ಶಿಕಾರಿಪುರ ಬಂದ್‌ ಯಶಸ್ವಿ

ಶಿಕಾರಿಪುರ: ಶರಾವತಿ ಉಳಿಸಿ ಹೋರಾಟ ಸಮಿತಿ, ವಿವಿಧ ಸಂಘಟನೆಗಳು ಬುಧವಾರ ಕರೆ ನೀಡಿದ್ದ ಬಂದ್‌ಗೆ ಪಟ್ಟಣದ ಎಲ್ಲ ಬಸ್‌ಮಾಲೀಕರು, ವ್ಯಾಪಾರಸ್ಥರು ತಮ್ಮ ಅಂಗಡಿ ಮುಚ್ಚುವ ಮೂಲಕ ಬೆಂಬಲ ವ್ಯಕ್ತಪಡಿಸಿದ್ದು ಶಾಂತಿಯುತ ಬಂದ್‌ ಸಂಪೂರ್ಣ ಯಶಸ್ವಿಯಾಗಿದೆ.

ಖಾಸಗಿ ಬಸ್‌ ಸಂಚಾರ ಸ್ಥಗಿತಗೊಂಡ ಕಾರಣ ಪ್ರಯಾಣಿಕರು ಖಾಸಗಿ ವಾಹನ, ಕೆಎಸ್‌ಆರ್‌ಟಿಸಿ ಬಸ್‌ ಮೊರೆ ಹೋಗಿದ್ದರು. ಪಟ್ಟಣದ ಎಲ್ಲ ಹೋಟೆಲ್‌, ಅಂಗಡಿ, ಎಪಿಎಂಸಿ ಮಾರುಕಟ್ಟೆ ಸೇರಿದಂತೆ ಎಲ್ಲ ವರ್ತಕರು ವ್ಯವಹಾರ ಸ್ಥಗಿತಗೊಳಿಸಿ ಬಂದ್‌ಗೆ ಬೆಂಬಲ ವ್ಯಕ್ತಪಡಿಸಿದ್ದರು. ವಿವಿಧ ಸಂಘಟನೆ ಪದಾಧಿಕಾರಿಗಳು ಪಟ್ಟಣದ ಪ್ರಮುಖ ಬೀದಿಗಳಲ್ಲಿ ಬೈಕ್‌ ರಾರ‍ಯಲಿ ನಡೆಸಿದರು. ಖಾಸಗಿ ಬಸ್‌ನಿಲ್ದಾಣದಲ್ಲಿ ಬಹಿರಂಗ ಸಭೆ ನಡೆಸಲಾಯಿತು. ವಿರಕ್ತಮಠದ ಶ್ರೀಚನ್ನಬಸವ ಸ್ವಾಮೀಜಿ ಮಾತನಾಡಿ, ಜಿಲ್ಲೆಯ ಎಲ್ಲ ತಾಲೂಕಿನಲ್ಲಿ ಕುಡಿಯುವ ನೀರಿನ ಕೊರತೆ ಇದ್ದು ಅದನ್ನು ನೀಗಿಸುವುದಕ್ಕೆ ಮೊದಲ ಆದ್ಯತೆ ನೀಡಬೇಕೆಂದರು.

ಪುಷ್ಪಾಶ್ರಮದ ಫಾದರ್‌ ಸಂತೋಷ್‌ ಅಲ್ಮೆಡಾ ಮಾತನಾಡಿ, ಬೆಂಗಳೂರಿಗೆ ಶರಾವತಿ ನದಿ ನೀರು ತೆಗೆದುಕೊಂಡು ಹೋಗಲು ಬಿಡುವುದಿಲ್ಲ ಎಂದರು. ಹೋರಾಟ ಸಮಿತಿ ತಾಲೂಕು ಸಂಚಾಲಕ ಕೆ.ಎಚ್‌.ಹುಚ್ರಾಯಪ್ಪ, ಬ್ಲಾಕ್‌ ಕಾಂಗ್ರೆಸ್‌ ಅಧ್ಯಕ್ಷ ಗೋಣಿ ಮಾಲತೇಶ್‌, ಬಿಜೆæಪಿಯ ಗಿರೀಶ್‌ ಧಾರವಾಡ, ವೀರಶೈವ ಸಮಾಜದ ಅಧ್ಯಕ್ಷ ವಿರೇಶ್‌, ಅಶ್ವಿನ್‌ ಪಾಟೀಲ್‌, ಜೆಡಿಎಸ್‌ ಮಲ್ಲೇಶಪ್ಪ, ಜಯಕರ್ನಾಟಕ ಸಂಘಟನೆ ಹುಲಿಗಿ ಕೃಷ್ಣ, ಉಪನ್ಯಾಸಕರಾದ ಎಚ್‌.ಎಸ್‌.ರಘು, ಸುರೇಶ್‌ ಸೇವಂತಿ, ಡಾ.ಈಶ್ವರರಾವ್‌, ಸುಧೀರ್‌, ಕನ್ನಡ ಯುವಕ ಸಂಘ ಅಧ್ಯಕ್ಷ ಗುಡ್ಡಳ್ಳಿ ಸಂತೋಷ್‌, ನಿರ್ದೇಶಕ ವೈಭವ್‌, ಕಸಾಪದ ಕಾನೂರು ಮಲ್ಲಿಕಾರ್ಜುನ, ಮಂಜಾಚಾರ್‌, ಬೆಣ್ಣೆ ಪ್ರವೀಣ್‌ ಇತರರಿದ್ದರು.