ಪರಾವಲಂಬನೆ ತಪ್ಪಿಸಲು ಸ್ಮಾರ್ಟ್‌ ವ್ಹೀಲ್‌ಚೇರ್‌

ಆತೀಶ್‌ ಬಿ. ಕನ್ನಾಳೆ

Vijaya Karnataka Web

ಶಿವಮೊಗ್ಗ : ಪ್ರತಿ ಕೆಲಸಕ್ಕೂ ಇನ್ನೊಬ್ಬರ ಅವಲಂಬಿಸಬೇಕಾದ ಅನಿವಾರ್ಯತೆ. ಮನೆಯಲ್ಲಿ ಒಬ್ಬರೇ ಇರಲು ಕಷ್ಟ. ಸ್ವತಂತ್ರವಾಗಿ ಓಡಾಡಲಾಗದ ಸ್ಥಿತಿ. ವಿಶೇಷಚೇತನರ ಸಮಸ್ಯೆಗಳಿವು. ವ್ಹೀಲ್‌ಚೇರ್‌ ಇದ್ದರೂ ಅದನ್ನು ತಳ್ಳಲು ಒಬ್ಬರು ಬೇಕೇಬೇಕು.

ಈ ಎಲ್ಲ ಅಂಶಗಳನ್ನು ಮನಗಂಡು ನಗರದ ಪಿಇಎಸ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ಟೆಕ್ನಾಲಜಿ ಆ್ಯಂಡ್‌ ಮ್ಯಾನೇಜ್‌ಮೆಂಟ್‌ ಕಾಲೇಜಿನ ಇಇಇ ವಿಭಾಗದ ವಿದ್ಯಾರ್ಥಿಗಳಾದ ಪಿ.ನಂದಕಿಶೋರ್‌, ವಿ.ಕುಶಾಲ್‌, ಕೆ.ಎಚ್‌.ಮೇಘಾ, ಕೆ.ಯಶಸ್ವಿನಿ ಅವರು ವಿಶೇಷಚೇತನರ ಪರಾವಲಂಬನೆ ತಪ್ಪಿಸಲು 'ಸ್ಮಾರ್ಟ್‌ ವ್ಹೀಲ್‌ಚೇರ್‌' ತಯಾರಿಸಿದ್ದಾರೆ.

ಈ ಸ್ಮಾರ್ಟ್‌ ವ್ಹೀಲ್‌ಚೇರ್‌ ತಯಾರಿಸುವುದಕ್ಕೆ ಆರು ತಿಂಗಳು ತಗಲಿದ್ದು, 20 ಸಾವಿರ ರೂ. ಖರ್ಚಾಗಿದೆ. ಹಳೆಯ ವ್ಹೀಲ್‌ಚೇರ್‌ ಬಳಸಿ ಹೊಸತಂತ್ರಜ್ಞಾನ ಅಳವಡಿಸಲಾಗಿದೆ. ಯಾವುದೇ ದೈಹಿಕ ಶ್ರಮವಿಲ್ಲದೇ ಧ್ವನಿ ಹಾಗೂ ಕೈ ಅಲ್ಲಾಡಿಸುವ ಮೂಲಕವೂ ಕುರ್ಚಿ ಮುನ್ನಡೆಯುತ್ತದೆ.

ಏನೇನಿದೆ?:

ರಾಸ್ಪೆರಿ ಪೈ 3ಬಿ+, ಎಸೆಲೆರೊಮೀಟರ್‌, ವಾಯ್ಸ್‌ ಮಾಡ್ಯೂಲ್‌, ಟೆಕ್ಟೈಲ್‌ ಸ್ವಿಚ್‌ಗಳನ್ನು ಇದಕ್ಕೆ ಬಳಸಲಾಗಿದೆ. ರಾತ್ರಿ ಹೊತ್ತಲ್ಲಿ ಸಂಚರಿಸುವಾಗ ದಾರಿ ಕಾಣಲಿ ಎಂಬ ಉದ್ದೇಶದಿಂದ ಟಾರ್ಚ್‌ ಲೈಟ್‌ಗಳನ್ನೂ ಅಳವಡಿಸಲಾಗಿದೆ. ಮೊಬೈಲ್‌ ಚಾರ್ಜ್‌ ಮಾಡುವುದಕ್ಕೂ ಪ್ರತ್ಯೇಕ ವ್ಯವಸ್ಥೆ ಮಾಡಲಾಗಿದೆ. ಜಿಎಸ್‌ಎಂ ಮಾಡ್ಯೂಲ್‌ ಲಭ್ಯವಿದ್ದು, ಸಂದಿಗ್ಧ ಸಂದರ್ಭದಲ್ಲಿ ನಿಕಟವರ್ತಿಗಳಿಗೆ ಸಂಪರ್ಕಿಸಬಹುದು.

ವ್ಹೀಲ್‌ಚೇರ್‌ ಮುಂದೆ ಸಾಗುವುದಕ್ಕಾಗಿ ಡಿಸಿ ಗೇರ್‌ ಮೋಟರ್‌ ಬಳಸಲಾಗಿದೆ. ರಾಸ್ಪೆರಿ ಪೈ 3ಬಿ+ ನಿಯಂತ್ರಿಸುವುದಕ್ಕಾಗಿ ಲೈನಕ್ಸ್‌ ಮಾಡಿಫೈಯರ್‌ ವರ್ಷನ್‌ ಬಳಸಲಾಗಿದೆ ಎಂದು ಸಂಶೋಧಕ ಪಿ.ನಂದಕಿಶೋರ್‌ 'ವಿಜಯ ಕರ್ನಾಟಕ'ಕ್ಕೆ ತಿಳಿಸಿದ್ದಾರೆ.

