ಕೊರಟಗೆರೆಯಲ್ಲಿ ಗಾಂಜಾ: ಹೆಚ್ಚಿದ ಕಳ್ಳತನ

ಕೊರಟಗೆರೆ: ರಾಜ್ಯದ ನಾನಾ ಕಡೆಗಳಲ್ಲಿ ಗಾಂಜಾ ಸೇರಿದಂತೆ ಅಮಲು ಪದಾರ್ಥಗಳ ಅಕ್ರಮ ಮಾರಾಟ ಎಗ್ಗಿಲ್ಲದೆ ನಡೆಯುತ್ತಿದ್ದು, ಕೊರಟಗೆರೆಯಲ್ಲೂ ಯುವಕರು ಗಾಂಜಾ ಚಟಕ್ಕೆ ದಾಸರಾಗುತ್ತಿದ್ದಾರೆ.

ಗಾಂಜಾದ ನಶೆಯೊಂದಿಗೆ ಯುವಕರು ಇಲ್ಲಿ ಕಳ್ಳತನಕ್ಕೆ ಇಳಿಯುತ್ತಾರೆ. ಚನ್ನರಾಯನದುಗ೯ ಹೋಬಳಿ ತೋವಿನಕೆರೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ಅಕ್ರಮವಾಗಿ ಗಾಂಜಾ ಸೊಪ್ಪು ಮಾರಾಟ ವಾಗುತ್ತಿದ್ದು, ಮೂರು ತಿಂಗಳಲ್ಲಿ 25ಕ್ಕೂ ಹೆಚ್ಚು ಕಡೆ ಕಳ್ಳತನ ನಡೆದಿದೆ. ಸಾರ್ವಜನಿಕರು ಪೋಲೀಸರಿಗೆ ಹೆದರಿ ದೂರು ನೀಡಲು ಮುಂದಾಗಿಲ್ಲ.

ಎರಡು ದಿನಗಳ ಹಿಂದೆ ತೋವಿನಕೆರೆ ಗ್ರಾಮ ಪಂಚಾಯತ್‌ ವ್ಯಾಪ್ತಿಯ ಸೋರೇನಹಳ್ಳಿ ಗ್ರಾಮದ ರೈತ ಶಂಕರಲಿಂಗಪ್ಪ ಅವರ ಬೀಸಾಡಿಹಳ್ಳಿ ಗೊಲ್ಲರಹಟ್ಟಿ ಸಮೀಪದ ತೋಟದ ಮನೆಯಲ್ಲಿ ಕಳ್ಳರ ತಂಡ ಕಳವಿಗೆ ಯತ್ನಿಸಿದೆ.

ಶಂಕರಲಿಂಗಪ್ಪನವರ ಮನೆಯ ಮುಂದೆ ಒಣಗಿಹಾಕಿದ್ದ ಅಡಕೆ ಕಳವು ಮಾಡಲು ಎರಡು ದ್ವಿಚಕ್ರ ವಾಹನದಲ್ಲಿಕಳ್ಳರು ಬಂದಿದ್ದರು. ನಾಯಿಗೆ ಹೆದರಿ ಒಂದು ವಾಹನ ಮತ್ತು ಮೊಬೈಲ್ ಬಿಟ್ಟು ಪರಾರಿಯಾಗಿದ್ದಾರೆ. ಗ್ರಾಮದ ಕೆರೆ ಏರಿಯ ಮೇಲೆ ಇದೇ ಕಳ್ಳರು ಓಡಾಡುವಾಗ ಗ್ರಾಮಸ್ಥರು ಅವರನ್ನು ಹಿಡಿದು ಕೊರಟಗೆರೆ ಪೋಲಿಸ್ ಠಾಣೆಗೆ ಒಪ್ಪಿಸಿದ್ದಾರೆ. ಬಂಧಿತರ ಮೂಲಕ ಕೊರಟಗರೆ ಪೊಲೀಸರು ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ.