ಯೋಗ ಸಾಧನೆ ಸದೃಢ ಆರೋಗ್ಯಕ್ಕೆ ಸಹಕಾರಿ

ಭದ್ರಾವತಿ: ಯೋಗಾಸನ ಮಾಡುವ ಮೂಲಕ ಆರೋಗ್ಯವನ್ನು ಕಾಪಾಡಿಕೊಳ್ಳಬೇಕಾಗಿದೆ. ಅದರ ನಿಯಮಗಳನ್ನು ಶರಣರು ವಚನಗಳಲ್ಲಿ ವ್ಯಾಖ್ಯಾನಿಸಿದ್ದಾರೆ ಎಂದು ಶಿವಮೊಗ್ಗ ಬಸವ ಕೇಂದ್ರ ಶ್ರೀ ಬಸವ ಮರುಳಸಿದ್ದ ಸ್ವಾಮೀಜಿ ಹೇಳಿದರು.

ಅವರು ಭಾನುವಾರ ಹಳೇನಗರದ ಶ್ರೀ ಅಕ್ಕಮಹಾದೇವಿ ಬಳಗ, ಬಸವ ಕೇಂದ್ರ ಹಾಗೂ ಶರಣ ಸಾಹಿತ್ಯ ಪರಿಷತ್‌ ವತಿಯಿಂದ ಏರ್ಪಡಿಸಿದ್ದ 203ನೇ ಶರಣ ಸಂಗಮ ಹಾಗೂ ಅಂತಾರಾಷ್ಟ್ರೀಯ ಯೋಗ ದಿನಾಚರಣೆಯ ಕಾರ‍್ಯಕ್ರಮದ ಸಾನ್ನಿಧ್ಯವಹಿಸಿ ಮಾತನಾಡಿದರು.

ಇಂದ್ರಿಯಗಳನ್ನು ಕೇಂದ್ರಿಕರಿಸಿದ ಸ್ಥಿತಿಯೆ ಧ್ಯಾನವಾಗಿದೆ. ಅದ್ದರಿಂದ ದೈನಂದಿನ ಜೀವನದಲ್ಲಿ ದೈಹಿಕ ಶ್ರಮಗಳನ್ನು ಸರಿಯಾದ ರೀತಿಯಲ್ಲಿ ಅನುಸರಣೆ ಮಾಡಿದ್ದಲ್ಲಿ ಯಾವ ಆಸನಗಳೂ ಬೇಕಾಗುವುದಿಲ್ಲ. ಇಂದಿನ ದಿನಗಳಲ್ಲಿ ಅವುಗಳನ್ನು ಅನುಸರಿಸದೆ ಇರುವ ಕಾರಣದಿಂದಾಗಿ ಮಾನಸಿಕ, ದೈಹಿಕವಾಗಿ ಕ್ಷೀಣಿಸುವಂತಾಗಿದೆ ಎಂದು ಹೇಳಿದರು.

ಟಿಎಂಎಇಎಸ್‌ ಆರ್ಯುವೇದಿಕ್‌ ಕಾಲೇಜಿನ ಸಹ ಪ್ರಾಧ್ಯಾಪಕಿ ಡಾ.ಅರುಣ ಕುಮಾರಿ ಯೋಗ ಮತ್ತು ಆರೋಗ್ಯದ ಕುರಿತು, ಶಿವಮೊಗ್ಗ ಸುಬ್ಬಯ್ಯ ಮೆಡಿಕಲ್‌ ಕಾಲೇಜಿನ ಡಾ.ಕಂಚನ್‌ ಜಿರೋಬೆ ಕೊಪ್ಪದ್‌ ಬಸವತತ್ವ ಮತ್ತು ವಿಜ್ಞಾನ ಎಂಬ ವಿಷಯದ ಬಗ್ಗೆ ಉಪನ್ಯಾಸ ನೀಡಿದರು. ಅಕ್ಕಮಹಾದೇವಿ ಬಳಗದವರಿಂದ ಪ್ರಾರ್ಥನೆ ನಡೆಯಿತು. ಡಾ.ದಿವ್ಯ ಸ್ವಾಗತಿಸಿ, ಟಿ.ಜಿ.ಬಸವರಾಜಯ್ಯ ವಂದಿಸಿದರು. ಮಲ್ಲಿಕಾಂಬ ವಿರುಪಾಕ್ಷ ಪ್ಪ ನಿರೂಪಿಸಿದರು.