ಅಡುಗೆ ಅನಿಲ ಸಿಲಿಂಡರ್‌ನಲ್ಲಿ ನೀರು!

ಹೊಸನಗರ: ಅಡುಗೆ ಅನಿಲ ಸಿಲಿಂಡರ್‌ ಒಳಗೆ ಲಿಕ್ವಿಡ್‌ ಪೆಟ್ರೋಲಿಯಂ ಬದಲಾಗಿ ನೀರು ತುಂಬಿದ ಸಿಲಿಂಡರ್‌ ಪೂರೈಸಿದ ಪ್ರಕರಣ ತಾಲೂಕಿನ ಮಾರುತಿಪುರ ಗ್ರಾ.ಪಂ. ವ್ಯಾಪ್ತಿಯ ಚತ್ರಳ್ಳಿ ಎಂಬಲ್ಲಿ ನಡೆದಿದೆ.

ಇಲ್ಲಿನ ಪ್ರಶಾಂತ್‌ ಜೋಯ್ಸ್‌ ಎಂಬುವರು ಇತ್ತೀಚೆಗೆ ಗ್ಯಾಸ್‌ ಸಿಲಿಂಡರ್‌ ಬುಕ್‌ ಮಾಡಿದ್ದರು. ಆನಂದಪುರದ ಏಜೆನ್ಸಿಯಿಂದ ಶನಿವಾರ ಸೀಲ್‌ ಆಗಿರುವ ಹೊಸ ಸಿಲಿಂಡರ್‌ಅನ್ನು ಡೆಲಿವರಿ ಬಾಯ್‌ ಮೂಲಕ ತಲುಪಿಸಿದ್ದರು.

ಆದರೆ, ಹೊಸ ಸಿಲೆಂಡರ್‌ ಅಳವಡಿಸಿ, ಪ್ರಯತ್ನಿಸಿದರೂ ಸ್ಟವ್‌ನಲ್ಲಿ ಬೆಂಕಿ ಹತ್ತಲಿಲ್ಲ. ಇದರಿಂದ ಅನುಮಾನಗೊಂಡ ಗ್ರಾಹಕರು ಸಿಲಿಂಡರ್‌ನ್ನು ಪರೀಕ್ಷಿಸಿ ನೋಡಿದ್ದಾರೆ. ಎಲ್‌ಪಿಜಿ ವಾಸನೆ ಬಾರದಿದ್ದ ಹಿನ್ನೆಲೆಯಲ್ಲಿ ಸಿಲೆಂಡರ್‌ನ್ನು ಅಲ್ಲಾಡಿಸಿ ನೋಡಿದಾಗ, ದ್ರವ ಪದಾರ್ಥ ಹೊರಬಂದಿದೆ. ಆದರೆ ಲಿಕ್ವಿಡ್‌ ಪೆಟ್ರೋಲಿಯಂ ಇರಬೇಕಾಗಿದ್ದ ಸಿಲಿಂಡರ್‌ನಲ್ಲಿ ನೀರು ತುಂಬಿತ್ತು. ಗ್ರಾಹಕರು ಪರೀಕ್ಷಿಸಿದಾಗ ದ್ರವಕ್ಕೆ ಬೆಂಕಿ ಸಹ ತಲುಗಲಿಲ್ಲ. ಒಂದಿಡೀ ದಿನ ಹಾಗೇ ಇಟ್ಟರೂ ದ್ರವ ಪದಾರ್ಥ ಆವಿಯಾಗಿ ಹೋಗಿಲ್ಲ. ಗ್ರಾಹಕ ಪ್ರಶಾಂತ್‌ ಜೋಯ್ಸ್‌ ಈ ಕುರಿತು ತಾವು ಸಿಲೆಂಡರ್‌ ಪಡೆದ ಏಜೆನ್ಸಿ ಸಂಪರ್ಕಿಸಿದಾಗ, ಅವರ ಸಿಬ್ಬಂದಿ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಉರಿಯದ ಸಿಲಿಂಡರ್‌ಗೆ ಬದಲಾಗಿ ಬೇರೆ ಸಿಲಿಂಡರ್‌ ಒದಗಿಸಿದ್ದಾರೆ.

ಕಡಿಮೆ ತೂಕದ ಸಿಲಿಂಡರ್‌ಗಳು, ದೋಷಯುಕ್ತ ಸಿಲಿಂಡರ್‌ಗಳನ್ನು ಡೆಲಿವರಿ ಮಾಡಿರುವ ಘಟನೆಗಳು ಆಗಾಗ್ಗೆ ಕೇಳಿ ಬರುತ್ತವೆ. ಈಗ ಸಿಲಿಂಡರ್‌ ಒಳಗೆ ನೀರು ತುಂಬಿರುವುದು ಗ್ರಾಮದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.