ಮಹಿಳೆಯರ ಗೌರವಿಸುವ ಮನೋಭಾವ ಹೆಚ್ಚಲಿ

ಸಾಗರ : ಕೌಟುಂಬಿಕ, ಸಾಮಾಜಿಕ ಹಾಗೂ ರಾಜಕೀಯವಾಗಿ ಮಹಿಳೆಯರಿಗೆ ವಿಶೇಷ ಸ್ಥಾನಮಾನ ನೀಡುವ ಮನೋಭಾವ ಹೆಚ್ಚಾಗಬೇಕೆಂದು ಮಾಜಿ ಸಚಿವ ಕಾಗೋಡುತಿಮ್ಮಪ್ಪ ಹೇಳಿದರು.

ಇಲ್ಲಿನ ಗಾಂಧಿಮಂದಿರದಲ್ಲಿ ಮಂಗಳವಾರ ಜಿಲ್ಲಾ ಹಾಗೂ ತಾಲೂಕು ಮಹಿಳಾ ಕಾಂಗ್ರೆಸ್‌ ಘಟಕ ಏರ್ಪಡಿಸಿದ್ದ ವಿಶ್ವ ಮಹಿಳಾ ದಿನಾಚರಣೆ ಉದ್ಘಾಟಿಸಿ, ಪಕ್ಷ ದ ಹಿರಿಯ ಸಾಧಕ ಮಹಿಳೆಯರನ್ನು ಸನ್ಮಾನಿಸಿ ಅವರು ಮಾತನಾಡಿದರು.

ಮಹಿಳೆಯರಿಗೆ ಸಮಾನ ಸ್ಥಾನಮಾನ ಕಲ್ಪಿಸುವುದು ಸುಲಭ ಸಾಧ್ಯವಲ್ಲ. ಆದರೆ, ಕಾಂಗ್ರೆಸ್‌ ಮಹಿಳಾ ಮೀಸಲು ಜಾರಿಗೆ ತರುವ ಮೂಲಕ ಸ್ಥಳೀಯ ಸಂಸ್ಥೆಗಳಲ್ಲಿ ಶೇ.50ರಷ್ಟು ಮಹಿಳೆಯರಿಗೆ ಸಮಾನ ಅವಕಾಶ ಕಲ್ಪಿಸಿದೆ ಎಂದರು.

ಅಧ್ಯಕ್ಷ ತೆ ವಹಿಸಿದ್ದ ಮಹಿಳಾ ಕಾಂಗ್ರೆಸ್‌ ಜಿಲ್ಲಾಧ್ಯಕ್ಷೆ ಅನಿತಾಕುಮಾರಿ ಮಾತನಾಡಿ, ಮಹಿಳಾ ಕಾಂಗ್ರೆಸ್ಸನ್ನು ತಳಮಟ್ಟದಿಂದ ಗಟ್ಟಿಗೊಳಿಸಲಾಗುತ್ತಿದೆ ಎಂದರು.

ಇದೇ ಸಂದರ್ಭ ಹಿರಿಯರಾದ ಸುನಂದ ಶ್ರೀಧರ್‌, ಶಿರಿಜಾನ್‌, ಕೆರಿಯಮ್ಮ, ಸರಸ್ವತಮ್ಮ ದಾಸಕೊಪ್ಪ, ಮರಿಯಮ್ಮ ಅವರನ್ನು ಸನ್ಮಾನಿಸಲಾಯಿತು. ಬ್ಲಾಕ್‌ ಕಾಂಗ್ರೆಸ್‌ ಅಧ್ಯಕ್ಷ ಬಿ.ಆರ್‌.ಜಯಂತ್‌, ನಗರ ಅಧ್ಯಕ್ಷ ತಶ್ರಿಫ್‌, ಗೌರವಾಧ್ಯಕ್ಷ ಎನ್‌.ಜಿ.ಪೈ, ದೀಪಾ ಕಾಗೋಡು, ಜಿಲ್ಲಾ ಕಾಂಗ್ರೆಸ್‌ ಮಾಜಿ ಅಧ್ಯಕ್ಷ ತೀ.ನ.ಶ್ರೀನಿವಾಸ್‌, ಮೈಕಲ್‌ ಡಿಸೋಜ, ಮಹಾಬಲ ಗಣಪತಿ , ವೆಂಕಟೇಶ ಮತ್ತಿತರರು ಇದ್ದರು. ಮಾಲಾ ಕಲ್ಲಪ್ಪ ಪ್ರಾರ್ಥಿಸಿ, ರೇಷ್ಮಾ ಸ್ವಾಗತಿಸಿದರು. ಎನ್‌.ಲಲಿತಮ್ಮ ವಂದಿಸಿ, ಭವಾನಿ ನಿರೂಪಿಸಿದರು.