ತುಮಕೂರು: ಎಸಿಬಿ ಬಲೆಗೆ ಬಿದ್ದ ಖಾಸಗಿ ದಲ್ಲಾಳಿಗಳು

ತುಮಕೂರು ಗ್ರಾಮಾಂತರ: ಜಮೀನಿನ ನಮೂನೆ 1-5 ಸಲುವಾಗಿ ಲಂಚ ಪಡೆದ ಖಾಸಗಿ ದಲ್ಲಾಳಿಗಳ ಮೇಲೆ ಜಿಲ್ಲಾ ಭ್ರಷ್ಟಾಚಾರ ನಿಗ್ರಹ ದಳ ಬಲೆ ಬೀಸಿ ವಶಕ್ಕೆ ಪಡೆದುಕೊಂಡಿರುವ ಘಟನೆ ಬುಧವಾರ ನಡೆದಿದೆ.

ಗ್ರಾಮಾಂತರದ ಕೋರ ಹೋಬಳಿಯ ಕರೀಕೆರೆ ಗ್ರಾಮದ ರಂಗನಾಥ್‌ ಎಂಬುವರ ಜಮೀನಿನ ನಮೂನೆಯ 1-5 ದಾಖಲಾತಿ ಮಾಡಿಕೊಡಲು ತಹಸೀಲ್ದಾರ್‌ ಹೆಸರಿನಲ್ಲಿ 1.25 ಲಕ್ಷ ಬೇಡಿಕೆ ಇಟ್ಟು, ಮುಂಗಡವಾಗಿ 5 ಸಾವಿರ ಹಣ ಪಡೆದಿದ್ದರು. ಈ ಖಾಸಗಿ ದಲ್ಲಾಳಿಗಳ ಮೇಲೆ ಜಿಲ್ಲಾ ಭ್ರಷ್ಟಾಚಾರ ನಿಗ್ರಹದಳ ಪೊಲೀಸರಿಗೆ ರಂಗನಾಥ್‌ ದೂರು ನೀಡಿದ ಹಿನ್ನೆಲೆಯಲ್ಲಿ ಆರೋಪಿಗಳನ್ನು ವಶಕ್ಕೆ ಪಡೆದುಕೊಳ್ಳಲಾಗಿದೆ.

ಘಟನೆ: ಶಿವಕುಮಾರ್‌ ಎಂಬುವರು ನಾನು ತಹಸೀಲ್ದಾರ್‌ ಮೋಹನ್‌ ಕುಮಾರ್‌. ನಿಮ್ಮ ಜಮೀನಿನ ನಮೂನೆಯ ದಾಖಲಾತಿ ಮಾಡಿಕೊಡುವೆ. ಹಣ ಮತ್ತು ಫೈಲ್‌ ಅನ್ನು ರುದ್ರಸ್ವಾಮಿ ಎಂಬುವರ ಬಳಿ ತಲುಪಿಸಿ ಎಂಬುದಾಗಿ ದೂರವಾಣಿ ಮೂಲಕ ತಿಳಿಸಿ, ಮುಂಗಡ 5 ಸಾವಿರ ಪಡೆದು, ನಂತರ ಉಳಿದ ಹಣಕ್ಕೆ ಒತ್ತಾಯಿಸಿದ್ದಾರೆ.

ಈ ಬಗ್ಗೆ ದೂರು ಸ್ವೀಕರಿಸಿದ ಎಸಿಬಿ ಡಿವೈಎಸ್‌ಪಿ ಉಮಾಶಂಕರ್‌ ತಂಡ, ಬುಧವಾರ ತುಮಕೂರಿನ ಉಪ್ಪಾರಹಳ್ಳಿಯ ಫ್ಲೈಓವರ್‌ ಕೆಳಗೆ ಆರೋಪಿ ರುದ್ರಸ್ವಾಮಿಯನ್ನು ಸೆರೆ ಹಿಡಿದು ತಮ್ಮ ವಶಕ್ಕೆ ಪಡೆದುಕೊಂಡಿದ್ದು, ಮುಖ್ಯ ಆರೋಪಿ ಶಿವಕುಮಾರ್‌ರವರ ಮೇಲು ಕ್ರಮ ಜರುಗಿಸಿದ್ದಾರೆ.

ಈ ಪ್ರಕರಣ ಬೇಧಿಸುವಲ್ಲಿ ಇನ್ಸ್‌ ಪೆಕ್ಟರ್‌ ಪ್ರವೀಣ್‌ ಕುಮಾರ್‌, ಸಿಬ್ಬಂದಿಗಳಾದ ಇಮ್ರಾನ್‌ ಬೇಗ್‌, ಡಿ.ನರಸಿಂಹರಾಜು, ಕೆ.ಪಿ.ಶಿವಣ್ಣ, ಚಂದ್ರಶೇಖರ್‌, ನರಸಿಂಹರಾಜು, ಗಿರೀಶ್‌ ಕುಮಾರ್‌, ಮಹೇಶ್‌ ಕುಮಾರ್‌, ರಮೇಶ್‌ ಯಶಸ್ವಿಯಾಗಿದ್ದಾರೆ.