ಅನುಮಾನಗಳಿಗೆ ಶಂಕರರ ಭಾಷ್ಯದಲ್ಲಿ ಸಮರ್ಥ ಉತ್ತರ

ಶಿವಮೊಗ್ಗ : ಶಂಕರರ ಭಾಷ್ಯದಲ್ಲಿ ನಮ್ಮೆಲ್ಲ ಅನುಮಾನಗಳಿಗೆ ಸಮರ್ಥವಾದ ಉತ್ತರಗಳಿವೆ. ದೇವರು, ಧರ್ಮ ಎಂದರೇನು ಎಂಬ ಜಿಜ್ಞಾಸೆಗಳಿಗೆ ಪರಿಹಾರವಿದೆ ಎಂದು ಶೃಂಗೇರಿ ಜಗದ್ಗುರು ಶ್ರೀ ವಿಧುಶೇಖರ ಭಾರತೀ ಶ್ರೀಗಳು ಹೇಳಿದರು.

ಶ್ರೀ ಶಂಕರ ಜಯಂತಿ ಸಭಾ ವತಿಯಿಂದ ನಗರದ ಬಿ.ಬಿ.ರಸ್ತೆಯ ಲಕ್ಷ್ಮಿನಾರಾಯಣ ದೇವಸ್ಥಾನದಲ್ಲಿ ಶುಕ್ರವಾರ ಹಮ್ಮಿಕೊಂಡಿದ್ದ ಜಗದ್ಗುರು ಶ್ರೀ ಶಂಕರಾಚಾರ್ಯರ ಜಯಂತಿ ಶತಮಾನೋತ್ಸವದಲ್ಲಿ ಸಾನ್ನಿಧ್ಯ ವಹಿಸಿ ಆಶೀರ್ವಚನ ನೀಡಿದರು.

ಕೇವಲ ದೊಡ್ಡ ಯಾಗದ ಮೂಲಕ ಸಮಸ್ಯೆ ಬಗೆಹರಿಯುವುದಿಲ್ಲ. ನಿತ್ಯಾನುಷ್ಠಾನ ಯಾರು ಮಾಡುವುದಿಲ್ಲವೋ ಅವರು ಯಾಗವನ್ನು ಮಾಡಿ ಪ್ರಯೋಜನವಿಲ್ಲ. ಆಡಂಬರದಿಂದ ಅನುಷ್ಠಾನ ಸಾಧ್ಯವಿಲ್ಲ ಎಂದು ತಿಳಿಸಿದರು.

ಉತ್ಸವ ಜನರ ಉತ್ಸವವಾಗಲಿ: ವ್ಯಕ್ತಿಯ ಮನಸ್ಸು ಹೇಗಿರಬೇಕು ಎಂಬುವುದನ್ನು ಶಂಕರರು ನೂರಾರು ವರ್ಷಗಳ ಹಿಂದೆಯೇ ಬೋಧಿಸಿದ್ದಾರೆ. ಸಾಕ್ಷಾತ್ಕಾರಕ್ಕೆ ನಿರ್ಮಲವಾದ ಭಕ್ತಿ ಬೆಳೆಸಿಕೊಳ್ಳಬೇಕಿದೆ. ಶಂಕರರ ಉತ್ಸವಗಳು ಜನರ ಉತ್ಸವವಾಗಿ ರೂಪುಗೊಳ್ಳಬೇಕು ಎಂದು ಸಲಹೆ ನೀಡಿದರು.

ಜಯಂತಿಗಳು ಕೇವಲ ಆಚರಣೆಗೆ ಮಾತ್ರ ಸೀಮಿತವಾಗದೇ ಅವರ ತತ್ವಗಳನ್ನು ಅನುಷ್ಠಾನ ಮಾಡುವ ಮತ್ತು ಆತ್ಮಾವಲೋಕನಕ್ಕೆ ಪೂರಕವಾಗಬೇಕು. ಶಿವಮೊಗ್ಗದ ಶಂಕರ ಜಯಂತಿ ಸಭಾ ಹಲವು ವರ್ಷಗಳಿಂದ ಶಂಕರರ ವಿಚಾರಧಾರೆಯನ್ನು ಪ್ರಚೂರ ಪಡಿಸುತ್ತಾ ಬಂದಿದೆ. ಇದು ಸನಾತನ ಧರ್ಮದ ಕೆಲಸ ಮಾಡುವವರಿಗೆ ಮಾರ್ಗಸೂಚಿಯಾಗಿದೆ ಎಂದರು.