ವಾಯ್ಸ್‌ ಮಾಡ್ಯೂಲ್‌ ಅಳವಡಿಸಿರುವುದರಿಂದ ಧ್ವನಿಯ ಮೂಲಕವೇ ಯಾವ ಕಡೆಗೆ ಕುರ್ಚಿ ತಿರುಗಿಸಬೇಕು. ಮುಂದೆ ಅಥವಾ ಹಿಂದೆ ಹೀಗೆ ಎಲ್ಲ ಮಾರ್ಗದಲ್ಲೂ ಮಾತಿನಿಂದಲೇ ಮುನ್ನಡೆಯಬಹುದು. ಒಟ್ಟಾರೆ, ವಿಶೇಷಚೇತನರೂ ಯಾರ ಸಹಾಯವಿಲ್ಲದೇ ಮನೆಯಲ್ಲಿ ಸ್ವತಂತ್ರವಾಗಿ ಇರಬಹುದಾಗಿದೆ. ಮಾತಾಡುವಲ್ಲಿ ವ್ಯಕ್ತಿಗೆ ಸಮಸ್ಯೆ ಇದ್ದರೆ ಅವರಿಗಾಗಿ ಟೆಕ್ಟೈಲ್‌ ಸ್ವಿಚ್‌ ಅಳವಡಿಸಿದ್ದು, ಅದನ್ನು ಯಾವ ಕಡೆಗೆ ತಿರುಗಿಸಲಾಗುತ್ತದೆಯೋ ಆ ಮಾರ್ಗದಲ್ಲಿ ವ್ಹೀಲ್‌ಚೇರ್‌ ಹೋಗುತ್ತದೆ.

ಹೆಚ್ಚು ಗದ್ದಲ ಇರುವ ಕಡೆಗಳಲ್ಲಿ ವಾಯ್ಸ್‌ ಮಾಡ್ಯೂಲ್‌ನ ಕಾರ್ಯಕ್ಷಮತೆ ಕಡಿಮೆಯಾಗುತ್ತದೆ. ಹೀಗಾಗಿ, ಸ್ಮಾರ್ಟ್‌ ವ್ಹೀಲ್‌ಚೇರ್‌ ಅನ್ನು ಆಸ್ಪತ್ರೆ ಅಥವಾ ಸಾರ್ವಜನಿಕ ಸ್ಥಳಗಳಿಗಿಂತ ಮನೆಯಲ್ಲಿ ಹೆಚ್ಚು ಪ್ರಭಾವಶಾಲಿಯಾಗಿ ಬಳಸಬಹುದು. ಇದರಲ್ಲಿ ಇನ್ನೂ ಸಾಕಷ್ಟು ಬದಲಾವಣೆಗಳನ್ನು ತರಲೂ ಅವಕಾಶಗಳಿವೆ. ಹೆಚ್ಚು ಹಣ ಖರ್ಚು ಮಾಡಿದ್ದಲ್ಲಿ ಇನ್ನಷ್ಟು ವಿಶೇಷಚೇತನ ಸ್ನೇಹಿ ಚೇರ್‌ ಸಿದ್ಧಪಡಿಸಬಹುದಾಗಿದೆ. ಕೆಲವು ತಂತ್ರಜ್ಞಾನಗಳನ್ನು ಬಳಸಿದರೆ ಬಳಕೆದಾರರ ಆರೋಗ್ಯದ ಮೇಲೂ ನಿಗಾ ಇಡಬಹುದಾದ ಅವಕಾಶ ಇದೆ. ಸದ್ಯ ಕಡಿಮೆ ವೆಚ್ಚದಲ್ಲಿ ಇದನ್ನು ತಯಾರಿಸಲಾಗಿದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಉತ್ಪಾದಿಸಿದಲ್ಲಿ ಖರ್ಚಿನ ಪ್ರಮಾಣ ಕಡಿಮೆಯಾಗಲಿದೆ ಎಂಬುದು ಸಂಶೋಧಕ ವಿದ್ಯಾರ್ಥಿಗಳ ಅಭಿಪ್ರಾಯ.

===

ಕಾಲೇಜಿನ ಬಿಡುವಿನ ಕಾಲಾವಧಿಯಲ್ಲಿ ವಿಶೇಷಚೇತನ ಸ್ನೇಹಿ ಸ್ಮಾರ್ಟ್‌ ವ್ಹೀಲ್‌ಚೇರ್‌ ತಯಾರಿಸಲಾಗಿದೆ. 20 ಸಾವಿರ ರೂ. ವೆಚ್ಚದಲ್ಲಿ ಆರು ತಿಂಗಳು ಇದಕ್ಕಾಗಿ ಕೆಲಸ ಮಾಡಿದ್ದೇವೆ. ತಂಡದ ಎಲ್ಲರ ಶ್ರಮ ಇದರಲ್ಲಿ ಸಮಾನವಾಗಿದೆ. ಮಾರುಕಟ್ಟೆಯಲ್ಲಿ ಹ್ಯಾಂಡ್‌ ಆಪರೇಟಿಂಗ್‌ ಹಾಗೂ ಜಾಯ್‌ಸ್ಟಿಕ್‌ ಆಧಾರಿತ ವ್ಹೀಲ್‌ಚೇರ್‌ಗಳಿವೆ. ಇವು ಎಲ್ಲರೂ ಬಳಸುವುದು ಕಷ್ಟಸಾಧ್ಯ. ಅದಕ್ಕಾಗಿ, ಧ್ವನಿಯ ಅವಕಾಶವನ್ನೂ ಹೊಸದಾಗಿ ಕಲ್ಪಿಸಲಾಗಿದೆ.

- ನಂದಕಿಶೋರ್‌, ಸಂಶೋಧಕ

===