ತೋಟಗಾರಿಕೆ ಇಲಾಖೆ ಕಚೇರಿಯಲ್ಲಿ ಕಳ್ಳತನ

ಸಾಗರ: ಇಲ್ಲಿನ ಗಾಂಧೀನಗರದಲ್ಲಿನ ತೋಟಗಾರಿಕೆ ಇಲಾಖೆ ಮುಂಬಾಗಿಲಿನ ಬೀಗ ಮುರಿದು ಕಳ್ಳತನ ಮಾಡಿದ ಸಂಬಂಧ ಶನಿವಾರ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಕಚೇರಿ ಮುಖ್ಯಸ್ಥರ ಕೊಠಡಿಯೊಳಗಿನ ಗಾಡ್ರೇಜ್‌ ಬೀರು ಒಡೆದು ದಾಖಲೆಗಳನ್ನು ಜಾಲಾಡಿದ್ದಾರೆ. ಈ ಬೀರುವಿನಲ್ಲಿದ್ದ ಬೀಗದ ಕೈಗಳ ಸಹಾಯದಿಂದ ಸೇಫ್ಟಿಲಾಕರ್‌ ತೆಗೆದು ಅದರಲ್ಲಿದ್ದ ರೂ.3 ಲಕ್ಷ ದ 11 ಸಾವಿರ, ರೂ 35 ಸಾವಿರ ಹಾಗೂ ರೂ 7000 ಮೊತ್ತದ 3ಚೆಕ್‌ಗಳನ್ನು, ಕಂಪ್ಯೂಟರ್‌ನ ಒಂದು ಕೀಬೋರ್ಡ್‌, ಪವರ್‌ ಬ್ಯಾಂಕ್‌, ಮೊಬೈಲ್‌ ಫೋನ್‌ ಹಾಗೂ ಅಧೀಕ್ಷ ಕರ ಟೇಬಲ್‌ ಮೇಲಿದ್ದ ಡೆಲ್‌ ಕಂಪನಿಯ ಒಂದು ಲ್ಯಾಪ್‌ ಟಾಪ್‌ ಕಳ್ಳತನ ಮಾಡಲಾಗಿದೆ. ಬೆಂಗಳೂರಿನ ದಿ.ನರ್ಸರಿ ಮೆನ್‌ ಕೋ ಆಪರೇಟೀವ್‌ ಸೊಸೈಟಿ ಹೆಸರಿಗೆ ಇದ್ದ ಚೆಕ್‌ಗಳು ಹಾಗೂ ರೂ 12.150 ಮೌಲ್ಯದ ವಸ್ತುಗಳನ್ನು ಕಳ್ಳತನ ಮಾಡಲಾಗಿದೆ. ಈ ಸಂಬಂಧ ತೋಟಗಾರಿಕೆ ಇಲಾಖೆ ಹಿರಿಯ ಸಹಾಯಕ ನಿರ್ದೇಶಕ ಜೆ.ಎಲ್‌.ರಮೇಶ ಪೇಟೆ ಠಾಣೆಯಲ್ಲಿ ದೂರು ನೀಡಿದ್ದಾರೆ. ಕಚೇರಿಯ ಬಹುತೇಕ ಕೊಠಡಿ ಬೀಗ ಒಡೆಯಲಾಗಿದೆ. ಇದ್ದ ಎಲ್ಲ ಬೀರುಗಳಲ್ಲಿನ ಕಾಗದಪತ್ರ, ಕಡತ ಹರಡಲಾಗಿದೆ. ಅಲ್ಲದೇ ಕಾಗದಪತ್ರ ಹಾಕಿಡುವ ಸಲುವಾಗಿ ತಂದಿಟ್ಟಿದ್ದ ಬಟ್ಟೆ ಚೀಲಗಳನ್ನು ಸಹ ಕಳ್ಳರು ಹೊತ್ತೊಯ್ಯಿದಿದ್ದಾರೆ.