ಆಕ್ರಮಿಸಿದ ಜಮೀನು ಬಿಟ್ಟುಕೊಡಲು ಆಗ್ರಹ

ಶಿವಮೊಗ್ಗ : ಲಂಬಾಣಿ ಜನಾಂಗದವರಿಗೆ ಸೇರಿದ ಜಮೀನನ್ನು ಅಕ್ರಮವಾಗಿ ಪ್ರಭಾವಿಗಳು ತಮ್ಮ ಖಾತೆಗೆ ಮಾಡಿಸಿಕೊಂಡಿದ್ದು, ಕೂಡಲೇ ಬಿಟ್ಟುಕೊಡುವಂತೆ ಆಗ್ರಹಿಸಿ ಕದಂಬ ಕನ್ನಡ ವೇದಿಕೆಯವರು ಜಿಲ್ಲಾಧಿಕಾರಿ ಕಚೇರಿ ಎದುರು ಬುಧವಾರ ಪ್ರತಿಭಟನೆ ನಡೆಸಿದರು.

ನಗರ ವ್ಯಾಪ್ತಿಗೊಳಪಡುವ ಮಲ್ಲಿಗೇನಹಳ್ಳಿ ಗ್ರಾಮದ ವಿವಿಧ ಸ.ನಂ.ಗಳಲ್ಲಿ 163.37 ಎಕರೆ ಮಂಜೂರಾತಿ ಜಮೀನು ಇದ್ದು, ಇದನ್ನು ಕಾನೂನುಬಾಹಿರವಾಗಿ ಪ್ರಭಾವಿಗಳು ಖರೀದಿಸಿ ಖಾತೆ ಮಾಡಿಸಿಕೊಂಡಿದ್ದಾರೆ. ಮಂಜೂರಾದ ಜಮೀನನ್ನು ಯಾರೂ ಖರೀದಿಸುವಂತಿಲ್ಲ. ಆದರೆ, ಪ್ರಭಾವಿಗಳು ಖರೀದಿಸಿ ಕ್ರಯಪತ್ರದ ಮೇರೆಗೆ ಖಾತೆ ಮಾಡಿಸಿಕೊಂಡಿದ್ದಾರೆ ಎಂದು ಆರೋಪಿಸಿದರು.

ಕೃಷಿ ಭೂಮಿ ಹೊಂದಿದವರು ಮಾತ್ರ ಜಮೀನನ್ನು ಖರೀದಿಸಬಹುದು. ಆದರೆ, ಪ್ರಭಾವಿಗಳು ಕೃಷಿ ಭೂಮಿ ಹೊಂದದೇ ಲಂಬಾಣಿ ಜನಾಂಗಕ್ಕೆ ಸೇರಿದ ಜಮೀನನ್ನು ಖರೀದಿಸಿದ್ದಾರೆ. ಈ ಬಗ್ಗೆ ಉಚ್ಚ ನ್ಯಾಯಾಲಯದಲ್ಲಿ ಕೇಸು ದಾಖಲಿಸಲಾಗಿದೆ. ಅಲ್ಲದೇ ಜಿಲ್ಲಾಧಿಕಾರಿಗಳು ಖಾತೆ ಬದಲಾವಣೆಗೆ ಆದೇಶ ನೀಡಿರುತ್ತಾರೆ. ಆದರೂ ಇಲ್ಲಿಯವರೆಗೆ ಯಾವುದೇ ಕ್ರಮ ಕೈಗೊಂಡಿಲ್ಲ. ಆಕ್ರಮಿಸಿದ ಜಮೀನನ್ನು ಕೂಡಲೇ ಜಿಲ್ಲಾಧಿಕಾರಿಯವರು ಮರಳಿ ಲಂಬಾಣಿ ಜನಾಂಗದವರಿಗೆ ಕೊಡಿಸಬೇಕು ಎಂದು ಆಗ್ರಹಿಸಿದರು.

ಈ ಸಂದರ್ಭದಲ್ಲಿ ವೇದಿಕೆಯ ವಿಶ್ವನಾಥ ಗೌಡ, ನಿರಂಜನ್‌, ಶಿವಣ್ಣ, ಚಂದ್ರು, ನಂಜುಂಡಪ್ಪ, ಸುಂಕಪ್ಪ, ಸುರೇಶ, ರಾಘವೇಂದ್ರ, ಕಿರಣ, ಮಂಜಾನಾಯ್ಕ ಮತ್ತಿತರರು ಹಾಜರಿದ್ದರು.