ವೃದ್ಧರಿಗೆ ತಂಡದ ಆರೈಕೆ

ಸಾಗರ: ಇಲ್ಲಿನ ಕರ್ನಾಟಕ ಸೋಶಿಯಲ್‌ ಮೂವ್‌ಮೆಂಟ್‌ ಹಾಗೂ ಕರ್ನಾಟಕ ಮಾನವ ಹಕ್ಕು ಸಮಿತಿ ಸದಸ್ಯರು ನಿತ್ರಾಣ ಸ್ಥಿತಿಯಲ್ಲಿದ್ದ ನಿರ್ಗತಿಕ ವೃದ್ಧರೊಬ್ಬರನ್ನು ಆಸ್ಪತ್ರೆಗೆ ದಾಖಲಿಸಿ ಸೂಕ್ತ ಚಿಕಿತ್ಸೆ ನೀಡಿದ ಮಾನವೀಯ ಘಟನೆ ಬುಧವಾರ ನಡೆದಿದೆ.

ಇಲ್ಲಿನ ಗಾಂಧಿನಗರದ ಕಂಬಳೇರ ಕೇರಿಯಲ್ಲಿಬುಧವಾರ ಕಾಣಿಸಿಕೊಂಡ ವೃದ್ಧರು ಅಶಕ್ತತೆಯಿಂದ ಬಳಲುತ್ತಿದ್ದರು. ಇದನ್ನು ಗಮನಿಸಿದ ಸಾಮಾಜಿಕ ಕಾರ‍್ಯಕರ್ತ ಶಶಿಕಾಂತ್‌ ಅವರು ಗೆಳೆಯ ಇಮ್ರಾನ್‌ಗೆ ಈ ವಿಷಯ ತಿಳಿಸಿದ್ದಾರೆ. ನಗರಸಭೆ ಪರಿಸರ ಅಭಿಯಂತರ ಪ್ರಭಾಕರ್‌, ಡಿಎಸ್‌ಎಸ್‌ ನಾಗರಾಜ ಮತ್ತಿತರರು ಸ್ಥಳಕ್ಕೆ ಧಾವಿಸಿದ್ದಾರೆ. ಪೌರಕಾರ್ಮಿಕರನ್ನು ಕರೆಸಿ, ವೃದ್ಧರಿಗೆ ಸ್ನಾನ ಮಾಡಿಸಲಾಗಿದೆ. ಆ ನಂತರ ತುರ್ತುನಿಗಾ ವಾಹನದ ಮೂಲಕ ವೃದ್ಧರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿ, ಚಿಕಿತ್ಸೆ ನೀಡಲಾಗಿದೆ. ಕನ್ನಡ, ತೆಲುಗು ಮಾತನಾಡುವ ವೃದ್ಧರು ಹೆಸರು, ವಿಳಾಸದ ಮಾಹಿತಿ ನೀಡುತ್ತಿಲ್ಲ.