15ರಂದು ತೆರೆಗೆ ‘ಅಮ್ಮ ಐ ಲವ್‌ ಯು’

ಶಿವಮೊಗ್ಗ: ದ್ವಾರಕೀಶ್‌ ಪ್ರೊಡಕ್ಷನ್ಸ್‌ 51ನೇ ಅಮ್ಮ ಐ ಲವ್‌ ಯು ಚಿತ್ರ ಜೂ.15ರಂದು ರಾಜ್ಯಾದ್ಯಂತ 150 ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗುತ್ತಿದೆ ಎಂದು ಚಿತ್ರದ ನಿರ್ದೇಶಕ ಕೆ.ಎಂ.ಚೈತನ್ಯ ಹೇಳಿದರು.

ಸುದ್ದಿಗೋಷ್ಠಿಯಲ್ಲಿ ಬುಧವಾರ ಅವರು ಮಾತನಾಡಿ, ಇದೊಂದು ಕಮರ್ಷಿಯಲ್‌ ಹಾಗೂ ತಾಯಿ ಮಗುವಿನ ಮಹತ್ವ ಸಾರುವ ಚಿತ್ರವಾಗಿದ್ದು, ಕುಟುಂಬ ಸಮೇತರಾಗಿ ನೋಡಬಹುದು ಎಂದರು.

ಚಿತ್ರದ ನಾಯಕ ನಟನಾಗಿ ಚಿರಂಜೀವಿ ಸರ್ಜ, ನಾಯಕಿಯಾಗಿ ನಿಶ್ವಿಕಾ ನಾಯ್ಡು, ತಾಯಿ ಪಾತ್ರದಲ್ಲಿ ನಟಿ ಸಿತಾರಾ ನಟಿಸಿದ್ದಾರೆ. ಗುರುಕಿರಣ್‌ ಸಂಗೀತ ನೀಡಿದ್ದು, 5 ಹಾಡುಗಳು ಚಿತ್ರದಲ್ಲಿವೆ. ಅಮ್ಮನ ಕುರಿತ ಹಾಡು ಈಗಾಗಲೇ ಪ್ರಸಿದ್ಧವಾಗಿದೆ ಎಂದರು.

ದ್ವಾರಕೀಶ್‌ ಚಿತ್ರದಲ್ಲಿ ತಾವು, ಚಿರು ಹಾಗೂ ದ್ವಾರಕೀಶ್‌ ಮಗ ಯೋಗೀಶ್‌ ಸೇರಿ ರಚಿಸಿದ ಮೂರನೇ ಚಿತ್ರ ಇದಾಗಿದೆ. ಆಟಗಾರ, ಆಕೆ ಹಾಗೂ ಅಮ್ಮ ಐ ಲವ್‌ ಯು ಈ ಮೂರು ಚಿತ್ರಗಳು ಇದೇ ಬ್ಯಾನರ್‌ ಅಡಿ ಬಿಡುಗಡೆ ಆಗಿದ್ದವು. ಪ್ರೇಕ್ಷ ಕರು ಸಿನಿಮಾ ನೋಡುವ ಮೂಲಕ ಪ್ರೋತ್ಸಾಹಿಸಬೇಕೆಂದು ಮನವಿ ಮಾಡಿದರು. ಚಿತ್ರಕ್ಕೆ ಶೇಖರ್‌ ಚಂದ್ರು ಅವರ ಛಾಯಾಗ್ರಹಣ, ಎಂ.ಎನ್‌. ವಿಶ್ವ ಚಿತ್ರದ ಸಂಕಲನ ಮಾಡಿದ್ದಾರೆ. ಉಳಿದಂತೆ ಪ್ರಕಾಶ್‌ ಬೆಳವಾಡಿ, ಗಿರಿ ದ್ವಾರಕೀಶ್‌, ಚಿಕ್ಕಣ್ಣ, ಬಿರಾದಾರ್‌, ರವಿಕಾಳೆ ತಾರಾಗಣದಲ್ಲಿದ್ದಾರೆ ಎಂದರು. ಗೋಷ್ಠಿಯಲ್ಲಿ ಚಿರಂಜೀವಿ ಸರ್ಜಾ ಹಾಗೂ ನಾಯಕಿ ನಿಶ್ವಿಕಾ ನಾಯ್ಡು ಇದ್ದರು.