ಮತಗಟ್ಟೆಗೆ ತೆರಳಿದ ಸಿಬ್ಬಂದಿ

ತೀರ್ಥಹಳ್ಳಿ: ಲೋಕಸಭಾ ಚುನಾವಣೆ ಹಿನ್ನೆಲೆಯಲ್ಲಿ ತೀರ್ಥಹಳ್ಳಿ ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯ 258 ಮತಗಟ್ಟೆಯಲ್ಲಿ ಮತ ಚಲಾವಣೆಗೆ ಸಕಲ ಸಿದ್ಧತೆ ಮಾಡಲಾಗಿದೆ. ಸೋಮವಾರ ಪಟ್ಟಣದ ಸರಕಾರಿ ಪದವಿಪೂರ್ವ ಕಾಲೇಜು ಆವರಣದಿಂದ ಚುನಾವಣಾ ಸಿಬ್ಬಂದಿ ಮತಗಟ್ಟೆಗೆ ತೆರಳಿದರು.

ಮತಗಟ್ಟೆ ನಿರ್ವಹಣೆಗೆ 1850 ಸಿಬ್ಬಂದಿ ನೇಮಿಸಲಾಗಿದೆ. ರಕ್ಷಣೆ ಕಾರ‍್ಯಕ್ಕೆ 1600 ಸಿಬ್ಬಂದಿ ನಿಯೋಜಿಸಲಾಗಿದೆ. 28 ನಕ್ಸಲ್‌ ಪೀಡಿತ ಸೂಕ್ಷ್ಮ ಮತಗಟ್ಟೆ, 48 ಸೂಕ್ಷ್ಮ, 45 ಅತಿ ಸೂಕ್ಷ್ಮ ಮತಗಟ್ಟೆ ಗುರುತಿಸಿ ಹೆಚ್ಚಿನ ಸಿಬ್ಬಂದಿ ನೇಮಿಸಲಾಗಿದೆ. ಚುನಾವಣಾ ಕಾರ‍್ಯಕ್ಕೆ 77 ವಾಹನಗಳನ್ನು ಸೇವೆಗೆ ಬಳಸಿಕೊಳ್ಳಲಾಗಿದೆ.

ಪೊಲೀಸ್‌ ಕಿಟ್‌ ವಿತರಣೆ:
ಚುನಾವಣೆಯ ರಕ್ಷಣಾ ಕಾರ‍್ಯಕ್ಕೆ ನೇಮಕಗೊಂಡ ಸಿಬ್ಬಂದಿಗೆ ಪೊಲೀಸ್‌ ಇಲಾಖೆ ಸೋಮವಾರ ಕಿಟ್‌ ವಿತರಿಸಿದೆ. ಬಿಸ್ಕತ್‌, ಸೊಳ್ಳೆಕಚ್ಚದಂತೆ ಒಡೋಮಸ್‌ ಕ್ರೀಮ್‌, ಟೂಥ್‌ಬ್ರಶ್‌, ಪೇಸ್ಟ್‌, ಶೇವಿಂಗ್‌ ಸೆಟ್‌ ನೀಡಲಾಗಿದೆ. ಠಾಣೆಯಲ್ಲಿ ಸಿಬ್ಬಂದಿಗೆ ಕಿಟ್‌ ವಿತರಿಸಲಾಯಿತು.