ಭೂಮಾಪಕರಿಗೆ ಮಾಸಿಕ ಗುರಿ ನಿಗದಿ ಅವೈಜ್ಞಾನಿಕ

ತೀರ್ಥಹಳ್ಳಿ: ಭೂ ಮಾಪಕರಿಗೆ ಮಾಸಿಕ ಗುರಿ ನಿಗದಿಸಿರುವುದು ಅವೈಜ್ಞಾನಿಕ ಕ್ರಮವಾಗಿದ್ದು ಸರಕಾರ ತಕ್ಷಣ ಈ ಆದೇಶ ಹಿಂದಕ್ಕೆ ಪಡೆಯಬೇಕು. ವಿವಿಧ ಬೇಡಿಕೆ ಈಡೇರಿಸಬೇಕೆಂದು ಆಗ್ರಹಿಸಿ ತಾಲೂಕಿನ ಭೂ ಮಾಪನ, ಕಂದಾಯ ವ್ಯವಸ್ಥೆ ಮತ್ತು ಭೂ ದಾಖಲೆಗಳ ಕಾರ‍್ಯ ನಿರ್ವಾಹಕ ನೌಕರರು ಕಪ್ಪು ಪಟ್ಟಿ ಧರಿಸಿ ಕಾರ‍್ಯ ನಿರ್ವಹಿಸುವ ಮೂಲಕ ಪ್ರತಿಭಟಿಸಿದರು.

ಆಗಸ್ಟ್‌ 19ರಿಂದ ಪ್ರತಿಭಟನೆ ಆರಂಭವಾಗಿದ್ದು 31ರವರೆಗೆ ಕಪ್ಪುಪಟ್ಟಿಧರಿಸಿ ಪ್ರತಿಭಟನೆ ಮುಂದುವರಿಸಲಿದ್ದಾರೆ. ಕರ್ನಾಟಕ ರಾಜ್ಯ ಭೂ ಮಾಪನ, ಕಂದಾಯ ವ್ಯವಸ್ಥೆ ಮತ್ತು ಭೂ ದಾಖಲೆಗಳ ಕಾರ‍್ಯ ನಿರ್ವಾಹಕ ನೌಕರರ ಸಂಘದ ನೇತೃತ್ವದಲ್ಲಿ ನೌಕರರು ಕಪ್ಪುಪಟ್ಟಿಧರಿಸಿ ಕಾರ‍್ಯನಿರ್ವಹಿಸುವ ನೌಕರರು ಸೆ.4ರಂದು ಬೆಂಗಳೂರು ಚಲೋ ಪ್ರತಿಭಟನೆ ನಡೆಸಲಿದ್ದಾರೆ.

ಈ ಹಿಂದೆ ಮಾಸಿಕ 23 ಕಡತಗಳ ಗುರಿ ನಿಗದಿಪಡಿಸಲಾಗಿತ್ತು. ಮಾಸಿಕ 5ರಿಂದ 8 ರಜೆ ದಿನಗಳಿದ್ದು ಹಲವು ಭೂ ವ್ಯಾಜ್ಯಗಳು ಇರುತ್ತವೆ. ಸರಕಾರ ನಿಗದಿಸಿದ ಮಾಸಿಕ ಗುರಿ ತಲುಪುವುದು ಭೂ ಮಾಪಕರಿಗೆ ಕಷ್ಟವಾಗಿದೆ. ಒತ್ತಡದಲ್ಲಿ ಕರ್ತವ್ಯ ನಿರ್ವಹಿಸುವಂತಹ ನಿಯಮಗಳು ಮಾರಕವಾಗಿದೆ ಎಂದು ಪ್ರತಿಭಟನೆ ನಿರತ ನೌಕರರು ದೂರಿದರು.

ಅಗತ್ಯಕ್ಕೆ ತಕ್ಕಷ್ಟು ಭೂ ಮಾಪಕರನ್ನು ನೇಮಕ ಮಾಡಬೇಕು. ರಾರ‍ಯಂಕಿಂಗ್‌ ಆಧರಿಸಿ ನೌಕರರ ವರ್ಗಾವಣೆ ಮಾಡುತ್ತಿರುವ ಪದ್ಧತಿ ರದ್ದುಪಡಿಸಬೇಕು. ಕಾರ‍್ಯ ನಿರ್ವಾಹಕ ಹುದ್ದೆಗಳಿಗೆ ಮುಂಬಡ್ತಿ ನೀಡಬೇಕು. ನೌಕರರಿಗೆ ತಾಂತ್ರಿಕ ವೇತನ ಶ್ರೇಣಿ ಒದಗಿಸಬೇಕು. ನೌಕರರ ಬೇಡಿಕೆ ಈಡೇರದಿದ್ದಲ್ಲಿ ಬೆಂಗಳೂರು ಚಲೋ ಪ್ರತಿಭಟನೆ ನಡೆಸಲಾಗುತ್ತದೆ ಎಂದು ನೌಕರರು ಎಚ್ಚರಿಸಿದರು. ಪ್ರತಿಭಟನೆಯಲ್ಲಿ ಭೂ ಮಾಪನ, ಕಂದಾಯ ವ್ಯವಸ್ಥೆ ಮತ್ತು ಭೂ ದಾಖಲೆಗಳ ಕಾರ‍್ಯ ನಿರ್ವಾಹಕ ನೌಕರರ ಸಂಘದ ತಾಲೂಕು ಅಧ್ಯಕ್ಷೆ ಸುಷ್ಮಾ, ಹಿರಿಯ ಪರಿವೇಕ್ಷಕ ಮಹಾದೇವ್‌, ಭೂ ಮಾಪಕರಾದ ರಾಜ್‌ಕುಮಾರ್‌, ಎನ್‌.ಸಿ. ಮಹೇಶ್‌, ಮಹಾಂತೇಶ್‌ ಭೋವಿ, ಶರತ್‌ಕುಮಾರ್‌, ನೂರ್‌ವಸೀಮಾ, ಅನಿಲ್‌ಕುಮಾರ್‌ ಮತ್ತಿತರರು ಇದ್ದರು.