ಮಂಡಗದ್ದೆಯಲ್ಲಿ ಕಂಡುಬಂದ ‘ಸಕ್ಕರ್‌ ಕ್ಯಾಟ್‌’

ಶಿವಮೊಗ್ಗ: ತುಂಗಾ ಹಿನ್ನೀರು ಪ್ರದೇಶದ ಮಂಡಗದ್ದೆಯಲ್ಲಿ ಸಕ್ಕರ್‌ ಕ್ಯಾಟ್‌ ಪ್ರಭೇದದ ಮೀನು ಮಂಗಳವಾರ ಪತ್ತೆಯಾಗಿದೆ. ಥೇಟ್‌ ವಿಮಾನದಂತೆಯೇ ಕಾಣುವ ಬಲಿಷ್ಠವಾದ ರೆಕ್ಕೆಗಳನ್ನು ಹೊಂದಿರುವ ಈ ಮೀನನ್ನು ಕಂಡು ಜನರೂ ಅಚ್ಚರಿಗೆ ಒಳಗಾಗಿದ್ದಾರೆ. ನಂತರ, ಅದನ್ನು ಹಿನ್ನೀರಿಗೆ ಬಿಡಲಾಗಿದೆ.

ಅಕ್ವೇರಿಯಂಗಳ ಸ್ವಚ್ಛತೆಗಾಗಿ ಸಾಕಲಾಗುವ 'ಸಕ್ಕರ್‌ಕ್ಯಾಟ್‌' ಜಾತಿಗೆ ಹೋಲುವ ಮೀನು ಮಂಡಗದ್ದೆ ಸಮೀಪದ ತೋಟದಲ್ಲಿ ವ್ಯಕ್ತಿಯೊಬ್ಬರು ಬಲೆ ಹಾಕಿದಾಗ ಸಿಕ್ಕಿದೆ. ದೊಡ್ಡ ಗಾತ್ರದ ಮೀನು ಇದಾಗಿದ್ದು, ನೋಡುಗರನ್ನು ಆಕರ್ಷಿಸುತ್ತಿದೆ.

ಕಂದು ಬಣ್ಣದ ಈ ಮೀನಿನ ಮೈ ಮೇಲೆ ಸರಪಳಿಯಂತೆ ಗೆರೆಗಳಿವೆ. ಮೀನಿನ ಎರಡೂ ಬದಿಯಲ್ಲಿ ತಲಾ ಎರಡರಂತೆ ನಾಲ್ಕು ರೆಕ್ಕೆಗಳಿವೆ. ಬೆನ್ನು ಭಾಗದಲ್ಲಿ ಚೂಪಾದ ಮುಳ್ಳುಗಳಿವೆ. ನೋಡಲು ವಿಮಾನದಂತೆಯೇ ಭಾಸವಾಗುತ್ತದೆ.

'ತುಂಗಾ ಹಿನ್ನೀರಿನಲ್ಲಿ ಈ ಬಗೆಯ ಮೀನು ನೋಡಿಯೇ ಇಲ್ಲ. ಬಲಿಷ್ಠವಾದ ರೆಕ್ಕೆಗಳ ಮೇಲೆ ನಿಲ್ಲುತಿತ್ತು. ನೋಡಲು ಸ್ಪರದ್ರೂಪಿ ಅಲ್ಲದಿದ್ದರೂ ಆಕರ್ಷಕವಾಗಿದೆ' ಎನ್ನುತ್ತಾರೆ ಸ್ಥಳೀಯರು.

ಸಾಮಾನ್ಯವಾಗಿ ಅಕ್ವೇರಿಯಂ ಹಾಗೂ ಬೃಹತ್‌ ನೀರಿನ ಟ್ಯಾಂಕ್‌ಗಳ ಸ್ವಚ್ಛತೆಗಾಗಿ ಸಕ್ಕರ್‌ ಕ್ಯಾಟ್‌ ಮೀನನ್ನು ಸಾಕಲಾಗುತ್ತದೆ. ಈ ಪ್ರಭೇದದ ಮೀನುಗಳಲ್ಲಿ ಅನೇಕ ಜಾತಿಯದ್ದಿವೆ. ಅಲಂಕಾರಿಕ ಮೀನಿನಂತೆಯೂ ಇವು ಮಾರುಕಟ್ಟೆಯಲ್ಲಿ ಲಭ್ಯ ಇವೆ. ಇದನ್ನು ಯಾರೂ ಕೆರೆ, ನದಿಯಲ್ಲಿ ಸಾಕುವುದಿಲ್ಲ. ಅಕ್ವಾರಿಯಂಗಳಲ್ಲಿ ಇವುಗಳನ್ನು ಸಾಕಲಾಗುತ್ತದೆ ಎಂಬುವುದು ಕೆಲವರ ವಾದವಾಗಿದೆ.

ಇದು ಸರ್ವೆ ಸಾಮಾನ್ಯವಾಗಿ ಸಿಗುವ ಮೀನಾಗಿದ್ದು, ನದಿ, ಕೆರೆಗಳಲ್ಲಿ ಕಂಡುಬರುತ್ತದೆ. ಇದು ಪಾಚಿಯನ್ನು ತಿನ್ನುತ್ತದೆ ಎನ್ನುತ್ತಾರೆ ಮೀನುಗಾರಿಕೆ ಇಲಾಖೆ ಅಧಿಕಾರಿಗಳು.