ಮತ್ಸ್ಯ ಮರಣದ ಕಾರಣವಿನ್ನೂ ನಿಗೂಢ

ಶಿವಮೊಗ್ಗ: 'ಮತ್ತೂರು ಮತ್ಸ್ಯಧಾಮ'ದಲ್ಲಿ ಸಾವಿರಾರು ಜಲಚರಗಳ ಪ್ರಾಣ ಕಸಿದ ಪ್ರಕರಣ ಸಂಬಂಧ ಮೀನುಗಾರಿಕೆ ಇಲಾಖೆ, ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಅಧಿಕಾರಿಗಳು ಹಲವು ಕಾರಣಗಳನ್ನೇನೋ ನೀಡುತ್ತಿದ್ದಾರೆ. ಆದರೆ, ಅವರ ಕೈಗೆ ಇನ್ನೂ ವರದಿಯೇ ಸೇರಿಲ್ಲ!

ಮತ್ತೂರು, ಹೊಸಹಳ್ಳಿ ಮಧ್ಯೆ ಹರಿಯುವ ತುಂಗಾ ನದಿಯಲ್ಲಿ ಇತ್ತೀಚೆಗೆ ಮೀನುಗಳ ಮಾರಣಹೋಮವಾದ ತಕ್ಷಣ ಭದ್ರಾವತಿಯ ಪಾಲಿಟೆಕ್ನಿಕ್‌ ಕಾಲೇಜು ಪ್ರಯೋಗಾಲಯಕ್ಕೆ ನೀರಿನ ಮಾದರಿ ಕಳುಹಿಸಲಾಗಿತ್ತು. ಅದರ ವರದಿ ಕೂಡ ಬಂದಿರುವುದಾಗಿ ಅಧಿಕಾರಿಗಳು ಒಪ್ಪಿಕೊಂಡಿದ್ದಾರೆ. ಆದರೆ, ಪ್ರಯೋಗಾಲಯದ ವರದಿ ನೀಡುವಂತೆ ಕೇಳಿದರೆ, 'ತಮಗೆ ಇನ್ನೂ ವರದಿಯ ಪ್ರತಿ ಕೈಸೇರಿಲ್ಲ. ಅದರ ಬಗ್ಗೆ ಕೆಲವು ಮಾಹಿತಿಗಳಷ್ಟೇ ಬಂದಿವೆ' ಎಂದು ಸಬೂಬು ನೀಡುತ್ತಾರೆ.

'ಮೀನುಗಳು ಸಾಯುವುದಕ್ಕೆ ನೀರಿನಲ್ಲಿ ಪಿಎಚ್‌(ರಸಸಾರ) ಪ್ರಮಾಣ ಏರಿಕೆ ಹಾಗೂ ಕರಗಿನ ಆಮ್ಲಜನಕ ಪ್ರಮಾಣ ಕಡಿಮೆ ಆಗಿರುವುದೇ ಕಾರಣ. ನದಿಯ ಅಕ್ಕಪಕ್ಕ ಅಡಕೆ, ಭತ್ತದ ಗದ್ದೆಗಳಿವೆ. ಅಲ್ಲಿ ಬಳಕೆ ಮಾಡಿರಬಹುದಾದ ರಾಸಾಯನಿಕ, ಫರ್ಟಿಲೈಸರ್‌ಗಳಿಂದಾಗಿ ಹೊಳೆಯ ನೀರಿನಲ್ಲಿ ಪಾಚಿಸೃಷ್ಟಿಯಾಗಿದೆ. ಜತೆಗೆ, ನೀರೂ ಕಡಿಮೆ ಇದ್ದುದ್ದರಿಂದ ಮೀನುಗಳು ಮೃತಪಟ್ಟಿರಬಹುದು. ಒಟ್ಟಾರೆ, ಮೀನಿಗೆ ಬೇಡವಾದ ಎಲ್ಲ ರಾಸಾಯನಿಕಗಳು ನೀರಲ್ಲಿ ಕಂಡುಬಂದಿದೆ' ಎಂದು ಹೇಳಿದ್ದಾರೆ.