲಿ ಬಸ್‌ ಕೆಟ್ಟು ನಿಂತಿದ್ದು, ಕಿರಿದಾದ ಜಾಗದಲ್ಲಿ ಮತ್ತೊಂದು ವಾಹನಕ್ಕೆ ಸೈಡ್‌ ಕೊಡುವ ವೇಳೆ ಅವಘಡ ಸಂಭವಿಸಿದೆ. ಬೃಹತ್‌ ಲಾರಿಯ ಚಕ್ರ ರಸ್ತೆ ಕೆಳಗಿಳಿಯುತ್ತಿದ್ದಂತೆ ಮಣ್ಣು ಕುಸಿತಗೊಂಡು ಲಾರಿ ಸುಮಾರು 12 ಅಡಿ ಆಳದ ಗದ್ದೆಗೆ ಪಲ್ಟಿ ಹೊಡೆದಿದೆ. ಲಾರಿ ಚಾಲಕ ಹೊಸನಗರದ ಮುರಳಿ(32) ಎಂಬುವವರ ಕುತ್ತಿಗೆ ಮತ್ತು ಕಾಲಿಗೆ ತೀವ್ರ ಪೆಟ್ಟಾಗಿದ್ದು, ಶಿವಮೊಗ್ಗದ ಮೆಗ್ಗಾನ್‌ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಹೊಸನಗರ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದಾರೆ.