‘ರೈತರಿಗೆ ಉದ್ಯೋಗ ಖಾತ್ರಿ ವರದಾನ ’

ಆನಂದಪುರಂ: ರಾಷ್ಟ್ರೀಯ ಉದ್ಯೋಗ ಖಾತ್ರಿ ಯೋಜನೆ ರೈತರಿಗೆ ಮೂಲ ಸೌಕರ್ಯ ಅಭಿವೃದ್ಧಿ ಪಡಿಸಿಕೊಳ್ಳಲು ವರದಾನವಾಗಿದೆ ಎಂದು ಯಡೇಹಳ್ಳಿ ಗ್ರಾ.ಪಂ.ಸದಸ್ಯ ಶೌಕತ್‌ ಅಲಿ ತಿಳಿಸಿದರು.

ಅವರು ಬುಧವಾರ ಯಡೇಹಳ್ಳಿ ಗ್ರಾ.ಪಂ.ವ್ಯಾಪ್ತಿಯ ಕೆಂಜಗಾಪುರ ದೇವಾಲಯ ರಸ್ತೆಯಲ್ಲಿರುವ ಹೊಟ್ಟಿನಕೆರೆ ಅಭಿವೃದ್ಧಿ ಕಾಮಗಾರಿಗೆ ಚಾಲನೆ ನೀಡಿ ಮಾತನಾಡಿದರು.

ಉದ್ಯೋಗ ಖಾತ್ರಿ ಯೋಜನೆಯಡಿ ಈ ಕಾಮಗಾರಿಗೆ ಸುಮಾರು 4ಲಕ್ಷ ರೂ. ವೆಚ್ಚದ ಕ್ರಿಯಾ ಯೋಜನೆ ರೂಪಿಸಲಾಗಿದೆ. ಈ ಕೆರೆ ಹೂಳೆತ್ತಿ ಅಭಿವೃದ್ಧಿ ಪಡಿಸುವುದರಿಂದ ಈ ಭಾಗದ ರೈತರ ಸುಮಾರು 25 ಏಕರೆಗೂ ಅಧಿಕ ಭೂಮಿಗೆ ನೀರಾವರಿ ಸೌಲಭ್ಯ ದೊರೆಯುತ್ತದೆ. ಅಲ್ಲದೇ ಕೆರೆಯಲ್ಲಿ ನೀರು ತುಂಬಿಕೊಂಡರೆ ಸುತ್ತ-ಮುತ್ತಲ ಭಾಗದ ತೆರೆದ ಬಾವಿಗಳ ಅಂತರ್ಜಲ ವೃದ್ಧಿಯಾಗುತ್ತದೆ. ಈ ಕಾಮಗಾರಿಗೆ ನಿತ್ಯ 25 ರಿಂದ 30 ಜನರು ಕೂಲಿ ನಿರ್ವಹಿಸಲಿದ್ದಾರೆ ಎಂದರು. ಯಡೇಹಳ್ಳಿ ಗ್ರಾ.ಪಂ. ಅಭಿವೃದ್ಧಿ ಅಧಿಕಾರಿ ಉಮೇಶ್‌, ಜಿ.ಪಂ.ಎಂಜಿನಿಯರ್‌ ಅರ್ಜುನ್‌ ಇತರರು ಇದ್ದರು.