ಆನ್‌ಲೈನ್‌ ವಂಚಕರಿಂದ ಟೋಪಿ; ಹಣ ಕಳೆದುಕೊಂಡ ಮಾಜಿ ಶಾಸಕ

ತುಮಕೂರು: ನಾವು ಬ್ಯಾಂಕ್‌ನಿಂದ ಕರೆ ಮಾಡುತ್ತಿದ್ದೇವೆ, ನಿಮ್ಮ ಕ್ರೆಡಿಟ್‌ ಕಾರ್ಡ್‌, ಡೆಬಿಟ್‌ ಕಾರ್ಡ್‌ ಪಿನ್‌ಕೋಡ್‌ ಬದಲಾಯಿಸಬೇಕು, ಹೊಸ ಕಾರ್ಡ್‌ ಕೊಡಬೇಕು ಎಂಬಿತ್ಯಾದಿ ಸುಳ್ಳುಗಳನ್ನು ಹೇಳಿಕೊಂಡು ದೂರವಾಣಿ ಕರೆ ಮಾಡಿ ನಕ್ಷರಸ್ಥರು, ಅಮಾಯಕರ ಬ್ಯಾಂಕ್‌ ಖಾತೆಯಲ್ಲಿನ ಹಣವನ್ನು ವಂಚಕರು ಲಪಟಾಯಿಸುವ ಸುದ್ದಿಯನ್ನು ಆಗಾಗ ಕೇಳಿರುತ್ತೇವೆ. ಆದರೆ ಇಲ್ಲಿ ಮಾಜಿ ಶಾಸಕರೊಬ್ಬರು ಇಂತಹ ವಂಚಕರ ಜಾಲಕ್ಕೆ ಸಿಲುಕಿ ಹಣ ಕಳೆದುಕೊಂಡಿರುವ ಘಟನೆ ನಡೆದಿದೆ.

ತುಮಕೂರು ಗ್ರಾಮಾಂತರ ಬಿಜೆಪಿ ಮಾಜಿ ಶಾಸಕ ಬಿ.ಸುರೇಶ್‌ ಗೌಡ ಅವರು ವಂಚಕರು ತೋಡಿದ ಹಳ್ಳಕ್ಕೆ ಬಿದ್ದಿದ್ದು, ಇದೀಗ ಹಣ ಕಳೆದುಕೊಂಡು ಕೈ ಕೈ ಹಿಸುಕಿಕೊಳ್ಳುತ್ತಿದ್ದಾರೆ. ಡಿಸೆಂಬರ್‌ 9ರಂದು ಮಧ್ಯಾಹ್ನ 1.30ರ ಸಮಯದಲ್ಲಿ ಮಾಜಿ ಶಾಸಕ ಬಿ.ಸುರೇಶ್‌ ಗೌಡ ಅವರು ತಾಲೂಕಿನ ಹೆಬ್ಬೂರು ಹೋಬಳಿ, ಬನ್ನಿಕುಪ್ಪೆ ಗ್ರಾಮದಲ್ಲಿದ್ದರು. ಈ ವೇಳೆ ಅವರ ಮೊಬೈಲ್‌ ಸಂಖ್ಯೆ 9844011338ಗೆ ಮೊಬೈಲ್‌ ಸಂಖ್ಯೆ 916297877674ನಿಂದ ಕರೆ ಬಂದಿದೆ. ಅತ್ತ ಕಡೆಯ ವ್ಯಕ್ತಿ 'ನಿಮ್ಮ ಡೆಬಿಟ್‌ ಕಾರ್ಡ್‌ ಸರಿ ಇದೆಯಾ?' ಎಂದು ಮಾಹಿತಿ ಪಡೆದುಕೊಂಡಿದ್ದಾನೆ. ಅಲ್ಲದೇ ಇನ್ನೊಮ್ಮೆ ಪರಿಶೀಲನೆ ಮಾಡಿಕೊಳ್ಳಿ ಎಂದು ಹೇಳಿದ ಅಪರಿಚಿತ ವ್ಯಕ್ತಿಯು ನಿಮ್ಮ ಮೊಬೈಲ್‌ಗೆ ಬರುವ ಓಟಿಪಿ ನಂಬರ್‌ ತಿಳಿಸಿ ಎಂದು ಕೇಳಿ ಪಡೆದುಕೊಂಡಿದ್ದಾನೆ.

ಇದಾದ ಕೆಲವೇ ಹೊತ್ತಿನಲ್ಲಿ ಸುರೇಶ್‌ ಗೌಡ ಅವರ ಬೆಂಗಳೂರಿನ ಕಾರ್ಪೊರೇಷನ್‌ ಬ್ಯಾಂಕ್‌ ಖಾತೆಯಿಂದ 25 ಸಾವಿರ ರೂ. ಡ್ರಾ ಆಗಿರುವ ಸಂದೇಶ ಮೊಬೈಲ್‌ಗೆ ಬಂದಿದೆ. ಹಣ ಕಳೆದುಕೊಂಡ ಬಳಿಕ ಮೋಸ ಹೋಗಿರುವುದು ಅರಿವಿಗೆ ಬರುತ್ತಿದ್ದಂತೆ ಸುರೇಶ್‌ ಗೌಡ ಅವರು, ತಮ್ಮ ಆಪ್ತ ಸಹಾಯಕ ಪ್ರಭಾಕರ್‌ ಮೂಲಕ ಬ್ಯಾಂಕ್‌ನಲ್ಲಿ ಪರಿಶೀಲಿಸಿ, ಅವರಿಂದಲೇ ನಗರ ಪೊಲೀಸ್‌ ಠಾಣೆಯಲ್ಲಿ ಡಿ.11ರಂದು ದೂರು ದಾಖಲಿಸಿದ್ದಾರೆ.