ವಿದೇಶೀ ನೀರೆಯರ ಸೆಳೆದ ಸೀರೆ

ಸಾಗರ : ತಾಲೂಕಿನ ಜೋಗ ಜಲಪಾತ ಸೇರಿದಂತೆ ಭಾರತದ ಪ್ರಾಕೃತಿಕ ಸೌಂದರ‍್ರ್ಯಕ್ಕೆ ವಿದೇಶೀಯರು ಮಾರುಹೋಗುವುದು ಮಾಮೂಲು. ಜತೆಗೆ ಭಾರತೀಯ ಪದ್ಧತಿ, ಸಂಪ್ರದಾಯ, ಆಚರಣೆಗಳ ಬಗ್ಗೆ ಸಹ ವಿದೇಶೀಯರಿಗೆ ಬೆರಗುಗಣ್ಣು, ವಿಚಿತ್ರ ಸೆಳೆತ. ಕಣ್ಣರಳಿಸಿ, ಉದ್ಘಾರವಾಚಕಗಳ ಮೂಲಕ ''ಓ.., ಇಸ್‌ ಇಟ್‌ ಸೋ ನೈಸ್‌!'' ಎಂದು ಮನಸಾರೆ ಪ್ರಶಂಸೆ ವ್ಯಕ್ತಪಡಿಸುತ್ತಾರೆ.

ಭಾರತೀಯ ಪದ್ಧತಿಯ ಸೆಳೆತಕ್ಕೆ ಒಳಗಾದ ಅಂತಹದ್ದೊಂದು ಘಟನೆ ತಾಲೂಕಿನ ವಿಶ್ವ ವಿಖ್ಯಾತ ಜೋಗದ ಬಳಿ ಮಂಗಳವಾರ ನಡದಿದೆ. ಜೋಗ ವೀಕ್ಷಣೆಗೆ ಬಂದಿದ್ದ ಆ್ಯಂಡ್ರ್ಯೂ ಹಾಗೂ ಆತರ ಜತೆಗಾರ್ತಿ ಇಲಿಯನ್‌, ಇವಾನ್‌ ಹಾಗೂ ಅವರ ಜತೆಗಾರ್ತಿ ಕಸೋಲ್‌ ರಾತ್ರಿ ಕಾರ್ಗಲ್‌ ಪಟ್ಟಣ ಸುತ್ತಾಡಿದ್ದಾರೆ. ಈ ಸಂದರ್ಭ ಇಲ್ಲಿನ ಖಾಸಗಿ ಬ್ಯೂಟಿ ಪಾರ್ಲರ್‌ ಹಾಗೂ ಲೇಡಿಸ್‌ ಪ್ಯಾಶನ್‌ ಕಲೆಕ್ಷನ್‌ ಮಳಿಗೆ ಭೇಟಿ ನೀಡಿದ್ದಾರೆ. ಮಳಿಗೆಯಲ್ಲಿದ್ದ ಮಹಿಳೆಯರ ಅಲಂಕಾರಿಕ ವಸ್ತುಗಳಿಗೆ ಮಾರುಹೋದ ಕಸೋಲ್‌ ಮತ್ತು ಇಲಿಯನ್‌ ಭಾರತದ ಸಾಂಪ್ರದಾಯಿಕ ಸೀರೆಯನ್ನು ಉಟ್ಟು, ಹಣೆಗೆ ಕುಂಕುಮ, ಕಿವಿ ಓಲೆ ಮತ್ತು ಕೈ ಬಳೆ ತೊಟ್ಟು ಅಪ್ಪಟ್ಟ ಭಾರತೀಯ ನಾರಿಯರ ಗೆಟ್‌ಅಪ್‌ ಪಡೆದುಕೊಂಡಿದ್ದಾರೆ. ತಮ್ಮ ಸಂಗಾತಿಗಳ ಜತೆ ಸಂಭ್ರಮಿಸಿದ್ದಾರೆ.

ಕಸೋಲ್‌ ಮತ್ತು ಇಲಿಯನ್‌ ಇಂಡಿಯಾದ ಸೀರೆ, ಆಭರಣಗಳನ್ನು ಖರೀದಿಸಿದ್ದಾರೆ. ಪಾರ್ಲರ್‌ನ ಬ್ಯೂಟಿಷಿಯನ್‌ ಶ್ರೀದೇವಿ ರಾಧಾಕೃಷ್ಣ ಅವರ ಬಳಿ ಅಲಂಕಾರ ಮಾಡಿಸಿಕೊಂಡಿದ್ದಾರೆ. ಮಳಿಗೆಯವರ ಕುಟುಂಬದವರ ಜತೆ ಸ್ವಲ್ಪ ಹೊತ್ತು ಮಾತುಕತೆಯಲ್ಲಿಕಾಲಕಳೆದಿದ್ದಾರೆ. ನಂತರ ಕಾರ್ಗಲ್‌ ಪಟ್ಟಣದ ರಸ್ತೆಗಳಲ್ಲಿಸಹ ಸಂಚರಿಸುವಾಗ ಅನೇಕರು ಇವರ ಜತೆಗೆ ನಿಂತು ಫೋಟೊ ಕ್ಲಿಕ್ಕಿಸಿಕೊಂಡು ಸಂಭ್ರಮಿಸಿದ್ದಾರೆ.

----------
ರಷ್ಯಾದಲ್ಲಿಈ ದಿನಮಾನಗಳಲ್ಲಿಸಾಮಾನ್ಯವಾಗಿ 5 ಡಿಗ್ರಿ ಸೆಲ್ಸಿಯಸ್‌ ಉಷ್ಣಾಂಶ ಇರುತ್ತದೆ. ಭಾರತದಲ್ಲಿತುಂಬಾ ಬಿಸಿಲು ಇದೆ. ಇಲ್ಲಿನ ಪ್ರಕೃತಿ, ಸಂಸ್ಕೃತಿ ವಿಶೇಷವಾಗಿದೆ. ಸೀರೆಯಂತಹ ಧಿರಿಸು, ತೊಟ್ಟವರ ವ್ಯಕ್ತಿತ್ವದ ಘನತೆಯನ್ನು ಹೆಚ್ಚಿಸುತ್ತದೆ. ಕೈ ಬಳೆ, ಕುಂಕುಮ ಇವೆಲ್ಲವೂ ಟಿಪಿಕಲ್‌ ಭಾರತೀಯತೆಯನ್ನು ಎತ್ತಿಹಿಡಿಯುತ್ತವೆ. ಧರಿಸಿದಾಗ ಸಂಭ್ರಮ ಸಂತೋಷ ಅನುಭವಿಸಿದ್ದೇವೆ.
- ಕಸೋಲ್‌ ಮತ್ತು ಇಲಿಯನ್‌, ರಷ್ಯಾ ಮಹಿಳೆಯರು.