ಕ್ಷೇತ್ರದಲ್ಲಿ ಸಾವಯವ ರಾಜಕಾರಣ: ಮಹಿಮಾ

ತೀರ್ಥಹಳ್ಳಿ : ಸಾವಯವ ರಾಜಕಾರಣದ ಚಿಂತನೆಯಡಿ ಬದಲಾವಣೆಗೆ ಪ್ರಯತ್ನ ಮಾಡಲಾಗುತ್ತಿದೆ. ಸಕರಾತ್ಮಕ ಆಲೋಚನೆಗಳಿಂದ ರಾಜಕಾರಣವನ್ನು ಕಟ್ಟುವ ಕೆಲಸ ಆಗಬೇಕಿದೆ. ಚುನಾವಣೆಯನ್ನು ವೇದಿಕೆಯನ್ನಾಗಿಸಿಕೊಂಡು ಬದಲಾವಣೆ ರಾಜಕಾರಣದ ಗುರಿ ತಲುಪಲು ಜನರ ಸಹಕಾರ ಬೇಕಿದೆ ಎಂದು ಲೋಕಸಭಾ ಕ್ಷೇತ್ರದ ಜೆಡಿಯು ಅಭ್ಯರ್ಥಿ ಮಹಿಮಾ ಜೆ.ಪಟೇಲ್‌ ಹೇಳಿದರು.

ಪಟ್ಟಣದಲ್ಲಿ ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಅವರು ಮಾತನಾಡಿ, ಪ್ರಸ್ತುತ ರಾಜಕಾರಣದ ಕುರಿತು ಹೆಚ್ಚು ಜನರಲ್ಲಿ, ಮುಖಂಡರಲ್ಲಿ ಬೇಸರವಿದೆ. ಬದ್ಧತೆಯುಳ್ಳ ರಾಜಕಾರಣದ ಅಗತ್ಯವಿದೆ ಎಂಬ ಮನಸಿದೆ. ಹೃದಯಕ್ಕೆ ಬೇಕಾದ ರಾಜಕಾರಣವನ್ನು ಜನರು ಆಯ್ಕೆ ಮಾಡಿಕೊಳ್ಳಬೇಕಿದ್ದು, ಕೆಟ್ಟದನ್ನು ದೂರ ಮಾಡಬೇಕು ಎಂದರು.

ಶಿವಮೊಗ್ಗ ಉಪಚುನಾವಣೆ ಬದಲಾವಣೆ ರಾಜಕಾರಣ ಸಂದೇಶ ರವಾನೆಗೆ ಉತ್ತಮ ವೇದಿಕೆಯಾಗಿದೆ. ಹಣ ಹಾಕಿ ಹಣ ಮಾಡುವ ರಾಜಕಾರಣವನ್ನು ಜನರು ವಿರೋಧಿಸಬೇಕು ಎಂದರು.

ಜೆಡಿಯು ರಾಜ್ಯ ಮುಖಂಡ ತ್ರಿಶೂಲ್‌ಪಾಣಿ ಪಟೇಲ್‌, ಯುವ ವಿಭಾಗದ ರಾಜ್ಯಾಧ್ಯಕ್ಷ ಶಿವರಾಮ್‌, ಮುಖಂಡರಾದ ತೋಟದ್‌, ಎಸ್‌.ಎಸ್‌. ರೆಡ್ಡಿ, ಬೇಹಳ್ಳಿ ನಾಗರಾಜ್‌, ಶಿವರುದ್ರಸ್ವಾಮಿ, ಪ್ರಶಾಂತ್‌, ರವಿಕಿಶನ್‌ ಮತ್ತಿತರರು ಇದ್ದರು. ನಂತರ ಪಟ್ಟಣದ ವಿವಿಧೆಡೆ ಮತಯಾಚಿಸಿದರು.

-----------
ಸುಂಟರಗಾಳಿ, ಬಿರುಗಾಳಿ ರಾಜಕಾರಣದ ನಡುವೆ ತಂಗಾಳಿ ರಾಜಕಾರಣವನ್ನು ಬಯಸಿದ್ದೇನೆ, ದ್ವೇಷ, ಅಸೂಯೆ, ಆಕ್ರೋಶ ರಾಜಕಾರಣದಿಂದ ಒಳಿತು ಸಮಾಜ ಕಟ್ಟಲು ಸಾಧ್ಯವಿಲ್ಲ. ಯಾರನ್ನು ಟೀಕಿಸಲು ಹೋಗುವುದಿಲ್ಲ. ಉತ್ತಮ ವಿಚಾರಗಳನ್ನು ತಿಳಿಸಿ ಅವರನ್ನು ನಮ್ಮ ಕಡೆಗೆ ಬರುವಂತೆ ಮಾಡುವ ಪ್ರಯತ್ನ ಮಾಡಲಾಗುತ್ತದೆ.

-ಮಹಿಮಾ ಜೆ.ಪಟೇಲ್‌