ಅಕ್ಕನ ಗಂಡನ ವಿಷಯಕ್ಕೆ ವಿಷ ಕುಡಿದ ತಂಗಿ

ಶಿವಮೊಗ್ಗ : ಅಕ್ಕನ ಗಂಡನ ವಿಷಯಕ್ಕೆ ಜಗಳವಾಡಿ ದೂರು ದಾಖಲಿಸಲು ಬಂದ ತಂಗಿ ಎಸ್‌ಪಿ ಕಚೇರಿಯಲ್ಲಿಯೇ ವಿಷ ಸೇವಿಸಿದ ಘಟನೆ ನಗರದಲ್ಲಿ ಶುಕ್ರವಾರ ನಡೆದಿದೆ.

ಅಕ್ಕ ಸುಧಾ ಅವರ ಗಂಡ ಸರಕಾರಿ ನೌಕರನಾಗಿದ್ದು, ಈ ಹಿಂದೆ ತುಮಕೂರಿನಲ್ಲಿ ಕೆಲಸ ನಿರ್ವಹಿಸುತ್ತಿದ್ದ ಸಂದರ್ಭದಲ್ಲಿ ಎಸಿಬಿ ಬಲೆಗೆ ಬಿದ್ದಿದ್ದರು. ಇದು ತಂಗಿ ರೇಖಾಗೆ ಇತ್ತೀಚೆಗೆ ತಿಳಿದಿದೆ. ಅಕ್ಕನ ಬಳಿ ಈ ವಿಷಯವಾಗಿ ಮಾತನಾಡಿದ್ದಾಳೆ. ಈ ವೇಳೆ ಇಬ್ಬರ ನಡುವೆ ಜಗಳ ಏರ್ಪಟ್ಟು ಒಂದು ವಾರದ ಹಿಂದೆ ಇಬ್ಬರೂ ಕಿತ್ತಾಡಿಕೊಂಡಿದ್ದರು ಎಂದು ತಿಳಿದು ಬಂದಿದೆ.

ಅಕ್ಕ ಸುಧಾ ತನಗೆ ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದಾಳೆ ಎಂದು ದೂರು ಸಲ್ಲಿಸಲು ಬಂದಿದ್ದ ತಂಗಿ ರೇಖಾ, ಎಸ್‌ಪಿ ಕಚೇರಿಯಲ್ಲಿ ವಿಷ ಸೇವಿಸಿದ್ದಾಳೆ. ಕೂಡಲೇ ಅಕೆಯನ್ನು ಪೊಲೀಸ್‌ ಸಿಬ್ಬಂದಿ ಸಮೀಪದ ಮೆಗ್ಗಾನ್‌ ಆಸ್ಪತ್ರೆಗೆ ದಾಖಲಿಸಿದ್ದಾರೆ.