ಒಡೆದ ಕೆರೆ ಕೋಡಿ, ಬೆಳೆಗೆ ಹಾನಿ

ತೀರ್ಥಹಳ್ಳಿ: ನೆರೆ ಹಾನಿ ಪರಿಹಾರ ಯೋಜನೆ ಅನುದಾನದಡಿ ಅನುಷ್ಠಾನಗೊಂಡ ಕಳಪೆ ಕಾಮಗಾರಿ ಪರಿಣಾಮ ಕೆರೆಕೋಡಿ ಒಡೆದು ಹಲವು ಎಕರೆ ಸಾಗುವಳಿ ಭೂಮಿಗೆ ಹಾನಿಯಾಗಿದೆ.
ತಾಲೂಕಿನ ತ್ರಿಯಂಬಕಪುರ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಹಲುಸಾಲೆ ಗ್ರಾಮದ ಬಾವಿಕೈಸರುನಲ್ಲಿಕೆರೆ ಕೋಡಿ ಒಡೆದಿದ್ದು, ರೈತರು ಕಳಪೆ ಕಾಮಗಾರಿಗೆ ಕಾರಣರಾದವರ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಸುಮಾರು 70 ಸಾವಿರ ರೂಪಾಯಿ ಅನುದಾನದಲ್ಲಿಸರಕಾರಿ ಕೆರೆಗೆ ಹೊಸದಾಗಿ ಕೋಡಿ ಕಾಮಗಾರಿ ಮಾಡಲಾಗಿತ್ತು. ಕಾಮಗಾರಿಯನ್ನು ತಾಲೂಕು ಬಿಜೆಪಿ ಮಾಜಿ ಅಧ್ಯಕ್ಷ ಕೋಣಂದೂರು ಮೋಹನ್‌ಶೆಟ್ಟಿ ನಿರ್ವಹಿಸಿದ್ದರು. ಕೋಡಿ ಒಡೆದದ್ದರಿಂದ ರೈತರಿಗೆ ತೀವ್ರ ತೊಂದರೆ ಉಂಟಾಗಿದೆ.
ಸಂಬಂಧಪಟ್ಟ ಇಲಾಖೆ ಅಧಿಕಾರಿಗಳು ಸ್ಥಳಕ್ಕೆ ತಕ್ಷಣ ಭೇಟಿ ನೀಡಿ ಕಳಪೆ ಕಾಮಗಾರಿಗೆ ಕಾರಣರಾದವರ ವಿರುದ್ಧ ಕಠಿಣ ಕಾನೂನು ಕ್ರಮ ಜರುಗಿಸಬೇಕು. ಹೊಸದಾಗಿ ಕೆರೆ ಕೋಡಿ ಕಾಮಗಾರಿ ಮಾಡಬೇಕು ಎಂದು ಆಗ್ರಹಿಸಿದ್ದಾರೆ. ಒಡೆದ ಕೆರೆಯನ್ನು ದುರಸ್ತಿ ಗೊಳಿಸುವ ಜತೆಗೆ ಕಳಪೆ ಕಾಮಗಾರಿ ಮೂಲಕ ತಪ್ಪು ಎಸೆಗಿದವರ ಮೇಲೆ ಕಾನೂನು ಕ್ರಮ ತೆಗೆದುಕೊಳ್ಳಬೇಕು. ಇಲ್ಲದಿದ್ದರೆ ಪ್ರತಿಭಟನೆ ಅನಿವಾರ‍್ಯ ಎಂದು ರೈತರು ಎಚ್ಚರಿಸಿದ್ದಾರೆ.