ಭದ್ರಾವತಿಯಲ್ಲಿ ಅಮೀತ್‌ ಶಾ ರೋಡ್‌ ಶೋ ನಾಳೆ

ಭದ್ರಾವತಿ : ಲೋಕಸಭೆ ಚುನಾವಣೆಯಲ್ಲಿ ಪ್ರಧಾನಿ ಮೋದಿ ಕೈ ಬಲಪಡಿಸುವ ಸಲುವಾಗಿ, ಬಿಜೆಪಿ ಅಭ್ಯರ್ಥಿ ಬಿ.ವೈ.ರಾಘವೇಂದ್ರ ಗೆಲುವಿಗಾಗಿ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಅವರಿಂದ ಏ. 20ರಂದು ನಗರದಲ್ಲಿ ಭಾರಿ ರೋಡ್‌ ಶೋ ಏರ್ಪಡಿಸಲಾಗಿದೆ.

ಈ ಕುರಿತು ಸುದ್ದಿಗೋಷ್ಠಿಯಲ್ಲಿ ಗುರುವಾರ ಮಾತನಾಡಿದ ಪಕ್ಷ ದ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ, ಶಿವಮೊಗ್ಗ ಮಹಾನಗರ ಪಾಲಿಕೆ ಉಪ ಮೇಯರ್‌ ಚನ್ನಬಸಪ್ಪ, ದೇಶಕ್ಕಾಗಿ ಮೋದಿ, ಮೋದಿಗಾಗಿ ನಾವು ಘೋಷಣೆಯಡಿ ಪಕ್ಷ ದ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಅವರು ದೇಶಾದ್ಯಂತ ಪಕ್ಷ ವನ್ನು ಬಲಪಡಿಸಿದ್ದಾರೆ. ಶಿವಮೊಗ್ಗ ಲೋಕಸಭೆ ಬಿಜೆಪಿ ಅಭ್ಯರ್ಥಿ ಗೆಲುವಿಗಾಗಿ ಹಿಂದುತ್ವ ಮತ್ತು ಸಂಸ್ಕೃತಿ ಪ್ರಜ್ವಲಿಸುವಂತೆ ಮಾಡಲು ನಗರಕ್ಕೆ ಆಗಮಿಸಿ ರೋಡ್‌ ಶೋ, ವಿಜಯ ಸಂಕಲ್ಪ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ ಎಂದರು.

ಏ.20ರಂದು ಬೆಳಗ್ಗೆ 10ಕ್ಕೆ ಹಳೇನಗರದ ರಂಗಪ್ಪ ವೃತ್ತದಿಂದ ಮುಖ್ಯ ಬಸ್‌ ನಿಲ್ದಾಣ ಬಳಿಯ ಅಂಬೇಡ್ಕರ್‌ ವೃತ್ತದ ವರೆಗೆ ರೋಡ್‌ ಶೋ ನಡೆಯಲಿದೆ. ಕ್ಷೇತ್ರದ 242 ಭೂತ್‌ ಮಟ್ಟದಿಂದ ಸುಮಾರು 25 ಸಾವಿರಕ್ಕೂ ಅಧಿಕ ಕಾರ್ಯಕರ್ತರು, ಅಭಿಮಾನಿಗಳ ಸಂಕಲ್ಪ ಯಾತ್ರೆಯಲ್ಲಿ ಭಾಗವಹಿಸಲಿದ್ದಾರೆ. ಪಕ್ಷದ ರಾಜ್ಯಾಧ್ಯಕ್ಷ ಬಿ.ಎಸ್‌.ಯಡಿಯೂರಪ್ಪ, ಅಭ್ಯರ್ಥಿ ಬಿ.ವೈ.ರಾಘವೇಂದ್ರ ಮುಂತಾದವರು ಪಾಲ್ಗೊಳ್ಳಲಿದ್ದಾರೆ. ಈ ಚುನಾವಣೆಯಲ್ಲಿ ಭದ್ರಾವತಿ ಕ್ಷೇತ್ರದಿಂದ ಸುಮಾರು 80 ಸಾವಿರಕ್ಕೂ ಅಧಿಕ ಮತ ಪಡೆಯುವ ವಿಶ್ವಾಸವಿದೆ ಎಂದರು. ಬಿಜೆಪಿ ನಗರಾಧ್ಯಕ್ಷ ಜಿ.ಆನಂದಕುಮಾರ್‌, ಮುಖಂಡರಾದ ವಿ.ಕದಿರೇಶ್‌, ಮಂಜಪ್ಪ, ಪ್ರಭಾಕರ, ಕಾ.ರಾ.ನಾಗರಾಜ್‌, ಧರ್ಮಪ್ರಸಾದ್‌, ಚನ್ನೇಶ್‌ ಮುಂತಾದವರಿದ್ದರು.